2 ATEPTAP PEETUUSYEK 19 - BUKUIT NE TILIL

¹ Ak kiweek Jeosapat laitoriatab Juda kwo gonnyi eng’ Jerusalem eng’ kalyet.

² Ak kiwa Jeu weritab Hanani keerindet, kotorokta inendet, ak kolenji laitoriat Jeosapat, Tos yamin itoret kiptengekyot, ak icham che wechei Jehovah? Kabwanjin neregek, che bunu taitab Jehovah, amu kiito.

³ Ago kigigeerjin tuguk che miachen, amu kiiste Aserot eng’ emet, ak kiigiil muguleldang’ung’ icheng’ Kamuktaindet.

⁴ Ak kimeny Jeosapat Jerusalem: ak kiwendot kogeny eng’ kwenutab bik koboch Beer-seba agoi emetab tulonokab Epraim, ak komut ichek koweekyi Jehovah, Kamuktaindetab kwanisiekwak.

⁵ Ak kiinde kiruogik emet, eng’ nganasok tugul che ng’ototin che bo Juda, nganaset age tugul,

⁶ ak kolenji kiruogichoto, Obwat kit ne oyae: amu moruochi agobo chi, oruochi agobo Jehovah; mi inendet kobotok eng’ kiruoget.

⁷ Ingotebenok anyun kaiyweisiet ne oiywei Jehovah: orib, ak oyai: amu mami tengekto eng’ Jehovah Kamuktaindennyo, anan ko tiytietab bik, ama taachei konunoik che kigoigoisie.

⁸ Ak kiinde kogeny Jeosapat Jerusalem Lawik ak tisiik, ak che bo kandoikab gorikab kwanisiekab Israel, agobo kiruogetab Jehovah, ak agobo tuguk che kamoiyo. Ak kiweek koba Jerusalem.

⁹ Ak king’at ichek kolenji, Oyai ko u nito eng’ kaiyweisiet ne oiywei Jehovah, eng’ imanda, ak eng’ muguleldo ne igesunotgei.

¹⁰ Ak betut age tugul ne kaityok ng’olyotab chi age tugul ne bunu tupchosiekwok che menyei nganasokwak, agobo korotik eng’ korotik, ak agobo ng’atutik ak kayomisutik, konetisiosiek ak kiruogutik, oteechi, si manam ichek tengekto eng’ taitab Jehovah, ak konyonjok nereknatet, okwek ak tupchosiekwok: oyai nito, si manamak tengekto.

¹¹ Ak ogeero, boiywok Amaria tisiindet ne o eng’ tuguk tugul che bo Jehovah; ak koboiywok Sebadia weritab Ismael, bounindetab gotab Juda, eng’ tuguk tugul che bo laitoriat: ak egu Lawik kiptainik eng’ taing’wong’. Oboisie eng’ nyiganatet, ak kotebi Jehovah koboto inendet ne yaei ne mie.