2 ATEPTAP PEETUUSYEK 15 - BUKUIT NE TILIL

¹ Ak kinyonji Tamirmirietab Jehovah Asaria weritab Obed:

² ak kiwa kotorokta Asa, kolenji, Ogasa okwek, inye Asa ak Juda tugul ak Benjamin: mi Jehovah kobotok, ye otebye ak inendet; ak ngot ocheng’ inendet, onyoru; ago ngot omete inendet, kometok.

³ Kiga kotebe Israel egosiek che chang’ ama tinyei Kamuktaindet ne bo iman, ama tinyei tisiindet ne inetisiei, ama tinyei ng’atutik:

⁴ ago kingoweekyigei Jehovah, Kamuktaindetab Israel, eng’ nyalildanywa, ak kocheng’ inendet, konyor inendet.

⁵ Ak kima komi kalyet eng’ betusiechoto eng’ inendet ne kimandoi, anan ko eng’ inendet ne nyonei go, ago kitinyei kaiimutik ichek tugul che kimenyei emotinwechoto.

⁶ Kitonatongei, kogirindoi bororiet age bororiet age, ak kogirindoi nganaset age nganaset age: amu kiinyalil Kamuktaindet ichek eng’ nyalilowogik tugul.

⁷ Ago ogimegitu, among’ kochorirenso eunekwok: amu onyoru melekto eng’ boisionikwok.

⁸ Ak kingogas Asa ng’alechuto, ak maoinatetab maotiot Obed, konyiganit, ak koisto tuguk che kiwechei eng’ emet tugul ne bo Juda ak Benjamin, ak eng’ nganasok che kiga koreb eng’ emetab tulonokab Epraim; ak kiteech kogeny kaptisisietab Jehovah, ne kimi taitab keterutab Jehovah.

⁹ Ak kiiyum Juda tugul ak Benjamin, ak bunotik che kimi koboto ichek, che bo Epraim ak Manase, ak che bo Simeon: amu kibwanji inendet bik che chang; mising’ kobun Israel, ye kingogeer kole mi Jehovah Kamuktaindennyi koboto inendet.

¹⁰ Koyumgei anyun eng’ Jerusalem eng’ arawetab somok eng’ kenyitab taman ak mut ne bo laitornatetab Asa.

¹¹ Ak kieng’ji Jehovah tiseiywek eng’ betunoto, che bo barunenik che kigetu, eik bogol tisab ak kechirek elfusiek tisab.

¹² Ak kiiyomisgei kocheng’ Jehovah, Kamuktaindetab kwanisiekwak, eng’ mugulelwekwak tugul, ak eng’ sobonwekwak tugul;

¹³ ak kole, age tugul ne machamei kocheng’ Jehovah Kamuktaindetab Israel, kebarei ngo ming’in, anan ko o, ngo muren, anan ko kwony.

¹⁴ Ak kiiyosiechi Jehovah komwa eng’ kutit ne o, ak eng’ waagat, ak eng’ iriagok, ak eng’ igondisiek.

¹⁵ Ak kiboiboitu Juda tugul amu kayosionoto: amu kigayosio eng’ mugulelwekwak tugul, ak kocheng’ inendet eng’ magenywa tugul; ak kinyor inendet: ak kiigochi Jehovah ichek kamuung’et eng’ tabanwekwak tugul.

¹⁶ Ak kiisto Maaka agine, kametab Asa laitoriat, si mata koek laitoriat ne kwondo, amu kiga koyai kanamwet ne kiwechei ne bo Asera; kibut Asa kanamwennyi, ak kotui koek temburiek, ak kobeel eng’ ole negite kererutab Kidron.

¹⁷ Ago kima kiisto komoswek che tororen eng’ Israel: ago kiigesunotgei muguleldab Asa eng’ betusiekyik tugul.

¹⁸ Ak kiib tuguk che kiga taban kwandanyi, kobwa gotab Kamuktaindet, ak che kiga kotaban inendet, feda, ak tahabu, ak terenik.

¹⁹ Ak mata kobiit luget kogeny agoi kenyitab sosom ak mut ne bo laitornatetab Asa.