2 ATEPTAP PEETUUSYEK 14 - BUKUIT NE TILIL

Laitornatetab Asa

¹ Koru anyun Abija koboto kwanisiekyik, ak kigitupchi nganasetab Daudi, ak kilaitoran Asa werinnyi kogeer inendet: kinyor emet kalyet kenyisiek taman eng’ betusiekyik.

² Ak kiyai Asa ne mie ak ko litit eng’ taitab Jehovah Kamuktaindennyi:

³ amu kiisto kapkorosusiek che ter, ak komoswek che tororen, ak kobut tolochik, ak koeb Aserik;

⁴ ak king’at Juda kocheng’ Jehovah, Kamuktaindetab kwanisiekwak, ak koyai ng’atutik ak kayomisutik.

⁵ Kiisto kogeny eng’ nganasok tugul che bo Juda komoswek che tororen ak kanamonikab asista: ak kitinyei kalyet bororiet eng’ tainnyi.

⁶ Ak kiteech nganasok che ng’ototin eng’ Juda: amu kimi kalyet emet, ak kima kotinyei luget eng’ kenyisiechoto; amu kiga kogochi Jehovah inendet kamuung’et.

⁷ Amu kimwachi bikab Juda kolenji, Ongeteech nganasochu, ak kiyieme irimoik, ak teeksosiek che koen, ak ormarichok, ak temeleiywek; ta komi emet tainnyo, amu kigecheng’ Jehovah Kamuktaindennyo; kigecheng’ inendet, ak kigogonech kamuung’et eng’ komosta age tugul. Koteekso anyun ak kibor.

⁸ Ak kitinyei Asa luget ne kitinyei long’onik ak ng’otwek; che bo Juda ko ki bik elfusiek bogol somok; ak che bo Benjamin, che kitinyei long’onik ak kwangok, ko ki elfusiek bogol aeng’ ak tamanwogik sisiit: ki bik che kimen che nyigonen chuto tugul.

⁹ Ak kinyo kobargei ak ichek Sera Etiopindet, kotinyei luget ne bo bik elfut konyil elfut, ak karisiek bogol somok; ak kiit Maresa.

¹⁰ Kwo anyun Asa kotorokta inendet, ak kitet luget eng’ atebwetab Sepata ne mi Maresa.

¹¹ Ak kirirji Asa Jehovah Kamuktaindennyi, kole, Jehovah, mami age kobatenen ne imuchi kotoretis eng’ kwenutab ne kim ak ne matinyei kimnatet: toretech, ee Jehovah Kamuktaindennyo; amu kimang’un, ak kagibwa kebarge ak tuiyoni eng’ kaineng’ung’. Ee Jehovah, i Kamuktaindennyo; amat koterterin chi.

¹² Kobar anyun Jehovah Etiopik eng’ taitab Asa, ak eng’ taitab Juda; ak kimwei Etiopik.

¹³ Ak kion Asa ak bik che kimi tugul agoi Gerar: ak kibek Etiopik che chang’ ne mata komuch kosorgei; amu kigibar eng’ taitab Jehovah, ak eng’ taitab lugennyi; ak kiib barunenik che chang’.

¹⁴ Ak kibar nganasok tugul che kimi ole negite Gerar; amu kinyonji ichek kamuisetab Jehovah: ak kinam tuguk eng’ nganasok tugul; amu kimi barunenik che chang’ nganasochato.

¹⁵ Ak kibar kogeny kaptugusiek, ak kokweri kechirek ng’isiat, ak tambesik, ak koweek koba Jerusalem.