1 SAMUEL 6 - BUKUIT NE TILIL

Koweektoi Pilistik Moinget kwo Israel

¹ Ak kitebe moingetab Jehovah emetab Pilistik arawek tisab.

² Kiguur Pilistik tisiik ak che ng’orsei, kole, Kiitoi nee moingetab Jehovah? Oboruech ole kiweektoitoi kwo oldanyi.

³ Ak kile, Ngot oweekte moingetab Kamuktaindetab Israel, ko mat oweekte buch; ago matiny kilya oweektochini inendet koboto kagochinetab chalwokto: si kosoobok, ak onai amu nee si ko ma kiisto eunnyi eng’ okwek.

⁴ Komwa anyun kole, Nee kagochinetab chalwokto ne kiweekyini inendet? Ak kile, Kabwanutik mut che bo tahabu, koboto murek mut che bo tahabu, ko u koitetab kiptainikab Pilistik: amu kimi koroito agenge okwek tugul, ak kiptainikwok.

⁵ Noto anyun, oyai itonwekab kabwanutikwok, ak itonwekab murekwok che ng’emei emet; si kobiit otoror Kamuktaindetab Israel; tamangab ko nyamnyum eunnyi eng’ okwek, ak eng’ kanamonikwok, ak eng’ emeng’wong’.

⁶ Amu nee anyun si ouuiit mugulelwekwok, ko u ye kiiuuiit Misrik ak Parao mugulelwekwak? Kingo kagoyai tuguk eng’ kwong’et eng’ kwenunywa, ko tos ma chamji bichoto koba, ak kiba?

⁷ Oyai anyun karit ne leel, ak onam tuga aeng’ che aboen che tomo kerat, oratyi karinato tuchato, ak ogetu moekwak kobwa ga:

⁸ ak oib moingetab Jehovah ak onde karit; ak onde sandugut ne mi tabandanyi: tugukab tahabu, che oweektochini koek kagochinetab chalwokto, ak oyokte kwo.

⁹ Ak ogeer, ngot kotogosta kobun kiwotennyi kowendi Bet-semes, ko kaga ko inendet ne kiyaiywech yaitioni o: ago ngot ko ma bun, kenai anyun kele, ma eunnyi ne kobirech; kaga kiy ne koityech buch.

¹⁰ Ak kiyai bichoto ko u noto; ak koget tuga aeng’ che aboen, ak koratyi karit, ak koger moekwak eng’ ga.

¹¹ Yeityo konde moingetab Jehovah karit, koboto sandugut ne mi murek che bo tahabu ak itonwekab kabwanutikwak che kigiyai.

¹² Ak kibun tuchato oret ne litit ne wendi Bet-semes; kibun oret ne o, koutyoti, ama masta koba eutab tai anan ko ne bo katam, ak kiisub kiptainikab Pilistik kot koit kiwotetab Bet-semes.

¹³ Ak kigesei nganokwak bikab Bet-semes eng’ atebwet: ak kitobendo, kogeer moinget, ak koboiboitu ko kageer.

¹⁴ Ak kiit karinato mbaretab Josua Bet-semindet, kitonon eng’ yoto, ole kimi koita ne o: ak kibet ketikab karinato, ak kogoito tuchato koek kagochinet ne kibeeljin Jehovah.

¹⁵ Ak kiinem Lawik moingetab Jehovah, ak sandugut ne kimi yoto, ne kimi tuguk che bo tahabu orit, ak konde baragutab koyato o: ak kiigoito bikab Bet-semes kagochinoik che kibeelei ak koeng’ji Jehovah tiseiywek eng’ betunoto.

¹⁶ Ak kingo kagogeer kiptainik mutu che bo Pilistik tuguchoto, koweek koba Ekron betunoto.

¹⁷ Ak chu ko kabwanutik che kigiyae tahabu che kiweektochi Pilistik Jehovah koek kagochinetab chalwokto; bo agenge Asdod, ko bo agenge Gasa, ko bo agenge Askelon, ko bo agenge Gat, ko bo agenge Ekron;

¹⁸ koboto murek che kigiyae tahabu, ko u koitetab nganasok tugul che bo Pilistik che ki bo kiptainik mut, che ki bo nganasok che ng’ototin ak ko bo nganasok che mengechen eng’ emet: agoi koyato o, ne kiginde moingetab Jehovah kotonone, mi koyato agoi rani koretab Josua Bet-semindet.

¹⁹ Ak kibir Jehovah Bet-semes, amu kiit moingetab Jehovah kogeer orit, kibar inendet bik tamanwogik tisab eng’ bichoto, ak bik elfusiek konom: ak kiririo bik, amu kibar Jehovah bik eng’ baret ne o.

²⁰ Ak kile bikab Bet-semes, Ng’o ne imuchi kotonon eng’ taitab Jehovah Kamuktaindani tilil? Ak togostoi eng’ olinnyo kowendi ole mi ng’o?

²¹ Ak kiiyokto bik koba ole mi bik che menyei Kiriat-jearim, kolenji, Kagoib Pilistik moingetab Jehovah konyo oli; obwa ochoruge, ak oib kotogosta kwo oling’wong’.