1 SAMUEL 26 - BUKUIT NE TILIL

Korire Daudi sobondab Saul eng’ ong’atetab Sip

¹ Ak kibwa Sipik ole mi Saul eng’ Gibea, ak kolenji, Maunyegei Daudi eng’ tulwetab Akila, ne tokyingei ong’atet?

² Kong’eet anyun Saul kochortagei kwo ong’atetab Sip, komi ak murenik elfusiek somok che bo Israel che kigilewen, koba kocheng’at Daudi eng’ ong’atetab Sip.

³ Ak kiteech Saul tulwetab Akila, ne tokyingei ong’atet, ne negite oret. Ago kitebe Daudi ong’atet, ak kigeer kole kogosub inendet Saul konyo ong’atet.

⁴ Kiiyokto anyun Daudi segeik, ak kinai komie kole kogonyo Saul.

⁵ Ak king’eet Daudi ak konyo ole kiga teech Saul: ak kigeer Daudi ole kirue Saul, koboto Abner weritab Ner, ne ki kiptaiyatab lugennyi: kirue Saul kwenutab karisiek, ak kiteech bik koyiem inendet.

⁶ Kiwol anyun Daudi ak kolenji Aimelek Hitindet, ak Abisai weritab Seruia, ng’etab kametab Joab, Ng’o ne nyonei kechortage tuwai ole mi Saul eng’ nganaset? Kole Abisai, Kichortoige tuwai.

⁷ Kiit anyun Daudi ak Abisai kemoi ole mi bik: ak ogeero, kirue Saul kwenutab karisiek, ko lumdaat ng’otinnyi eng’ ye negite metinnyi: ak kiruei Abner koboto bik ko kayiem inendet.

⁸ Kolenji anyun Abisai Daudi, Kagonde Kamuktaindet eung’ung’ bunyondeng’ung’ rani: ara anyun, asomin ale chamwa atoor inendet eng’ ng’otit, atoore agenge, kosore ak matoore kogeny asakyini.

⁹ Ak kilenji Daudi Abisai, Amebar: amu ng’o ne imuchi kochuul eunnyi kobar ne iilat ne bo Jehovah, ama nyor ng’ogisto?

¹⁰ Ak kile Daudi, ko u ye sobei Jehovah, kobarei Jehovah inendet; anan koityi betunnyi ne meei; anan kwo luget kwo komechi oloto.

¹¹ Ingolooit eng’ ane eng’ Jehovah si machuul eunnyu abar ne iilat ne bo Jehovah: ago asomin ale, ib ng’otit ne mi ye negite metinnyi, ak sotetab beek, ak kebe.

¹² Kiib anyun Daudi ng’otit ak sotetab beek che kimi ye negite metitab Saul; ak kiba ama keer chi, anan konai, ama kos chi age tugul: amu kiruitos tugul; amu kiibutyi ichek ruondo ne nyigis ne kibunu Jehovah.

¹³ Yeityo kwo Daudi bitonin, ak kotonon eng’ tulwet barak eng’ ole loo; ki loochin kot:

¹⁴ ak kitwekyi Daudi bik, koboto Abner weritab Ner, kolenji, Mewolu kiy inye Abner? Ak kiwol Abner kole, I ng’o inye, ne itwekyini laitoriat?

¹⁵ Ak kilenji Daudi Abner, Tos, ma i muren? Ng’o ne ogerge eng’ Israel? Amu nee anyun si merib kiptaiyandeng’ung’ laitoriat? Amu konyo chi eng’ bik konyo kobar lairtoriat kiptaiyandeng’ung’.

¹⁶ Ma mie kii koiyai. Ko u ye sobei Jehovah, konyoljinok obegu, amu ma orib kiptaiyandeng’wong’, ne iilat ne bo Jehovah. Ogeer anyun-o, ole mi ng’otitab laitoriat, ak sotetab beek ne komi ye negite metinnyi.

¹⁷ Ak kinai Saul kutitab Daudi, ak kole, Kuting’ung’ noto, inye werinnyu Daudi? Ak kile Daudi, Ee, kutinnyu noto kiptaiyandennyu, ee, laitoriat.

¹⁸ Ak kile, Amu nee si kosubot kiptaiyandennyu otwogindennyi? Koayai nee? Anan nee yaitiet ne mi eunekyuk?

¹⁹ Noto anyun, asomin ale, ingogas kiptaiyandennyu laitoriat ng’alekab otwogindennyi. Ngot ko Jehovah ne kiing’eetin iyaiywa ne ya, ko ingotaach inendet kagochinet: ago ngot ko werikab bik, ko ingoek ichek che chubotin eng’ taitab Jehovah; amu kagoona ichek rani si ma kinamge ak bororietab Jehovah, kolen, Ui iot kanamonik.

²⁰ Ara anyun, amat kotumjigei ng’ony korotikyuk ole looe ole mi Jehovah amu kanyo laitoriatab Israel kocheng’ kimitiat, ko u ye cheng’ei chito taiywet eng’ tulonok.

²¹ Kole anyun Saul, Kaayai tengekto: weeige werinnyu Daudi: amu ma ayaun kiy ne ya kogeny, amu kabunji kamanut ne o rani sobondanyu eng’ taing’ung’: keero, kaayai berberindo, ak kaalel mising’.

²² Ak kiwol Daudi kole, Keer ng’otit-o, ee laitoriat! Ingonyo anyun age eng’ murenik bitoni, konyo koib.

²³ Ak yaakyin Jehovah chi age tugul imandanyi ak mieindanyi: amu kagondein Jehovah eunnyu rani, ak ma acham achuul eunnyu abar ne iilat ne bo Jehovah.

²⁴ Ak kogeny, keero, katinyei rani sobondang’ung’ kamanutiet ne o eng’ tainnyu, ko u noto ingosich agine sobondanyu kamanutiet ne o eng’ taitab Jehovah, ak ingosorua inendet eng’ nyalilda tugul.

²⁵ Kolenji anyun Saul Daudi, Ingiberurin werinnyu Daudi: ta iyae tuguk che eechen, ak ibelisiei iman. Kwo anyun Daudi bandanyi, ak kiweek Saul kwo oldanyi.