1 SAMUEL 15 - BUKUIT NE TILIL

Koterteri Saul Amalek

¹ Ak kilenji Samuel Saul, Kiiyokwa Jehovah anyo aiilin iegu laitoriatab bikyik, ibou Israel: kas anyun ng’alekab Jehovah.

² Kamwa Jehovah ne bo lugosiek ko u ni kole, Kaabwat kit ne kiyachi Amalek Israel, ko u ye kigirinda inendet eng’ oret, ye kitogosu eng’ Misri.

³ Ui anyun nguno ak ibar Amalek, ak ing’em igesu tuguk tugul che tinyei, amat ibagakte; ago bar muren ak kwony, lakwet ak ne reriei, teta ak kechiriet, tambesiet ak sigiriet.

⁴ Ak kiguur Saul bik, ak koiit ichek eng’ Telaim, bik elfusiek bogol aeng’ che bunei kelyek ak bik elfusiek taman che bo Juda.

⁵ Ak kinyo Saul koit nganasetab Amalek, ak koribis eng’ atebwet.

⁶ Ak kimwachi Saul Kenik, kolenji, Oba oistege, ochortege oistoege Amalegik, si mabarak koboto ichek: amu kiorire lagok tugul che bo Israel, ye kitogosu komong’u eng’ Misri. Koistogei anyun Kenik eng’ Amalegik.

⁷ Ak kibar Saul Amalegik, koboch Abila ne mi oret ye kibendi Sur, ne tokyingei Misri.

⁸ Ak kinam Agag laitoriatab Amalegik kosobei, ak kobar bik tugul koges eng’ rotwetab chok.

⁹ Ago kibagach Agag Saul ak bik, ak kechirek che kororon eng’ tugul, ak tuga, ak che akwaen, ak arekab kechir, ak tuguk tugul che ki miachen, ama cham kobar koges: ago king’em kit age tugul ne kisasei ak ne ma kiy, koges.

¹⁰ Kiityi anyun ng’olyotab Jehovah Samuel kolenji,

¹¹ Kima ko ta mie aeet Saul koek laitoriat: amu kagoweektagei let ma kosuba, ama yai ng’atutikyuk. Ak kinerech anyun Samuel; ak kirirji Jehovah kemout komugul.

¹² Ak king’eet Samuel karon inne kwo kotuiyo ak Saul; ak kigimwachi Samuel kelenji, Kanyo Saul Karmel, ak keero, koteekyigei kit ne kibwate inendet, ak kowendot, ak kwo kosiirto, ak kochortagei Gilgal.

¹³ Ak kinyo Samuel ole mi Saul: ak kilenji Saul inendet, Ingoberurin Jehovah: koayai ng’atutietab Jehovah.

¹⁴ Ak kile Samuel, Bo nee anyun kautoni bo kechirek agase eng’ itikyuk, ak kautetab tuga ne agase?

¹⁵ Ak kile Saul, Koget bik kechirechoto ak tuchato eng’ Amalegik: amu kobagakta bik kechirek ak tuga che kororon eng’ tugul, si koeng’ji Jehovah Kamuktaindeng’ung’; ak kogibar che kong’et, kigesu.

¹⁶ Kimwachi anyun Samuel Saul kolenji, Kany amwaun kit ne kamwawa Jehovah kemouni. Ak kilenji inendet, Mwa inye.

¹⁷ Ak kimwa Samuel kole, Nganda kii ming’in ye kiigeerege, ko kima kieetin iegu kandoindetab bororiosiekab Israel? Ak koiilin Jehovah iegu laitoriat eng’ Israel;

¹⁸ ak kiiyokten Jehovah iwe banda, ak kole, Ui ak ibar Amalegik, kiptengeginicho igesu, ak obarge ak ichek kot kogesgei.

¹⁹ Amu nee anyun si megas it kutitab Jehovah, ago kelabatyi barunenik, ak iyai kit ne ya eng’ taitab Jehovah?

²⁰ Ak kilenji Saul Samuel, Ee, koagas it kutitab Jehovah, ak koawe oret ne koiyoktoa Jehovah awo, ak koamutu Agag laitoriatab Amalegik, ak koabar Amalegik kogesgei.

²¹ Ago koget bik barunenik, kechirek ak tuga, che kororon che kogitaban, si keeng’ji Jehovah Kamuktaindeng’ung’ eng’ Gilgal.

²² Ak kimwa Samuel kole, Tos, ting’e Jehovah boiboiyet ne o kagochinoik che kibeelei ak tiseiywek, ko u ye ting’e kasetab it ne bo ng’olyotab Jehovah? Keero, siirei kasetab it tiseiywek, ak siirei kasetab it mwanikab mengichik.

²³ Amu kergei ngelelnatet ak tengektab bonisiet, ak kergei uuindab met ak chalwokto ak saetab kanamonik. Amu koiesie ng’olyotab Jehovah, ko kagoesien aginye si mata iegu laitoriat.

²⁴ Ak kimwachi Saul Samuel kolenji, Koayai tengekto, amu koabistoe ng’atutietab Jehovah, ak ng’aleguk: amu koaiywei bik, ak agas it kutinywa.

²⁵ Ara asain anyun nguno ale, nyoiywa kaat tengektanyu, ak ingeweeige tuwai, si kobiit agutung’ji Jehovah.

²⁶ Ak kimwachi Samuel Saul kolenji, Magiweeksei ak inye: amu koiesie ng’olyotab Jehovah, kagoesien Jehovah, maiegu laitoriat eng’ Israel.

²⁷ Ak ye kingowelelgei Samuel kwo, konam Saul tabandab ngoriennyi, ak kigerer.

²⁸ Ak kimwachi Samuel inendet kolenji, Kagogererenen Jehovah bounatetab Israel rani, ak kogochi chitab kokweng’ung’ ne kaigai eng’ inye.

²⁹ Ak mamwaei lembech Kimnatetab Israel, ama sigu; amu inendet ko ma chito si kowalak.

³⁰ Yeityo komwa kole, Koayai tengekto: ago asain kora ale konyita nguno, eng’ taitab boisiekab bikyuk, ak eng’ Israel; ak ingeweeige tuwai, si agutung’ji Jehovah Kamuktaindeng’ung’.

³¹ Koweek anyun Samuel kosub Saul; ak kigutung’ji Saul Jehovah.

³² Ak kimwa Samuel kole, Omutwa Agag laitoriatab Amalegik konyo yu. Ak kinyo anyun Agag kobaibai. Ak kimwa Agag kole, Eng’ iman ko kagosiirto ng’wanindab meet.

³³ Ak kimwa Samuel kole, Ko u ye kiyachi rotweng’ung’ bo chok kobogorisiek kobetyi lagok, koegu kameng’ung’ agine ne matinyei lakwa, eng’ kobogorisiek. Ak kimurmur Samuel Agag kotonaton eng’ taitab Jehovah eng’ Gilgal.

³⁴ Kiwa Samuel anyun Rama; ak kitogosta Saul gonnyi eng’ Gibea ne bo Saul.

³⁵ Ak ki matagai konyo Samuel kogeer Saul kogeny agoi kome; amu kirirji Samuel Saul: ak kiibwat Jehovah kole kima kota mie koyai Saul koek laitoriat koboi Israel.