1 PETERO 1 - BUKUIT NE TILIL

Kagatet

¹ Petero, ne kiyoktoi ne bo Jesu Kristo, asirjini che kigilewen, bunotik che bo bik che kigoiyesta, eng’ Ponto, Galatia, Kapadokia, Asia, ak Bitunia,

² ko u eng’ naetab Jehovah Kwanda ne kisib konai, eng’ katabanetab Tamirmiriet, agoi kasetab it ak isetab korotik che bo Jesu Kristo: Ingotesak mieindo ak kalyet eng’ okwek.

Kongoi amu kamang’unetab yetunet ne tinyei chitab Kristo

³ Iberurot Jehovah Kwandab Kiptaiyandennyo Jesu Kristo, ne kisichech kogeny eng’ rirenennyi ne o kenyoru kamang’unet ne sobei eng’ ng’eetyetab Jesu Kristo ne kimong’ eng’ che kibek,

⁴ ketaach borotet ne ma ng’emaksei, ama tinyei muruonindo, ama betei, ne kigigonoruok eng’ kipsengwet,

⁵ okwek che kiribei eng’ kimnatetab Jehovah eng’ kayanet si onyoru yetunet ne chobot keng’any eng’ betutab let.

⁶ Ne oboiboi mising’ eng’ noto, nganda nguno eng’ betusiek che matia, ngo nyolu, ko kagigonok oarogense eng’ yomsosiek che chang’,

⁷ si kenyor eng’ kalosunet ak torornatet ak teegisto, tiemet ne chamaksei ne bo kayaneng’wong’, ne tinyei kamanutiet ne o kosiir ne bo tahabu che betos nganda kitiemei eng’ mat, eng’ ng’ang’et ne bo Jesu Kristo:

⁸ ne ochame nganda tom ogeer; inendet ne nganda mogeere nguno, oyani, ko oboiboi mising’ eng’ boiboiyet ne ma mwaoksei ak ko nyiitat torornatet:

⁹ ye tun onyoru kasuldaetab kayaneng’wong’, yetunetab sobonwekwok.

¹⁰ Kicheng’ maotik ak kogilgilye mising’ inne agobo yetunanoto, icheget che kimaoten agobo mieindo ne osiche:

¹¹ ye kicheng’ei betut ne inet anan ole u betut ne kiiborjin Tamirmirietab Kristo ne kimitei eng’ ichek, ye kisib kobaorian agobo nyalilwogikab Kristo, ak torornatosiek che isubi choto.

¹² Che kiging’ang’ji, ma agobo icheget, ago kiyaiywok okwek tuguchuto, che kagemwawok nguno eng’ ichek che kiamwok logoiywek che miach eng’ Tamirmiriet ne Tilil ne kigiyok eng’ kipsengwet; tuguk che machei malaikaisiek mising’ kogeer.

Atebetab chitab Kristo

¹³ Eng’ noto anyun ogermen suenutikab kabwatutikwok, oripge ak omang’u eng’ kagesunetab ge mieindo ne tun kiibwok eng’ ng’ang’etab Jesu Kristo;

¹⁴ ko u lagok che kase it, amoyaniege magutikwok che bo tai eng’ betusiek che ki bo berberindang’wong’:

¹⁵ ago ko u ye tilil inendet ne kiguurok, oegu che tililen ak okwek eng’ atebosiek tugul;

¹⁶ amu kigisir kele, Oegu che tililen; amu a tilil ane.

¹⁷ Ak ngot oguure inendet olen Kwanda, ne iruochi ko u ole teptoi boisietab chi age tugul, ama eng’ tiytiet, obendoti eng’ kaiyweisiet eng’ betusiekwok che omi ko o toek:

¹⁸ ongen ole kigitiachak omong’une atebeng’wong’ ne bo buch ne kionyoru eng’ kwanisiekwok, ma eng’ tuguk che ng’emaksei, ko u feda anan tahabu;

¹⁹ ago eng’ korotik che bo kamanutiet ne o, ko u che bo aruet ne matinyei berut ak ne matinyei tisia, choto ko korotikab Kristo:

²⁰ ne kisib konaam iman kotom kelumda ng’ony, ago kiging’any eng’ betusiek che bo let agobo okwek,

²¹ che o kayanik eng’ Jehovah amu inendet, ne kiing’eet inendet komong’ eng’ che kibek, ak kogochi torornatet; si kotebi kayaneng’wong’ ak kamang’uneng’wong’ eng’ Jehovah.

²² Amu kiotilil sobonwekwok eng’ kasetab it ne ogase it imanit kot koit chamnyetab tupchosiek ne matinyei kenisiet, ochamnye, okwege eng’ mugulelwekwok eng’ kagiiletab ge:

²³ amu kigesichok kogeny, ma eng’ keswek che ng’emaksei ago eng’ che ma ng’emaksei, eng’ ng’olyotab Jehovah, ne sobei ak kotebyei.

²⁴ Amu, U suswek borwek tugul, Ak u taptokab suswek torornatenywa tugul. Restos suswek, ak kobutyo taptok:

²⁵ Ago tebyei koigeny ng’olyotab Kiptaiyat. Nito ko ng’olyotab logoiywek che miach che kigiamwok.