1 LAITORINIK 9 - BUKUIT NE TILIL

Kogasyin Jehovah Solomon saet

¹ Ak kingo kagoges Solomon teeksetab gotab Jehovah, koboto gotab laitoriat, ak tuguk tugul che kimachei Solomon koyai,

² komong’ji anyun Jehovah Solomon ne bo aeng’, ko u ye kiga komong’ji inendet eng’ tai eng’ Gibeon.

³ Ak kilenji Jehovah inendet, Kaagas saeng’ung’ ak someng’ung’ ne kaisa ak isom eng’ tainnyu: kaatilil goi koiteech, si ande kainennyu yoto koigeny; ak tebe yoto konyekyuk ak muguleldanyu betusiek tugul.

⁴ Ak ngiwendote tainnyu inye, ko u ye kiwendote Daudi kwandang’ung’, eng’ kagesunetab ge ne bo muguleldo, ak eng’ imanda, iyai ko u tugul che kaang’atin, ak irib ng’atutikyuk ak kiruogutikyuk;

⁵ agimit anyun ng’echeretab laitornatet ne bo bounateng’ung’ eng’ Israel koigeny; ko u ye kigayomisyi Daudi kwandang’ung’, alenji, Mabetenen chito ne tebe ng’echeretab laitornatet ne bo Israel.

⁶ Ago ngot omaste ko mata osuba, okwek anan lagokwok, amorib ng’atutikyuk ak etanutikyuk, che kiande taing’wong’, ago ngot obe oot kanamonik, ogutung’ji:

⁷ ang’etoi Israel anyun eng’ emet ne kiagochi; ak goi kiatilil agobo kainennyu, aistoi eng’ tainnyu; si koek Israel kalewenet ak atindiot eng’ bik tugul:

⁸ agot nganda toror goi kot, ko tun kwong’e age tugul ne siirtoe yoto, ak kosasei; ak komwa ichek kole, Amu nee si koyachi ko u ni Jehovah emoni ak goi?

⁹ Ak kowol kole, Amu kimeto ichek Jehovah Kamuktaindenywa, ne kiimut kwanisiekwak komong’ eng’ emetab Misri, ak konamgei ak kanamonik, ak kogutung’ji, ak koot ichek: koipchi anyun Jehovah ichek yaitioni tugul.

Koboisiei Solomon ak laitoriat Hiram

¹⁰ Ak kingo kagogesgei kenyisiek tiptemu, che kiteege Solomon gorjoto aeng’, gotab Jehovah ak gotab laitoriat,

¹¹ (kiga kogochi Hiram laitoriatab Turo Solomon ketikab taragonik ak ketikab biribirinik, ak tahabu, ko u tugul che kimachei,) kogochi anyun laitoriat Solomon Hiram nganasok tiptem eng’ emetab Galili.

¹² Kinyo Hiram eng’ Turo konyo kogeer nganasochoto kiga kogochi Solomon inendet; ago ma baibai inendet eng’ nganasochoto.

¹³ Ak kile, Nee nganasochu kegona-o, tupchennyu? Ak kiguure emet Kabul, agoi ra.

¹⁴ Ak kiiyokyi Hiram laitoriat Solomon talentaisiek bogol ak tiptem che bo tahabu.

¹⁵ Ak ni kit ne kiigochi laitoriat Solomon koyum tuguk si kobiit koteege gotab Jehovah, ak gonnyi, ak Milo, ak irimetab Jerusalem, ak Hasor, ak Megido, ak Geser.

¹⁶ Kiwa Parao laitoriatab Misri kwo konam Geser, ak kobeel eng’ mat, ak kobar Kananik che kimenyei nganasanato, ak kogochi cheptanyi, osotiotab Solomon, koek kagochinet.

¹⁷ Ak kiteech Solomon Geser, ak Bet-horon ne mi komosta ne rektoot.

¹⁸ Ak Baalat, ak Tamar ne mi ong’atet, eng’ emet,

¹⁹ ak nganasok tugul ole kigonore Solomon tuguk, ak nganasok che bo karisiekyik, ak nganasokab murenik che lanyei mbartanyisiek, ak kit ne kimachei Solomon koteekyigei eng’ Jerusalem, ak eng’ Lebanon, ak eng’ emet tugul ne bo bounatennyi.

²⁰ Ak eng’ bik tugul che kiga ng’et che bo Amorik, Hitik, Perisik, Hibik ak Jebusik, che kima ko bo Israel;

²¹ lagokwak che kiga ng’et eng’ emet, che kima imuch lagokab Israel kobar koges, kiiyum Solomon otwogik eng’ bichoto, agoi rani.

²² Ago ma yai Solomon lagokab Israel koek otwogik: kiek murenikab luget, ak kiboitinikyik, ak bounikyik, ak kiptainikyik, ak kandoikab karisiekyik che bo luget, ak murenikyik che kilanyei mbartanyisiek.

²³ Chu ko kiptainikyik che kibou boisietab Solomon, bik bogol mut ak konom, che kibou bik che kiboisiei.

²⁴ Kitogos cheptab Parao eng’ nganasetab Daudi kwo gonnyi ne kiga teekyi Solomon: yeityo koteech Milo.

²⁵ Ak kiigoitoi Solomon kagochinoik che kibeelei ak kagochinoikab kalyet konyil somok eng’ kenyit eng’ kaptisisiet ne kiteekyi Jehovah, kitesta choto nyamdutik che kibeelei, eng’ taitab Jehovah. Koges anyun got.

²⁶ Ak kiyai laitoriat Solomon melisiek che bo luget eng’ Esion-geber, ye negite Elot, eng’ ngegutab Nyanjet ne Birir, eng’ emetab Edom.

²⁷ Ak kiiyokto Hiram otwogikyik, bikab melit, che ingen nyanjet, koboto otwogikab Solomon.

²⁸ Ak kiba Opir, ak koib tahabu eng’ oloto, talentaisiek bogol ang’wan ak tiptem, koipchi laitoriat Solomon.