1 LAITORINIK 7 - BUKUIT NE TILIL

Gotab Solomon ne bo laitornatet

¹ Ak kiteech Solomon gonnyi eng’ kenyisiek taman ak somok, ak kiiges gonnyi tugul.

² Amu kiteech gotab osnetab Lebanon; koindanyi ko ki kakwautik bogol che bo eut, ak tebeesindanyi ko ki kakwautik konom che bo eut, ak koindo ne bo tononennyi ko ki kakwautik sosom che bo eut, che kimi baragutab tolochik eng’ ortinwek ang’wan, che bo taragonik, ak kigimure baragutab tolochichoto bambanik che bo taragonik.

³ Ak kigisiebe barak taragonik eng’ bambanichoto artam ak mut, che kimi tolochik barak, che kiga kitet koek taman ak mut eng’ oret agenge.

⁴ Ak kimi tirisiok eng’ ortinwek somok, che kiga tookyin lapkeiyosiek, che kiga tebe age baragutab age.

⁵ Ak ki aechin komoswek tugul eng’ kurgotik ak tugatugik, ak kiga tokyin lapkeiyosiek che kiga tebe age baragutab age eng’ ortinwek somok.

⁶ Ak kiyai keterut ne bo tolochik; koindanyi ko ki kakwautik konom che bo eut, ak tebeesindanyi ko ki kakwautik sosom che bo eut; ak keterut ne kimi tainywa; ak tolochik ak bambanik che nyigisen che kigimur che kimi tainywa.

⁷ Ak kiteech got ne u keterut ole tebe ng’echeretab laitornatet ole kiiruoge, noto ko kapkiruok: ak kitete taragonik kong’eete got ng’ony agoi tabot.

⁸ Ak gonnyi ne kimenyei, seremut ne kimi keter orit, ko ki bo boisiet ne u noto. Kiteekyi got agine cheptab Parao, (ne kiga itun Solomon,) kogergeit ak keterunoto kiga teech.

⁹ Chuto tugul ko ki bo koik che bo kamanutiet ne o, koik che kigiwai, ko u karogendaet, che kigitile musumenosiek, orit ak sang’, koboch lumeiywot kot koit barak, ak ki u noto agine sang’ kot koit seremut ne o.

¹⁰ Ak ki bo lumeiywek koik che bo kamanutiet ne o, koik che eechen, koikab kakwautik taman che bo eut, ak koikab kakwautik sisiit che bo eut.

¹¹ Ak kimi baragunywa koik che bo kamanutiet ne o, koik che kigiwai, ko u karogendoet, ak ketikab taragonik.

¹² Ak kitinyei seremut ne o koik che kiging’ote che kigiwai che ki soniot somok, ak oret ne bo bambanik che bo taragonik; ko u seremutab orit ne bo gotab Jehovah, ak keterutab got.

Tugukab Got orit

¹³ Ak kiiyokto laitoriat Solomon kimut Hiram eng’ Turo.

¹⁴ Ki weritab mosoget ne bo oretab Naptali, ak kwandanyi ko ki chitab Turo, kitang’indetab sugononik; ak kitinyei ng’omnatet ne o, ak kaguiyet, ak naetab musognatet, ne yaei boisionik tugul che bo sugunonik. Ak kiit oldab laitoriat Solomon, ak kiyai boisiennyi tugul.

¹⁵ Kiyai tolochik aeng’ che bo sugunonik ne kitinyei age tugul kakwautik taman ak sisiit che bo eut kwo barak: ak ki kakwautik taman ak aeng’ che bo eut nyigisindab tolochichoto ngeyiem.

¹⁶ Ak kiyai metowek aeng’ che bo sugunonik che kigibeel kochootyo, si konde walisiekab tolochichoto; koindab tononetab metit agenge ko ki kakwautik mut che bo eut, ak koindab tononetab metit age ko ki kakwautik mut che bo eut.

¹⁷ Kimi karik che regerotin, ak tuguk che u sirimwek che kiging’walng’walat, che ki bo metowek che kimi baragutab tolochik; ki tisab che bo metit agenge, ak ki tisab che bo metit age.

¹⁸ Kiyai anyun tolochik; ak kimi ortinwek aeng’ che kiyiem baragutab karichoto regerotin, ketuge metowek che kimi baragutab tolochik: ak kiyachi metit age ko u noto.

¹⁹ Ak ki bo kakwautik ang’wan che bo eut metowek che kimitei baragutab tolochik eng’ keter, che kigilelesonjine itonwekab taptok.

²⁰ Ak kimi metowek baragutab tolochichoto aeng’ agichek, ole negite mulwet, ne kimi ole negite karichato regerotin: ak itonwekab logoek ko ki bogol aeng’, che kiyiem metoto age eng’ ortinwek.

²¹ Ak kilumda tolochik eng’ keterutab hekalut: ak kilumda toloito ne bo komostab tai, ak koguure kainennyi Jakin: ak kilumda toloito ne bo komostab katam, ak koguure kainennyi Boas.

²² Ak kimi itonwekab taptok baragutab tolochichoto: kiigesgei anyun boisietab tolochik.

²³ Ak kiyai nyanjet ne kitanyi, ne bo kakwautik taman che bo eut kong’eete taban agoi taban, ne kigitainganat, ak ki kakwautik mut che bo eut koindo ne bo tononennyi: ak kimi mireiywot ne bo kakwautik sosom che bo eut.

²⁴ Ak kimi mulonok ng’onyutab mireiywot che kiyiem kotuiyo, che bo kakwautik taman che bo eut, che kiyieme nyanjanato: kisoniot aeng’ mulonochoto, che kigiyaei ye kingeyaei nyanjanato.

²⁵ Kiga tonone nyanjanato itonwekab eik taman ak aeng’, kigeerei somogu murot ne bo katam, kogeerei somogu cherongo, kogeerei somogu murot ne bo tai, kogeerei somogu kong’asis: ak kitonone baragunywa nyanjanato, ak kigeer sugulumwekwak orit.

²⁶ Ak ki aechin tebeesindanyi ak nyigisindab eut; ak kigiyai mireiywondennyi kogergeit ak mireiywotab kikombet, ko u taptet ne kaiye: kiyamegei ak beekab debeisiek elfusiek ang’wan.

²⁷ Ak kiyai ng’echerok taman che bo sugunonik che tebe; ki kakwautik ang’wan che bo eut koindab ng’echeret agenge, ak ki kakwautik ang’wan tebeesindanyi, ak ki kakwautik somok koindab tononennyi.

²⁸ Ak ki u ni boisietab ng’echerochoto: kitinyei tegeleiywek; ak kimi tegeleiywek kwenutab tuguk che u marugut:

²⁹ ak eng’ tegeleiywechoto kimi kwenutab tukchoto u marugut ko kimi itonwekab ng’etunyik, eik, ak kerubisiek; ak eng’ baragutab tukchoto u marugut ko kimi kit ne u ng’echeret baragunnyi: ak eng’ ng’onyutab ng’etunyik ak eik ko kimitei tukchoto kiging’walng’walat kosongininso.

³⁰ Ak kitinyei ng’echeret age tugul kelyek ang’wan che u cheptirok, ak kimurtoinikab sugunonik che namei cheptirok: ak kitinyei cheptirochoto ang’wan karik che tiiei: ak kimi karichato kitiie, che kigitany, kureretab teret, komi tabandab age tugul tuguchoto kiging’walng’wal.

³¹ Ak ki kakwautiet agenge ne bo eut kutinnyi eng’ orit ne bo metit ak eng’ barak: ak kitainganak kutinnyi, ko u ole kigiyaita ng’echeret ne tebe, ki kakwautiet agenge ak kebeberta; ak kimi wautik baragutab kutinnyi agine, ak ki aechin komoswekwak tugul eng’ koindo, ki ma ko tainganat.

³² Ak kimi kureretab tegeleiywechoto cheptirochoto ang’wanu; ak kimi kimurtoinichoto namei kelyek ole bo kel: ak koindab tononetab cheptiret ko ki kakwautiet agenge ak kebeberta.

³³ Ak ki u yaetab cheptirochoto yaetab kelyekab karit: kimurtoinikwak, ak cheptirokwak icheget, ak karik che ituitos cheptiret ak kungit eng’ kwenut, ak kungit inendet eng’ kwenut, ko kigitanyi choto tugul.

³⁴ Ak kimi karik ang’wanu che kitiiei eng’ luukwek ang’wan che bo ng’echeret age tugul: kinamgei ak ng’echeret karikyik che kigitiie.

³⁵ Ak kimi baragutab ng’echeret tegeleiywot ne kiga yiem kotuiyo, ne ki koindab tononennyi ko kebebertab kakwautiet ne bo eut: ak kiga namgei ko u noto tiieiywekyik ak tegeleiywekyik eng’ baragutab ng’echeret.

³⁶ Ak kiwai itonwekab kerubisiek ak ng’etunyik ak tironik eng’ sanisiekab tiieiywekyik ak eng’ tegeleiywekyik, ko u boroindo ne bo age tugul, koboto karik che kiging’walng’wal, che kiga yiem.

³⁷ Kiyai ko u noto ng’echerochoto taman: kigiyai choto tugul kogergeit, ki aechin tugul, ak ki kergei eng’ yaet.

³⁸ Ak kiyai tabok taman che eechen che bo sugononik: kiyamei tabet agenge beekab debeisiek tamanwogik sisiit: ak ki kakwautik ang’wan tabet age tugul: ak kimi tabet agenge baragutab ng’echeret age tugul eng’ choto taman: kitebe tabet age tugul ng’echeret.

³⁹ Ak kiitepto ng’echerok, kotebe mutu komostab tai ne bo got, kotebe mutu komostab katam ne bo got: ak kiinde nyanjanato komostab tai ne bo got kogeer kong’asis, kotokyigei murot ne bo tai.

⁴⁰ Ak kiyai Hiram tabok che eechen ak kechigosiek che eechen ak tabok che mengechen. Kiiges anyun Hiram boisiet tugul ne kiyachi laitoriat Solomon eng’ gotab Jehovah:

⁴¹ tolochik aeng’, ak tabok aeng’ che bo metowek che kimi baragutab tolochichoto; ak karichato aeng’ regerotin kotuch tabochoto aeng’ che kimi baragutab tolochik;

⁴² ak itonwekab logoek bogol ang’wan che bo karichato aeng’ regerotin; ortinwek aeng’ che bo logoek che bo karnet age tugul ne kigireger, kotuch bagulisiechoto aeng’ bo metowek che kimi baragutab tolochik;

⁴³ ak ng’echerok taman, ak tabokwak taman che kimi ng’echerochoto;

⁴⁴ ak nyanjanato agenge ak itonwekab eik che kimi kureretab nyanjanato;

⁴⁵ ak terenik, ak kechigosiek che eechen, ak tabok che mengech; ak tuguchoto tugul che kiyachi Hiram laitoriat Solomon, eng’ gotab Jehovah, ko ki bo sugunonik che sitotin.

⁴⁶ Kiyai laitoriat tuguchoto eng’ atebwetab Jordan, eng’ ole mi menet eng’ kwenutab Sukot ak Saretan.

⁴⁷ Kibagakta Solomon karichato tugul, ama kipiman, amu ki chang’ mising’ kot: ma imuch chi konai nyigisindab sugunonik.

⁴⁸ Ak kiyai Solomon tuguk tugul che kimi gotab Jehovah: kapkorosutab tahabu, ak mesetab tahabu ne kitebe makatinikab kabartaet;

⁴⁹ ak kelyekab taisiek, kimi mutu komostab tai, komi mutu komostab katam eng’ taitab got ne bo orit, ki bo tahabu che tililen; ak taptok, ak taisiek ak kanameiywek, ki bo tahabu;

⁵⁰ ak kikombok; ak magasisiek che kitile ole lalei eng’ taisiek, ak tabok che mengechen, ak kechigosiek, ak terenik che kiibe mat, ki bo tahabu che tililen; koboto karik che namei kereiywotab kurget, che bo kereiywekab kurgotikab got ne bo orit, ole tilil mising’, ak che bo kurgotikab got, noto ko hekalut, ki bo tahabu.

⁵¹ Kiigesgei anyun boisiet tugul ne kiyai laitoriat Solomon eng’ gotab Jehovah. Ak kiib Solomon tuguk che kiga kotaban Daudi kwandanyi, kobwa go, feda ak tahabu, ak tuguk che kiboisie, ak konde ole kindoi konoraik eng’ gotab Jehovah.