1 LAITORINIK 5 - BUKUIT NE TILIL

Konamegei Solomon ak Hiram, laitoriatab Turo

¹ Kiiyokto Hiram laitoriatab Turo otwogikyik koba oldab Solomon; amu kiga kogas kele kigiil inendet koek laitoriat kogeer kwandanyi: amu kichamei Hiram Daudi.

² Ak kiiyokto Solomon bik koba oldab Hiram kolenji,

³ Ingen ile kima imuch baba Daudi koteekyi got kainetab Jehovah Kamuktaindennyi amu lugosiek che kiga yiem inendet, che kimi komosta age tugul, kot konde Jehovah ichek keldebesaikab kelyekyik.

⁴ Ago nguno ko kogogona Jehovah Kamuktaindennyu kamuung’et eng’ komosta age tugul; mami bunyot anan ko kiy ne ya ne biitu.

⁵ Ak keero, kaabegechi ateekyi got kainetab Jehovah Kamuktaindennyu, ko u ye kimwachi Jehovah baba Daudi, kolenji, Tun teekyin kainennyu got wering’ung’ ne tun andoi kotebe ng’echerennyu ne bo laitornatet, kogeerin.

⁶ Ara anyun, ng’at keebwa ketikab taragonik eng’ Lebanon; ak kobois otwogikyuk ak otwogiguk; ak agonin melektab otwogiguk che kemwa: amu ingen inye ile mami chi eng’ achek ne ingen koeb ketik ko u Sidonik.

⁷ Ak kingogas Hiram ng’alekab Solomon, kobaibait mising’ kole, Ingilos Jehovah rani, ne kiigochi Daudi werit ne ng’om koboi bororioni o.

⁸ Ak kiiyokto Hiram bik koba oldab Solomon kolenji, Kaagas ng’alek che keyokwa: kayae ko u mageng’ung’ tugul agobo baoinikab taragonik, ak baoinikab biribiriet.

⁹ Ibu otwogikyuk kochorgei eng’ Lebanon kobwa nyanjet: ak aratyine si koba kobun nyanjet kot koit ole imwawa, ak amwaite kitiach eng’ yoto, si inyo iib: ak isuldawa magennyu igochi amitwogik bikab gonnyu.

¹⁰ Kiigochi anyun Hiram Solomon baoinikab taragonik, ak baoinikab biribirinik, ko u magennyi tugul.

¹¹ Ak kiigochi Solomon Hiram kerutik elfusiek tiptem che bo nganok koek amitwogikab gonnyi, ak kerutik tiptem che bo mwanik che tililen: kiigochi anyun Solomon Hiram ko u noto kenyit age tugul.

¹² Ak kiigochi Jehovah Solomon ng’omnatet, ko u ye kiiarorji; kimi kalyet eng’ kwenutab Hiram ak Solomon; ak kiyai tuwai arorutiet.

¹³ Ak king’at Solomon kekwei bik eng’ Israel tugul; ak murenik che kiging’at kiyum ko ki bik elfusiek sosom.

¹⁴ Ak kiiyokto koba Lebanon, bik elfusiek taman eng’ arawet age tugul kochunchun; kimi Lebanon arawet agenge, komi ga eng’ arawek aeng’: ak kibou Adoniram bichoto.

¹⁵ Ak kitinyei Solomon bik elfusiek tamanwogik tisab che kilaisei, ak elfusiek tamanwogik sisiit che kiebisiei eng’ tulonok;

¹⁶ ko ma boto kiptainik che eechen che bo Solomon che kiindochin boisiet, ko ki elfusiek somok ak bogol somok, che kibou bik che kiyaei boisiet.

¹⁷ Ak king’at laitoriat, ak kiwai koik che eechen, koik che bo kamanutiet ne o, si koteege lumeiywotab got koik che kigiwai.

¹⁸ Ak kiyai koichato teegikab Solomon ak teegikab Hiram ak Gebalik, ak kichob baoinik ak koik koteege got.