1 LAITORINIK 3 - BUKUIT NE TILIL

Koleweni Solomon ng’omnatet

¹ Ak kiyaigei Solomon koek tilionut ak Parao laitoriatab Misri, ak kiitun cheptab Parao, ak komut konyo nganasetab Daudi, kot koges teeksetab gonnyi, ak gotab Jehovah, ak irimet ne kiyiem Jerusalem.

² Ago kienyei bik tiseiywek eng’ komoswek che tororen, amu kima ko mi go ne kiga kiteekyi kainetab Jehovah agoi betusiechoto.

³ Ak kicham Solomon Jehovah, kowendote ng’atutikab Daudi kwandanyi; ago kienyei tiseiywek ak kobeelei nyamdutik eng’ komoswek che tororen.

⁴ Ak kiwa laitoriat Gibeon kwo koeny tiseiywek eng’ oloto; amu ki toror yoto, ole o: kiigoito Solomon kagochinoik elfut che kibeelei eng’ kaptisisionoto.

⁵ Kimong’ji Jehovah Solomon eng’ Gibeon eng’ karuotitoet kemoi: ak kile Kamuktaindet, Som kit ne imache agonin.

⁶ Ak kile Solomon, Kiiyachi otwogindeng’ung’ Daudi baba mieindo ne o, ko u ye kiwendote taing’ung’ eng’ imanit, ak eng’ imanda, ak eng’ lititindab muguleldo eng’ inye; ak kiigonorji inendet mieini o, amu kiigochi inendet werit kotebe ng’echerennyi ne bo laitornatet, ko u ra.

⁷ Ak nguno anyun, ee Jehovah Kamuktaindennyu, kiiyai otwogindeng’ung’ koek laitoriat kogeer Daudi baba: ago ane, ko ta ko a lakwet ne ming’in; mangen ole amandoitoi ak ole among’undoi.

⁸ Ak mi otwogindeng’ung’ kwenutab biguk che kiilewen, bik che chang’, che magimuchi kiit anan ko kerar amu chang’indo.

⁹ Igochi anyun otwogindeng’ung’ muguleldo ne tinyei kaguiyet si koruokyi biguk, si kobiit abesio ne mie ak ne ya; amu ng’o anyun ne imuchi koruokyi bororioning’ung’et toogunot?

¹⁰ Ak kiibaibai Kiptaiyat ng’olyondonoto, amu kisom Solomon kiito.

¹¹ Ak kilenji Kamuktaindet inendet, Amu kaisom kii, ama isomjige isob keny; ama isomjige magornatosiek, ama isom kebar buniguk; ago kesomjige kaguiyet ibesie kiruoget;

¹² keero, kaayai ko u ng’olyondeng’ung’; keero, kaagonin muguleldo ne ng’om, ak kotinyei kaguiyet; ne kitomo kobiitu age ne ogerge, ama kobiitu age ne ogerge eng’ let.

¹³ Ak kaagonin agine kit ne ma isom, magornatosiek ak teegisto, ne mabiitu eng’ laitorinik ne ogergeitu, eng’ betusieguk tugul.

¹⁴ Ak ngot iwendote ortinwekyuk, irib kayomisutikyuk, ak ng’atutikyuk, ko u ye kiwendote Daudi kwandang’ung’, atesun anyun kochang’ait betusieguk.

¹⁵ Ak kigos Solomon, ak keero, ki karuotitoet: ak kinyo Jerusalem, ak kotonon eng’ taitab moinget ne bo arorutietab Jehovah, ak kogoito kagochinoik che kibeelei, ak kogoito kagochinoikab kalyet, ak koyachi igorta otwogikyik tugul.

¹⁶ Kibwa anyun ole mi laitoriat kwonyik aeng’ che ki chepkugonik, kotononio eng’ tainnyi.

¹⁷ Ak kile kwondo age, Ee kiptaiyandennyu, kimenye ak kwonyi got agenge; ak kiasich lakwet kemi ak inendet eng’ goyoto.

¹⁸ Ak eng’ betutab somok ko kaasigisie, kosigis kwonyi agine: ak kigimi tuwai; kima kemi ak too eng’ go, kobate achege aeng’ eng’ go.

¹⁹ Ak kime lakwetab kwonyi kemoi, amu kisieb.

²⁰ Ak king’eet kemoi kwen, ak komut werinnyu eng’ ye koami kota konuuchi otwogindeng’ung’ ne chepto, ak komonji tegennyi, ak konde lakwennyi ne kagome tegennyu.

²¹ Ak kangang’eet karon ale agochi lakwet kochunchun, ogeero, kaga kome; ago kangageer komie karon, ogeero, ko ma werinnyu, ne kigasich.

²² Ak kile ne bo aeng’, Achicha; ni kogome ko wering’ung’ ak ni sobei ko werinnyu. Kitiiyo ko u noto anyun eng’ taitab laitoriat.

²³ Kile anyun laitoriat, Mwaei ni kole, Werinnyu ni sobei, ak wering’ung’ ni kogome: kolen age, Achicha; kogome wering’ung’, werinnyu ni sobei.

²⁴ Ak kile laitoriat, Oibwa rotwetab chok. Ak kigiipchi laitoriat rotwetab chok.

²⁵ Yeityo kole laitoriat, Opcheune aeng’ lakwet ne sobei, si ogochi kebeber kwondo age, ogochi kebeber kwondo age.

²⁶ Yeityo kong’alalji kwondo ne ki nenyi lakwet ne sobei, laitoriat, amu kirir mo agobo werinnyi, ak kile, Ee kiptaiyandennyu, Igochi inendet lakwani sobei, amat ibar. Ago kile age, Mabunjina, ama bunjinin; pchei.

²⁷ Kiwol anyun laitoriat kole, Ogochi ne bo tai lakwani sobei, mat obar: amu inendet ko kamennyi.

²⁸ Ak kigas Israel tugul kiruoget ne kiiruoch laitoriat; ak kiiywei laitoriat: amu kigeer kole mi ng’omnatetab Kamuktaindet eng’ inendet, si kobiit koruoch.