1 LAITORINIK 20 - BUKUIT NE TILIL

Koterteri Ahab Ben-hadad, laitoriatab Suria

¹ Ak kiiyum Ben-hadad laitoriatab Suria lugennyi tugul: ak kimi laitorinik sosomu ak aeng’ koboto inendet, ak mbartanyisiek ak karisiek: ak kitogosta kwo koyiem Samaria, ak kobargei ak nganasanato.

² Ak kiiyokto bik koba oldab Ahab laitoriatab Israel, agoi nganaset, ak kolenji inendet, Kamwa Ben-hadad ko u ni, kole,

³ Chechuk fedaisieguk ak tahabusieguk; chechuk agichek osotiguk koboto lagoguk, agot che miachen mising’.

⁴ Ak kiwol laitoriatab Israel kole, A neng’ung’, koboto tuguk tugul che atinye, ko u mwaeng’ung’, kiptaiyandennyu, ee laitoriat.

⁵ Ak kibwa bichoto kogeny ak kolenji, Kamwa Ben-hadad ko u ni kole, Koayogu bik iman kobwa oldang’ung’, ale, Igona fedaisieguk, ak tahabusieguk, ak osotiguk, ak lagoguk;

⁶ ago ayogun otwogikyuk kobwa oldang’ung’ mutai ko negit saini, ak kocheng’so eng’ gong’ung’, ak gorikab otwogiguk; ak konam kit age tugul ne igeere ko kararan, ak koib.

⁷ Koguur anyun laitoriatab Israel boisiek tugul che bo emet, ak kolenji, Asomok ale, obwat ak ogeer ole cheng’doi chichi yaitiet: amu koiyok bik komach osotikyuk, ak lagokyuk, koboto fedaisiekyuk, ak tahabusiekyuk; amaete.

⁸ Ak kilenji boisiek tugul ak bik tugul inendet, Amat igas, anan icham.

⁹ Kilenji anyun bichoto bo Ben-hadad, Oba omwachi kiptaiyandennyu laitoriat, olenji, Ayaei tuguk tugul che kigeyogu eng’ tai kemwachi otwogindeng’ung’: ago mamuchi ayai kii. Kiba anyun bichoto kiga kiyok, ak koipchi inendet ng’olyot kogeny.

¹⁰ Ak kiiyokto Ben-hadad bik koba oldanyi, kolenji, Ingoyaiywa cheptalelisiek ko u noto, ak kotes, ngot koyam temburiekab Samaria komugutat eng’ eunekwak bik che isubwa.

¹¹ Ak kiwol laitoriatab Israel kole, Olenji inendet, Amat kochoigei inendet ne kermenegei karik, ko u inendet ne ireegu karik.

¹² Ak kingogas Ben-hadad ng’alechuto, koeeisei, inendet ak laitorinik, komi emaisiek, komwachi otwogikyik, kolenji, Otetge. Kotetgei anyun kobokyi nganaset.

¹³ Ak ogeero, kinyo maotiot ole mi Ahab laitoriatab Israel, ak kole, Kamwa ko u ni Jehovah, kole, Tos kaigeer tuiyoni o? Keero, andoi eung’ung’ rani si inai ile a Jehovah.

¹⁴ Ak kile Ahab, Eng’ ng’o? Ak kile, Kamwa ko u ni Jehovah, kole, Eng’ eunekab murenik che bo bounikab emotinwek. Kole anyun, Ng’o ne tau boriet? Ak kiwol kole, Inye.

¹⁵ Koyum anyun neranik che bo emotinwek, ak kiek bogol aeng’ ak sosom ak aeng’: ak kingobata koyum bik tugul, lagok tugul che bo Israel, ki elfusiek tisab.

¹⁶ Ak kimanda bet kwen. Ago kieeisei Ben-hadad eng’ emaisiek orit, kot ko kiga kobogit, inendet ak laitorinik, laitorinik sosom ak aeng’ che kitoret inendet.

¹⁷ Ak kiindo murenikab bounikab emotinwek; ak kiiyok Ben-hadad bik ak kimwachi bichoto inendet kolenji, Bwanei bik che bunu Samaria.

¹⁸ Ak kile, Ngot kobwanei kalyet, onam; ak ngot kobwanei luget, onam kora.

¹⁹ Komanda anyun bichoto eng’ nganaset, murenikab bounikab emotinwek, ak luget ne kiisubi ichek.

²⁰ Ak kibar chi age tugul chito; ak kimwei Suriek, ak kion Israel ichek: ak kichilil Ben-hadad laitoriatab Suria eng’ mbartanyit koboto bik che kilanyei mbartanyisiek.

²¹ Ak kimanda laitoriatab Israel, ak kobar mbartanyisiek ak karisiek, ak kobar Suriek eng’ baret ne o.

²² Ak kinyo maotiot korik ole mi laitoriatab Israel, ak kolenji inendet, Ui igimitge, ak ibwat ak igeer kit ne iyae: amu nyonei laitoriatab Suria kotogosu obargei, ko kabek kenyini.

²³ Ak kilenji otwogikab laitoriatab Suria inendet, Cheptalelinywa ko cheptalelitab tulonok; ki kimen anyun kosiirech amu noto: ago ongebarge ak ichek eng’ warenget, ak kegimegitu iman kesiir ichek.

²⁴ Ak iyai kii; iste laitorinik, chi age tugul eng’ ye kami, ak inde kiptainik kogeer ichek:

²⁵ ak iit lugeng’ung’, ko u luget ne kogebarenen, mbartanyit eng’ mbartanyit, ak karit eng’ karit: si kebarge ak ichek eng’ warenget, si kegimegitu iman kesiir ichek. Ak kigasyi ichek ng’alekwak, ak kiyai ko u noto.

²⁶ Ak kingogesgei kenyit, koyum Ben-hadad Suriek, ak kotogosta kwo Apek, kobargei ak Israel.

²⁷ Ak kigiyum lagokab Israel, ak kigochi amitwogik, ak kobokto kobargei ak bichoto: ak kiteech nganaset eng’ tainywa koigei akwotisiek aeng’ che tutigin che bo arekab ng’oror; ago kinyi Suriek emet.

²⁸ Ak kinyo chitab Kamuktaindet korik ak kong’alalji laitoriatab Israel, kole, Kamwa Jehovah ko u ni, kole, Amu komwa Suriek kole, Jehovah ko cheptalelitab tulonok, ma cheptalelitab atebwosiek; andoi anyun eung’ung’ tuiyoni o tugul, si onai ole a Jehovah.

²⁹ Ak kiteech kotokyin ak komeng’is eng’ betusiek tisab. Ak eng’ betutab tisab kotuiyogei lugosiek kobargei; ak kibar lagokab Israel eng’ betut agenge Suriek elfusiek bogol che kibunei kelyek.

³⁰ Ago kimwei che king’et koba Apek, koba nganaset; ak kilulji inatut bik elfusiek tiptem ak tisab che kiga ng’et. Ak kimwei Ben-hadad kwo nganaset, kwo got ne bo orit.

³¹ Ak kilenji otwogikyik inendet, Keero, kigegas kele laitorinikab gotab Israel ko laitorinik che tinyei rirenetab ge. Kisomin anyun kele kilaach kuniok kegermenege, ak kinde rogoosiek metowekyok, ak kemande kebe ole mi laitoriatab Israel: tamangab kosor sobondang’ung’.

³² Kogermenengei anyun kuniok, ak konde rogoosiek metowekwak, ak kobwa ole mi laitoriatab Israel, ak koba kolenji, Kamwa otwogindeng’ung’ Ben-hadad kole, Asain ale, bagakta asob. Ak kile, Ta kosobei? Inendet ko tupchennyu.

³³ Kogeer bichoto komie, si kosib konai ngo kimwaei iman; ak kimwa bichoto kole, Ng’etab komet Ben-hadad. Kole anyun, Oba omutu inendet. Komong’ anyun Ben-hadad konyo ole mi inendet: ak kilenji kolong’ karit barak.

³⁴ Ak kilenji Ben-hadad inendet, Aweegun nganasok che kiga ibe kwandanyu kwandang’ung’; ak iyachinige ortinwek eng’ Damasko, ko u ye kiyai kwandanyu eng’ Samaria. Ak kimwa Ahab kole, Achundoin iwe eng’ kayomisoni. Koyomisgei anyun ak inendet, ak kochunda kwo.

Kosib kemwau meetab Ahab

³⁵ Ak kilenji chito age ne bo werikab maotik chitab kokwennyi eng’ ng’olyotab Jehovah, Asomin ale, bira. Ak kiesio chichoto kobir inendet.

³⁶ Kolenji inendet anyun, Amu ma igas it kutitab Jehovah, ko keero, ne bo iwendi kityo eng’ yu ami, kobarin ng’etundo. Ak kingo kata kwo, eng’ yoto kotuiyo ak ng’etundo, ak kobar ng’etundo inendet.

³⁷ Yeityo konyor chito age, ak kolenji, Asomin ale bira. Ak kibir chichoto inendet, kibir ak koguoten inendet.

³⁸ Kwo anyun maotiondonoto, ak korib laitoriat eng’ oret, ak kowalgei koek age, kotuge togennyi angennyi ne kere metit.

³⁹ Ak ye kisiirtoi laitoriat, koguur inendet laitoriat, kolenji, Kiwa otwogindeng’ung’ kwenutab luget, ak keero, kiwelelgei chito kwo taban, ak komutwa chito, ak kole, Rib chichi: ngot kobiit kiy kot kochilil, kogeeri sobondang’ung’ sobondanyi, anan iyoogu talentait agenge ne bo feda.

⁴⁰ Ak ye kichirjireni otwogindeng’ung’, koboisiei kowendi yu ak kowendi yu, kochilil. Ak kilenji laitoriatab Israel inendet, Egu ko u noto kiruogeng’ung’. Kaitil inyege ko u noto.

⁴¹ Ak kiinem angennyi ne kere metit, eng’ togennyi kochokyi; ak kinai laitoriatab Israel inendet kole ki bo inendet maotik.

⁴² Ak kilenji inendet, Kamwa Jehovah ko u ni, kole, Amu koichunde eng’ eung’ung’ chito ne koga atabanji ng’emisiet, kogeeri anyun sobondang’ung’ sobondanyi, ak kogeer biguk bikyik.

⁴³ Ak kiwa gonnyi laitoriatab Israel eng’ muguleldo ne nyigis, ak konerechi, ak kiit Samaria.