1 LAITORINIK 18 - BUKUIT NE TILIL

¹ Ak kingobata betusiek che chang’, konyonji ng’olyotab Jehovah Elija, eng’ kenyitab somok, kolenji, Ui iborjige Ahab; si ayokyi ng’ony ropta.

² Ak kiwa Elija koborjigei Ahab. Ak ki ng’wan rubet eng’ Samaria.

³ Ak kiguur Ahab Obadia, ne kibou gonnyi. (Kiiywei Obadia Jehovah mising’:

⁴ amu ye kiga bar Jesebel maotikab Jehovah, komut Obadia maotik bogol, ak kouny kobeate konom eng’ kebenet, ak kobae ichek makatinik ak beek.)

⁵ Ak kilenji Ahab Obadia, Ui bun emet, ui kondametusiek tugul che bo beek, ak kererusiek tugul: tamangab kenyoru suswek ak kesoru mbartanyisiek ak nyumbusiek kosopcho, si mabegunenech tuguk tugul che kiyagi.

⁶ Kopchechigei anyun emet si kobun kogeerot: kwo Ahab oret age inegei, kwo Obadia oret age inegei.

⁷ Ak kingomi oret Obadia, kotuiye Elija: ak kiinyit inendet, ak kobutyi ng’ony, ak kole, Inye nito, kiptaiyandennyu Elija?

⁸ Ak kiwolji kolenji, Ane. Ui mwachi kiptaiyandeng’ung’, ilenji, Keero, mi yu Elija.

⁹ Ak kile, Nee tengek ne koayai, si imach inde otwogindeng’ung’ eutab Ahab, kobaran?

¹⁰ Ko u ye sobei Jehovah Kamuktaindeng’ung’, ko mami bororiet anan ko bounatet, ne tomo koyokto bik kiptaiyandennyu koba kocheng’in: ak ngo mwa kole, Mami oli, kolenjin bounatanato anan ko bororionoto koyosio kole, mageerin.

¹¹ Ak ilen nguno, Ui, mwachi kiptaiyandeng’ung’ ilenji, Keero, mi yu Elija.

¹² Ak ye awe eng’ yu imi, komutin Tamirmirietab Jehovah ole mangen; ak ye awe amwachi Ahab, amanyo konyorun, kobara: ago ane otwogindeng’ung’, aiywei Jehovah koboch ko a ming’in.

¹³ Tos ma kimwaun inye kiptaiyandennyu kit ne kiayai ye kingobar Jesebel maotikab Jehovah, kele kiauny bik bogol che bo maotikab Jehovah kobeate konom eng’ kebenet age tugul, ak abai ichek eng’ makatinik ak beek?

¹⁴ Ak imwae nguno ile, Ui mwachi kiptaiyandeng’ung’, ilenji, Keero, mi yu Elija: si kobara.

¹⁵ Ak kile Elija, Ko u ye sobei Jehovah ne bo lugosiek ne atonone tainnyi, aborjinige iman inendet rani.

Kotuitos Elija ak Ahab. Koterteri Elija tisiikab Baal amu saennyi

¹⁶ Kwo anyun Obadia kotuiyo ak Ahab, ak komwachi inendet: ak kiwa Ahab kotuiyo ak Elija.

¹⁷ Ak kingogeer Ahab Elija, kolenji Ahab inendet, Inye ni chichi, kiinyalil Israel?

¹⁸ Ak kiwol kole, Ma anyalil Israel; inye ne kiinyalil, ak gotab kwandang’ung’, amu kiomete ng’atutikab Jehovah, ak kiisub Baal.

¹⁹ Iyokte anyun nguno kiyumwa Israel tugul kobwa tulwetab Karmel, koboto maotikab Baal bogol ang’wan ak konom, ak maotikab Asera bogol ang’wan, che amisie mesetab Jesebel.

²⁰ Koguur anyun Ahab lagokab Israel tugul, ak koyum maotik tugul koba tulwetab Karmel.

²¹ Ak kinyo Elija korikyi bik tugul, ak kolenji, Otebe eng’ kabwatutik aeng’ kot kotianit? Ngot ko Jehovah ko Kamuktaindet, osub inendet: ago ngot ko Baal, osub anyun inendet. Ak ma wolji bik inendet ng’olyo.

²² Kolenji anyun Elija bik, Ane, anege kityo, maotiotab Jehovah ne a ng’etunot; ago maotikab Baal ko bogol ang’wan ak konom.

²³ Ingogonech anyun ichek kirugik aeng’; ak ingolewenjigei kirgit agenge, ak kotonaton komengegitu, ak konde baragutab kwenik, amat konde mat kotobon ng’ony: ak aeny kirgit age, ak ande baragutab kwenik, amandoi mat kotobon ng’ony.

²⁴ Ak oguur kainetab kanamweng’wong’, si aguur kainetab Jehovah: ak Kamuktaindet ne wolu eng’ mat, koek noto Kamuktaindet. Ak kiwol bik tugul kole, Kemwa ne mie.

²⁵ Ak kilenji Elija maotikab Baal, Olewenjige kirgit agenge, ak osib oeny; amu o chang’; ak oguur kainetab kanamweng’wong’, ago monde mat kotobon ng’ony.

²⁶ Ak kinam kirgit ne kiga kigochi, ak koeny, ak koguur kainetab Baal kong’eete karon kot koit bet kwen, kolen, Ee Baal, kasech. Ago kima biit tweguno, anan kobiit woluno age tugul. Ak kitorombenso komuut kapkorosut ne kiga kiyai.

²⁷ Ak ki eng’ bet kwen, kochot Elija ichek, kolenji, Owaach inne: amu inendet ko cheptalelit; abere ibwati tuguk, anan ko kawa ui, anan ko mi rutoi, anan abere inuuchi, ak kanyol king’eet.

²⁸ Ak kiwaach eng’ kutit ne o, ak kotilgei eng’ rotok ak ng’otwek, ko u biteenywa, kot kochagirirta korotik.

²⁹ Ak kingoweek asis komaotenso agoi sait ne kigoitoe kagochinet; ago kima biit tweguno, anan ko chi age tugul ne wolu, anan ko chi age tugul ne kasei.

³⁰ Ak kilenji Elija bik tugul, Origu ole ami; ak kirikta bik tugul ole mi inendet. Ak kiteech kogeny kaptisisietab Jehovah ne kiga kobutok.

³¹ Ak kinam Elija koik taman ak aeng’, ko u koitetab ortinwekab werikab Jakobo, ne kinyonji ng’olyotab Jehovah, kolenji, Egu kaineng’ung’ Israel.

³² Ak kiteege kaptisisiet koichato eng’ kainetab Jehovah; ak kibal keringet koyieme kaptisisiet, ne yamegei ak kerutik aeng’ che bo keswek.

³³ Ak kiinde kwenik kotet, ak kotonaton kirgoto, ak konde baragutab kwenik. Ak kile, Onde beek terenik ang’wan, ak orong’ji kagochinet ne kibeelei, ak kwenik.

³⁴ Ak kile, Orong’ji kogeny ne bo aeng’; ak kirong’ji kogeny ne bo aeng’. Ak kile, Orong’ji kogeny ne bo somok, ak kirong’ji ne bo somok.

³⁵ Kiitenden beek koyiem kaptisisiet; ak kiinde beek keringet agine konyi.

³⁶ Ak eng’ sait ne kigoitoe kagochinet, konyo maotiot Elija korik, ak kole, Ee Jehovah, Kamuktaindetab Abraham, ak ko bo Isak, ak ko bo Israel, ingonaak rani kele i Kamuktaindet eng’ Israel; ak a otwogindeng’ung’ ak konaak kele kayai tuguchuto tugul eng’ ng’olyondeng’ung’.

³⁷ Kasa, ee Jehovah, kasa, si kobiit konai bichu kole, inye Jehovah, ko i Kamuktaindet, ak konai kole koiweech mugulelwekwak koweek kogeny.

³⁸ Kochorgei anyun matab Jehovah; ak kobeel kagochinet ne kibeelei, koges, ak kwenik, ak koik, ak ng’ung’unyek, ak kobeel beek che kimi keringet kobek.

³⁹ Ak kingogeer bik tugul, kobutyi ng’ony: ak kole, Jehovah ko Kamuktaindet; Jehovah ko Kamuktaindet.

⁴⁰ Ak kilenji Elija ichek, Onam maotikab Baal; amat ongochilil agot agenge. Kinam anyun ichek: ak kiimut Elija kochorgei kererutab Kison, ak kobarji yoto.

⁴¹ Ak kilenji Elija Ahab, Togoste, iamisie ak ieeise; amu agase tuletab ropta ne o.

⁴² Kitogosta anyun Ahab kwo koamis ak koeeiso. Ak kitogosta Elija kwo Karmel barak; ak kiing’uruk, ak konde metinnyi kwenutab kutung’oikyik.

⁴³ Ak kolenji otwogindennyi, Togoste nguno, igeer yun bo nyanjet. Ak kitogosta, ak kogeer, ak kole, Mami kiy. Ak kile, Ui kogeny konyiil tisab.

⁴⁴ Ak eng’ banda ne bo tisab, kole, Keero, ng’eetei boldet eng’ nyanjet ne ming’in ne te eutab chito. Ak kile, Togoste ilenji Ahab, Chopge, ak ichortege si magerin ropta.

⁴⁵ Ak ne matianit, kotuuit kipsengwet eng’ bolik, ak usonet, ak kirobon ropta ne o. Ak kilany karit Ahab, kwo Jesreel.

⁴⁶ Ak kimi eutab Jehovah koboto Elija, ak kigermengei, ak kolabat kondoe Ahab kwo ole kimandoe kebendi Jesreel.