1 LAITORINIK 14 - BUKUIT NE TILIL

Kiruokyin gotab Jeroboam. Meetab Jeroboam

¹ Kimian eng’ betusiechoto Abija weritab Jeroboam.

² Ak kilenji Jeroboam osotiondennyi, Asomin ale, ng’eet ak iwalge si ma kinain kele i osotiotab Jeroboam: ak iwe Silo; keero, mi oloto maotiot Aija, ne kimwa agobo ane kole aegu laitoriat abou bichu.

³ Ak iib makatinik taman, ak makatinik che mengechen, ak chuboit ne mi kumiat, ak iwe oldanyi: si komwaun kit ne biitu eng’ lakwani.

⁴ Ak kiyai ko u noto osotiotab Jeroboam, king’eet, kwo Silo, ak kiit gotab Aija. Kimata kogeerei kiy; amu kiga kogor eng’ osindanyi.

⁵ Ak kilenji Jehovah Aija, Keero, nyonei osotiotab Jeroboam konyo koteebenen agobo werinnyi; amu miani: imwachini ko u ni ak ko u ni: amu ye it go, koyaegei koigei kwondo age.

⁶ Ak kingogas Aija cheetab kelyekyik, ko kait kurgat, kolenji, Nyo go, osotiotab Jeroboam; amu nee si iyaige iige age? Amu kagiyokwa aibun ng’alek che bichien.

⁷ Ui, ilenji Jeroboam, Kamwa ko u ni Jehovah, Kamuktaindetab Israel; kiaeetin eng’ bichu, ak ayain iegu bounindetab bikyuk Israel,

⁸ ak areb bounatet eng’ gotab Daudi, ak agonin: ago maiige otwogindennyu Daudi, ne kirib ng’atutikyuk, kosuba eng’ muguleldanyi komugul, koyai ne mie eng’ tainnyu;

⁹ ago koiyai yaitiet kosiir bik tugul che kiindounenen, ak koiwe iyachige kanamonik, ak che kitanyi, itacha, ak iwirta awa let eng’ inye:

¹⁰ noto anyun, ogeero, aipchini yaitiet gotab Jeroboam, ak aistoe Jeroboam lakwet age tugul ne werit, ne kigigerji go, ak ne wendoti eng’ Israel, ak abukte kogestagei gotab Jeroboam, ko u ye ng’uei chito ng’atatek, kot kogestagei.

¹¹ Chita age tugul ne bo Jeroboam ne meei eng’ nganaset, koamei sesenik; ak ne meechin timin, koamei taritik che bo barak: amu kagomwa Jehovah.

¹² Ng’eet ui gong’ung’: ak ye itiech kelyeguk nganaset, komee lakwet.

¹³ Ak korirji Israel tugul inendet, ak kotub; amu inendet inegei ne bo gab Jeroboam ne wendi kererit: amu koginyorji inendet kit ne mie eng’ Jehovah, Kamuktaindetab Israel, eng’ gotab Jeroboam.

¹⁴ Ak tun lewenjingei Jehovah laitoriat ne bou Israel, ne tun barei gotab Jeroboam kogesgei eng’ betunoto: ago nee? Agot eng’ betunoto.

¹⁵ Kong’eete nguno kobarei Jehovah Israel, ko u ye kitumdumi morong’iot eng’ beek; ak kotut Israel eng’ emoni kararan, ne kiigochi kwanisiekwak, ak koseer kosiir Ainet bitonin; amu kiyachigei Aserik, kotach Jehovah.

¹⁶ Ak metoi Israel amu tengekwogikab Jeroboam, che kiyai inendet, che kiibeete Israel si koyai tengekto.

¹⁷ Ak king’eet osotiotab Jeroboam, ak kwo, ak kiit Tirsa: ak kingoit ye bo tugatukyetab kurgetab got, kome lakwet.

¹⁸ Ak kitub Israel tugul inendet, ak koririo agobo inendet, ko u ng’olyotab Jehovah, ne kimwa eng’ otwogindennyi Aija maotiot.

¹⁹ Ak boisionik che ng’etunotin che bo Jeroboam, ak ole kiyaita luget, ak ole kilaitoranda, ogeero, kigisirji bukuitab ateptab betusiek ne bo laitorinikab Israel.

²⁰ Kilaitoran Jeroboam kenyisiek tiptem ak aeng’: ak kiru koboto kwanisiekyik, ak kilaitoran Nadab werinnyi kogeer inendet.

Kolaitorani Reoboam eng’ Juda

²¹ Kilaitoran Reoboam weritab Solomon eng’ Juda. Ki bo Reoboam kenyisiek artam ak agenge ye kitau kolaitorani, ak kilaitoran kenyisiek taman ak tisab eng’ Jerusalem, nganaset ne kilewen Jehovah eng’ ortinwek tugul che bo Israel, si konde kainennyi yoto; ak kigiguure kametab Reoboam Naama che bo Amonik.

²² Ak kiyai bikab Juda ne ya eng’ taitab Jehovah; kiigochi inendet ng’etkonda eng’ tengekwogikwak kosiir tugul che kiga koyai kwanisiekwak.

²³ Amu kiteekyigei agichek komoswek che tororen, ak tolochik, ak Aserik, eng’ tulwet age tugul ne koi, ak eng’ ketit kel eng’ ketit age tugul ne tuon;

²⁴ ak kimi sodomik agichek: ak kiyai tuguk tugul che kiwechei che bo bororiosiek che kiga koon Jehovah eng’ taitab lagokab Israel.

²⁵ Ak eng’ kenyitab mut ne bo laitoriat Reoboam, kotogos Sisak laitoriatab Misri konyo kobar Jerusalem:

²⁶ ak kiib konoraikab gotab Jehovah, koboto konoraikab gotab laitoriat; kiib tugul: ak kiib long’onik tugul che bo tahabu che kiyai Solomon.

²⁷ Ak kiyai Reoboam long’onik che bo sugunonik kogeere choto, ak kogochi kiptainikab ribik, che kiribei kurgetab gotab laitoriat.

²⁸ Ak ye kiwendi laitoriat gotab Jehovah, ko kiibei ribindet long’onichoto, yeityo koweech kobwa gotab ribik.

²⁹ Ak boisionik che ng’etunotin che bo Reoboam, ak tuguk tugul che kiyai, ko tos ma kisirji bukuitab ateptab betusiek ne bo laitorinikab Juda?

³⁰ Ak kicham komi luget eng’ kwenutab Reoboam ak Jeroboam kotugul.

³¹ Ak kiru Reoboam koboto kwanisiekyik, ak kigitupchi nganasetab Daudi koboto kwanisiekyik; ak kigiguure kamet Naama cheptab Amonik. Ak kilaitoran Abijam werinnyi kogeer inendet.