1 LAITORINIK 12 - BUKUIT NE TILIL

Koegu Reoboam laitoriat

¹ Ak kiwa Reoboam Sekem: amu kigabwa Israel tugul Sekem koyai inendet koek laitoriat.

² Ak kingogas Jeroboam weritab Nebat agobo noto, (amu kita komi Misri, ole kiga mwechi komwee laitoriat Solomon, ak kimenyei Jeroboam Misri,

³ ak kiiyokto keguur inendet;) konyo Jeroboam ak tuiyet tugul ne bo Israel, ak kong’alalji Reoboam kolenji,

⁴ Kiyai kwandang’ung’ choginnyo kouuit: ara anyun, yai kowisisit otisiet ne uui ne ki bo kwandang’ung’, ak choginnyi ne nyigis ne kiindeech, si keotin.

⁵ Ak kilenji, Oba betusiek somok, si tun obwa kogeny. Koba anyun bik.

⁶ King’alal laitoriat Reoboam ak boisiek che kicham kotonondos eng’ taitab Solomon kwandanyi, ye kita kosobei, kolenji, Nee ng’olyot ne omwawa ne awoljini bichu?

⁷ Ak kimwachi kolenji, Ngot iegu otwogindetab bichu ra, ak iot ichek, ak iwolji ichek, ak imwachi ng’alek che miach, koegu anyun ichek otwogiguk koigeny.

⁸ Ago kibagakta ng’alekab boisiek che kimwachi inendet, ak kong’alal ak neranik che kinerjindos tugul, che kitonondos eng’ tainnyi.

⁹ Ak kolenji ichek, Nee ng’olyot ne omwae okwek si kobiit kewolji bichu, kong’alalwa kolenja, Yai kowisisit chogit ne kiindeech kwandang’ung’?

¹⁰ Ak kimwachi neranik che kinerjindos ak inendet, kolenji, Imwachini ko u ni bichu kong’alalun, ilenjini, Kiyai kwandang’ung’ choginnyo konyigisit, ago iyaiywech kowisisit; imwachini ko u ni, ilenjini, Nyigis mornennyu ne ming’in ne bo eut kosiir suetab baba.

¹¹ Ak ko u ye kigonok baba chogit ne nyigis, atese choging’wong’: kiitigonenok baba kipcharitisiek, ago atigonenok melmelwek.

¹² Kobwa anyun Jeroboam ak bik tugul ole mi Reoboam eng’ betutab somok, ko u ye kiga ng’at laitoriat, kole, Obwa eng’ betutab somok.

¹³ Ak kiwolji laitoriat bik eng’ koromnatet, ak kometo ng’alekab boisiek che kiga mwachi inendet;

¹⁴ ak kong’alalji ichek ko u ye kiga mwachi neranik, kolenji, Kiyai baba choging’wong’ konyigisit, ago atese choging’wong’: kiitigonenok baba kipcharitisiek, ago atigonenok melmelwek.

¹⁵ Ma kasyi anyun laitoriat bichoto, amu ki kit ne kibunu Jehovah, si kobiit kogimit ng’olyondennyi, ne kimwa Jehovah eng’ Aija Silonindet, komwachi Jeroboam weritab Nebat.

Konamegei bororiosiek tamanu koboto Jeroboam kandoindenywa, ak kotoitos ak Reoboam

¹⁶ Ak kingogeer Israel tugul kole, mata kogasyi laitoriat ichek, kowolji bik laitoriat, kolenji, Nee kebeberta ne ketinye eng’ Daudi? Ama kitinye borotet eng’ weritab Jesii: oba emaisiekwok, ee Israel: rib gong’ung’ anyun Daudi. Koba Israel anyun emaisiekwak.

¹⁷ Ago kilaitorane Reoboam lagokab Israel che kimenyei nganasokab Juda.

¹⁸ Kiiyokto anyun Reoboam Adoram, ne kibou aisurut; ak kilach Israel tugul inendet eng’ koik, kome. Ak kichakta laitoriat Reoboam kolany karinnyi, komwei kwo Jerusalem.

¹⁹ Kongelelji anyun Israel gotab Daudi agoi ra.

²⁰ Ak kingogas Israel tugul kole kogoweek Jeroboam, koyokto keguur konyo tuiyet, ak koyai inendet koek laitoriat koboi Israel tugul: ama biit ne kiisub gotab Daudi, kobate oretab Juda kityo.

²¹ Ak kingoit Reoboam Jerusalem, koyum gotab Juda tugul, koboto oretab Benjamin, murenik elfusiek bogol ak tamanwogik sisiit che bo luget, che kigilewen, kobargei ak gotab Israel, koweekyi bounatet Reoboam weritab Solomon.

²² Ago kinyonji ng’olyotab Kamuktaindet Semaia chitab Kamuktaindet, kolenji,

²³ Ng’alalji Reoboam weritab Solomon, laitoriatab Juda, ak got tugul ne bo Juda ak ne bo Benjamin, ak bik che kong’et, ilenji,

²⁴ Kamwa Jehovah ko u ni kole, Amobe otogoste, anan obargei ak tupchosiekwok lagokab Israel: ingoweek chi tugul kwo gonnyi; amu bunwa kii. Kogas it anyun ichek ng’olyotab Jehovah, ak koweek koba, ko u ng’olyotab Jehovah.

Tengektab Jeroboam

²⁵ Koteech anyun Jeroboam Sekem eng’ emetab tulonok ne bo Epraim, ak komeny oloto; ak kiwa eng’ oloto kwo koteech Penuel.

²⁶ Ak kile Jeroboam eng’ muguleldanyi, Weekyingei anyun nguno bounatet gotab Daudi:

²⁷ ngot koba bichu kotogosta kogoito tiseiywek eng’ gotab Jehovah eng’ Jerusalem, koweekyingei mugulelwekab bichu kogeny kiptaiyandenywa, ne inendet ko Reoboam laitoriatab Juda; ak kobara, ak koweekyigei Reoboam laitoriatab Juda.

²⁸ Koruoch anyun laitoriat ak kotany itonwek aeng’ che bo moek che bo tahabu; ak kilenji ichek, Uui kot eng’ okwek obe otogoste Jerusalem; ogeer kanamonikwok-o, ee Israel, che kiimutwak otogosu eng’ emetab Misri.

²⁹ Ak kiinde age Bet-el, konde age Dan.

³⁰ Ak kiek kiito tengekto: amu kiba bik kogutuny eng’ taitab age tugul, agot eng’ Dan.

³¹ Ak kiteech gorikab komoswek che tororen, ak kilewen tisiik eng’ bik tugul, che kima ko bo werikab Lawik.

³² Ak king’at Jeroboam keyai igorta eng’ arawetab sisiit eng’ betutab taman ak mut, ko u igorta ne kimi Juda, ak kitogosta ye mi kapkorosut; kiyai ko u noto eng’ Bet-el, koeng’ji moek che kiga kotany: ak kiinde Bet-el tisiik che bo komoswek che tororen che kiga yai.

³³ Ak kitogosta kwo kapkorosut ne kiga koyai eng’ Bet-el, eng’ betutab taman ak mut, eng’ arawetab sisiit, eng’ arawet ne kiga chob inegei eng’ muguleldanyi, ak king’at keyai: kiinde igorta ne bo lagokab Israel, ak kotogosta kwo kapkorosut, kobeel nyamdutik.