1 JOHANA 2 - BUKUIT NE TILIL

¹ Lagokyuk che mengech, asirwok tuguchu, si moyai tengek. Ak ngot koyai chi tengek, ketinye Ne saiywech Kwanda, inendet Jesu Kristo ne bo imanda:

² ak inendet tiseiywot ne bo tengekwogikyok; ago ma bo tengekwogikyok kityo, ago bo ng’ony komugul agine.

Toogune yamdaet kasetab it

³ Ak kingen eng’ ni kele kingen inendet, ngot keribe ng’atutikyik.

⁴ Inendet ne mwaei kole, Angen inendet, ama ribei ng’atutikyik, ko kiplembechwet, ama mi imanit eng’ inendet;

⁵ ago inendet ne ribei ng’olyondennyi, ko kageyai koek ne igesunotgei chamnyetab Jehovah eng’ inendet. Kingen eng’ nito kele kimi eng’ inendet:

⁶ inendet ne mwaei kole menyei eng’ inendet konyoljin agine kowendot ko u ye kiga wendot inendet.

⁷ Chamanichu, masirwok ng’atutiet ne leel, ago ng’atutiet ne bo keny ne kiotinye koboch taunet: ng’atutionoto bo keny ko ng’olyot ne kiogas.

⁸ Ak kogeny, asirwok ng’atutiet ne leel, ng’olyot ne iman eng’ inendet ak eng’ okwek, amu siirtoi mesundeito, ak kagoluu lapkeiyet ne bo iman.

⁹ Inendet ne mwaei kole mi eng’ lapkeiyet, ak kowechei ne tupcho, komi eng’ mesundeito agoi nguno.

¹⁰ Inendet ne chamei ne tupcho komenyei eng’ lapkeiyet, ama mi kanagutiet eng’ inendet.

¹¹ Ago inendet ne wechei ne tupcho komi eng’ mesundeito, ak kowendoti eng’ mesundeito, ama naei ole wendi, amu kagotuuch mesundeito konyekyik.

¹² Asirwok lagochu mengech, amu kigenyoiywok kaat tengekwogikwok amu kainennyi.

¹³ Asirwok kwanisiechu, ama kionai inendet ne kimi koboch taunet. Asirwok murenju, amu kioterter inendet ne ya. Kaasirwak lagochu mengech, amu ongen Kwanda.

¹⁴ Kaasirwak kwanisiechu, amu ongen inendet ne kimi koboch taunet. Kaasirwak murenju, amu o kimen, ak komenyok ng’olyotab Jehovah, ak kioterter inendet ne ya.

¹⁵ Amocham ng’ony, anan tuguk che mi ng’ony. Ngot kocham chi ng’ony ko mami chamnyetab Kwanda eng’ inendet.

¹⁶ Amu tuguk tugul che mitei ng’ony, magetab borto, ak magetab konyek, ak menotetab sobondo, ko ma bo Kwanda, ago bo ng’ony.

¹⁷ Ak siirtoi ng’ony, koboto magennyi: ago inendet ne yaei magetab Jehovah kotebyei koigeny.

Kiteechin bik agobo kirindoikab Kristo

¹⁸ Lagochu, ni sait ne bo let: ak ko u ye kiogas kele tun nyonei kirindoindetab Kristo, agot nguno ko kagobiit kirindoikab Kristo che chang’; kingen eng’ noto kele nito sait ne bo let.

¹⁹ Kimandoi eng’ olinnyo, kima ko chechok; amu nda ki chechok, ta kitebyei kobotech: ago kiba, si kobiit kotook kele kima ko chechok tugul.

²⁰ Ak kigiilak eng’ Inendet ne Tilil, ak ongen okwek tugul.

²¹ Ma asirwak amu mongen imanit, kasirwak amu ongen, amu mami lembeita ne mong’une imanit.

²² Ng’o kiplembechwet? Ma inendet ne esioi kole Jesu ko Kristo? Nito ko kirindoindetab Kristo, inendet ne esioi Kwanda ak Werit.

²³ Age tugul ne esioi Werit, ko matinyei noto Kwanda: inendet ne ng’anyei Werit kotinyei Kwanda agine.

²⁴ Ak okwek anyun, ingomenyok noto kiogas koboch taunet. Ngot komenyok noto kiogas koboch taunet, omenye ak okwek eng’ Werit ak eng’ Kwanda.

²⁵ Ak ni arorutiet ne kiiaroruech inendet, noto ko sobondab koigeny.

²⁶ Kaasirwak tuguchu agobo ichek che machei kobeetok.

²⁷ Ak okwek anyun, komenyok kaiilet ne kionyoru eng’ inendet, ak manyol konetak chi; ago ko u ye inetok kaiilennyi agobo tuguk tugul, ak ko bo iman, ma lembech, ak ko u ye kigonetak, omeny inendet.

²⁸ Ak nguno anyun, lagochu mengech, omeny inendet; si ye tun kaging’any inendet, kesich nyiganatet, ama kililani eng’ tainnyi eng’ nyonunennyi.

²⁹ Ngot ongen ole bo imanda inendet, ongen ole age tugul ne yaei imanda ko kigesich agine eng’ inendet.