1 ATEPTAP PEETUUSYEK 28 - BUKUIT NE TILIL

Kong’alaljin Daudi kandoikab bik

¹ Ak kiiyum Daudi bounik tugul che bo Israel, koboto bounikab ortinwek, ak kiptainikab kweanaik che kiboisiechin laitoriat eng’ ripset, ak kiptainikab elfusiek, ak kiptainikab bogolwogik ak bounik che kibou tuguk tugul che bo laitoriat, ak che bo werikyik, koboto kiptainik, ak bik che kimen che nyigonen, bik tugul che kimen che nyigonen, kobwa Jerusalem.

² Ak kitonon anyun laitoriat Daudi, ak kole, Ogasa, tupchosiekyuk, ak bikyuk: kimi muguleldanyu ateech got ne imuung’e moingetab arorutietab Jehovah, ak ng’echeret ne tebe kelyekab Kamuktaindennyo; ak kiga achob tuguk che bo teekset.

³ Ago kilenja Kamuktaindet, Meteekyini got kainennyu, amu i chitab luget, ak kiitumde korotik.

⁴ Ago kilewena Jehovah, Kamuktaindetab Israel, eng’ got komugul ne bo kwandanyu aek laitoriat eng’ Israel koigeny: amu kilewen Juda koek bounindet; ak eng’ gotab Juda, ne gotab kwandanyu, ak kibaibaitunena eng’ werikab kwandanyu; si koyaa aek laitoriat eng’ Israel tugul:

⁵ ak kilewen Solomon werinnyu eng’ werikyuk tugul, (amu kigogona Jehovah werik che chang’,) kotebe ng’echeret ne bo laitornatetab bounatetab Jehovah koboi Israel.

⁶ Ak kimwawa kole, Teechei Solomon wering’ung’ gonnyu ak seremusiekyuk: amu kialewen inendet koek werinnyu, ak aegu kwandanyi.

⁷ Ak agimit bounatennyi koigeny, ngot koyai kotugul ng’atutikyuk ak kiruogutikyuk, ko u rani.

⁸ Ara anyun, orib ak ocheng’ ng’atutik tugul che bo Jehovah Kamuktaindeng’wong’, eng’ taitab Israel tugul, tuiyetab Jehovah, kogasei Kamuktaindennyo: si kobunjok emoni kararan, ak obagakyi lagokwok koek borotenywa koigeny.

⁹ Nai anyun inye Solomon werinnyu, Kamuktaindetab kwandang’ung’, ak iboisiechi inendet eng’ muguleldo ne igesunotgei, ak eng’ kabwatutik che tinyei chamet: amu isiachi Jehovah mugulelwek tugul, ak koguitos kabwatutik tugul che bo metit: ngot icheng’ inendet, inyoru: ago ngot imete inendet, kowirtoin koigeny.

¹⁰ Ripge anyun; amu kigolewenin Jehovah iteech got ne bo ole tilil: kimitu anyun, ak iyai.

¹¹ Yeityo kogochi Daudi Solomon werinnyi kergeindab keterut, ak ne bo gorikab hekalunoto, ak ne bo ole kigonore tuguk, ak ne bo gorik che bo barak, ak ne bo gorik che bo orit, ak ne bo keruetab rirenet:

¹² ak kergeindab tuguk tugul che kiiborji Tamirmiriet, agobo seremusiekab gotab Jehovah, ak gorik tugul che kigiyieme, che bo ole kigonorisie eng’ gotab Kamuktaindet, koboto che bo ole kigonore tuguk che itabanotin:

¹³ ak kiigochi kogeny pcheutikab ripsosiekab tisiik ak Lawik, ak ne bo boisiet tugul ne bo otisietab gotab Jehovah, ak ne bo tuguk tugul che kiboisie eng’ gotab Jehovah:

¹⁴ che bo tahabu ngepiman, ko bo tugukab tahabu, che bo tuguk tugul che bo boisiet age tugul; che bo feda, ko bo tuguk tugul che bo feda ngepiman, che bo tuguk tugul che bo boisiet age tugul:

¹⁵ ak kiigochi kogeny ole te tahabu che bo kelyekab tait ngepiman, ak che bo taisiekyik, che bo tahabu ngepiman, che bo keldo age tugul ne bo tait, ak che bo taisiekyik: ak che bo kelyekab taitab feda, che bo feda ngepiman ko bo keldo age tugul ne bo tait, ak che bo taisiekyik, ko u boisietab keldo age tugul ne bo tait:

¹⁶ ak tahabu ngepiman, ko bo mesosiekab makatinikab kabartaet che bo meset age tugul; ak feda che bo mesosiekab feda:

¹⁷ ak karik che kirutune banyek, ak tabok, ak kikombok, che bo tahabu che tililen: ak che bo tabokab tahabu ngepiman ko bo tabet age tugul; ak che bo tabokab feda ngepiman, ko bo tabet age tugul:

¹⁸ ak che bo kapkorosut ne kibeele nyamdutik ko bo tahabu che tililen ngepiman: ak tahabu che bo kergeindab karit, choto kerubisiek che kiuito kebebaikwak, si kouur moingetab arorutietab Jehovah.

¹⁹ Kigigona aguiyo chuto tugul eng’ sirutik kobun eutab Jehovah, boisionik tugul che bo kergeini.

²⁰ Ak kilenji Daudi Solomon werinnyi, Kimitu nyiganitu, ak iyai: ameiywei, anan itoptoben: amu mi koboten Jehovah Kamuktaindet, inendet Kamuktaindennyu: mabagaktoin, anan kometen agoi kogesgei boisiet tugul ne bo otisietab gotab Jehovah.

²¹ Ak keero, mi ripsosiekab tisiik ak Lawik, agobo otisiet tugul ne bo gotab Kamuktaindet: ak mi koboten eng’ boisiet age tugul chi age tugul ne chamei ak ko utat, agobo otisiet age tugul; kogeny, kase it ng’atutieng’ung’ komie kiptainik ak bik tugul.