1 ATEPTAP PEETUUSYEK 19 - BUKUIT NE TILIL

Kobaregei Israel ak Amonik ak Suriek

¹ Ak kingobata nito, kome Nahas laitoriatab lagokab Amon, ak kilaitoran werinnyi kogeer inendet.

² Ak kile Daudi, Ayachini ne mie Hanun weritab Nahas, amu kiyaiywa ne mie kwandanyi. Kiiyokto anyun Daudi bik koba kogaigai inendet, amu kwandanyi. Ak kiit otwogikab Daudi emetab lagokab Amon oldab Hanun, koba kogaigai inendet.

³ Ago kilenji bounikab lagokab Amon Hanun, Ibwati ile konyiti Daudi kwandang’ung’, kot koyogun kagoigoik? Tos ma bwa otwogikyik kobwa ole imi, kosiach, ak kobar ak kosegei emet?

⁴ Kinam anyun Hanun otwogikab Daudi, ak konem tamnokwak, ak kotil ngoroikwak komut kwenut, kobochit ngorook, ak kounda koba.

⁵ Koba anyun bik alak, komwachi Daudi kit ne kogiyachi bichoto. Ak kiiyokto bik kotorokta; amu kiililandos bichoto mising’. Ak kilenji laitoriat, Otebi eng’ Jeriko agoi kobityo tamnokwok, ye ibata, obwa.

⁶ Ak kingogeer lagokab Amon kole kagoyaagitu icheget eng’ Daudi, koyokto Hanun ak lagokab Amon talentaisiek elfut agenge che bo feda koale karisiek ak bik che lanyei mbartanyisiek eng’ Mesopotamia, ak Aram-maaka, ak Soba.

⁷ Koaljigei anyun karisiek elfusiek sosom ak aeng’, koboto laitoriatab Maaka ak bikyik; che kibwa koteech taitab Medeba. Ak kiiyumgei lagokab Amon komong’ eng’ nganasokwak, kobwa koyai luget.

⁸ Ak kingogas Daudi, koyokto Joab, ak luget tugul ne bo murenik che kimen.

⁹ Ak kibwa lagokab Amon, ak kotet luget eng’ ormarichetab nganaset: ak kimi laitorinik ichegei warenget che kiga bwa.

¹⁰ Ak kingogeer Joab kole kagetet luget agobo inendet eng’ tai ak let, kokwei murenik che kigilewen che bo Israel, ak kotet kobargei ak Suriek.

¹¹ Ak kiinde bik che kiga ng’et, eutab Abisai, ng’etab kamet, kotetgei ichek si kobargei ak lagokab Amon.

¹² Ak kile, Ngot kogimegitu Suriek kotertera, itoreta: ago ngot kogimegitu lagokab Amon koterterin, atoretin.

¹³ Nyiganitu, ngeegu murenik agobo bikyok, ak nganasokab Kamuktaindennyo: ak ingoyai Jehovah ko u ye keerei kole mie.

¹⁴ Kirikta anyun Joab ak murenik che kimi ak inendet koba luget kobargei ak Suriek; ak kimwee inendet.

¹⁵ Ak kingogeer lagokab Amon kole kagomwei Suriek, komwei agichek eng’ taitab Abisai ng’etab kametab Joab, ak kiba nganaset. Kinyo anyun Joab Jerusalem.

¹⁶ Ak kingogeer Suriek kole kagiterter ichek eng’ taitab Israel, koyokto bik, koba koguur Suriek che kimi Ainet bitonin, koboto Sopak kiptaiyatab lugetab Hadareser ne kiindoe ichek.

¹⁷ Ak kigimwachi Daudi; ak kiiyum Israel tugul, ak kilandae Jordan, ak kiche ichek, ak kotet luget kobargei ak ichek. Ak kingo kagotet Daudi luget si kobargei ak Suriek, koyai ichek luget ak inendet.

¹⁸ Ak kimwee Suriek Israel; ak kibar Daudi Suriek elfusiek tisab che bo karisiek, ak murenik elfusiek artam che bunei kelyek, ak kobar Sopak kiptaiyatab luget.

¹⁹ Ak kingogeer otwogikab Hadareser kole kagiterter ichek eng’ taitab Israel, koyai kalyet ak Daudi, ak koot inendet; mata kocham Suriek kotoret lagokab Amon kogeny agoi.