1 ATEPTAP PEETUUSYEK 15 - BUKUIT NE TILIL

Keibu Moinget konyo Jerusalem

¹ Ak kiteekyigei Daudi gorik eng’ nganasetab Daudi; ak kichob ole tebe moingetab Kamuktaindet, ak kolumdochi moingonoto emait.

² Yeityo komwa Daudi kole, Manyol koib chi age tugul moingetab Kamuktaindet, kobate Lawik ichegei: amu kigolewen Jehovah ichek koib moingetab Kamuktaindet, ak koboisiechi inendet koigeny.

³ Ak kiiyum Daudi Israel tugul eng’ Jerusalem, si koib moingetab Jehovah kotogos konyo komostanyi, ne kiga kochopchi inendet.

⁴ Ak kiiyum Daudi werikab Aron koboto Lawik:

⁵ che bo werikab Kohat: ne o ko ki Uriel, ak tupchosiekyik bogol ak tiptem;

⁶ che bo werikab Merari; ne o ko ki Asaia, ak tupchosiekyik bogol aeng’ ak tiptem:

⁷ che bo werikab Gersom: ne o ko ki Joel, ak tupchosiekyik bogol ak sosom:

⁸ che bo werikab Elisapan: ne o ko ki Semaia, ak tupchosiekyik bogol aeng’;

⁹ che bo werikab Hebron: ne o ko ki Eliel, ak tupchosiekyik tamanwogik sisiit:

¹⁰ che bo werikab Usiel; ne o ko ki Aminadab, ak tupchosiekyik bogol ak taman ak aeng’.

¹¹ Ak kiguur Daudi Sadok ak Abiatar, tisiik, ak kiguur Lawik, Uriel, Asaia, Joel, Semaia, Eliel, ak Aminadab,

¹² ak kilenji ichek, O kandoikab gorikab kwanisiek che bo Lawik: otililge okwek ak tupchosiekwok, si oibu moingetab Jehovah, Kamuktaindetab Israel, kotogos, konyo komosta ne koachopchi.

¹³ Amu kima oib okwek yuginye, kobar anyun Jehovah Kamuktaindennyo chito eng’ achek, amu kima kicheng’ inendet ko u ye kiging’at.

¹⁴ Kotililgei anyun tisiik ak Lawik si koib moingetab Jehovah, Kamuktaindetab Israel, kotogos.

¹⁵ Ak kiib lagokab Lawik moingetab Kamuktaindet eng’ tigigoikwak eng’ ketik che kiibe, ko u ye kiga ng’at Musa ko u ng’olyotab Jehovah.

¹⁶ Ak kimwachi Daudi che eechen che bo Lawik kolewen tupchosiekwak tienik, ak tuguk che kibutei, che choto ko kibugandinik, ak ketubosiek ak sanisiek che bo sugunonik che kibirei kebut kocheiyo mising’, ak kotienso eng’ kagasetab ge.

¹⁷ Kolewen anyun Lawik Heman weritab Joel; ak eng’ tupchosiekyik, Asap weritab Berekia; ak eng’ werikab Merari tupchosiekwak, Etan weritab Kusaia;

¹⁸ ak kimi koboto ichek tupchosiekwak che kirubei ichek eng’ etunatet, Sekaria, Ben, Jaasiel, Semiramot, Jehiel, Uni, Eliab, Benaia, Maseia, Matitia, Elipeleu, Mikneia, Obed-edom ak Jeiel, ribikab kurgotik.

¹⁹ Tienik anyun ko ki Heman, Asap, ak Etan, che kitinyei sanisiekab sugunonik che kibirei kocheiyo mising’;

²⁰ koboto Sekaria, Asiel, Semiramot, Jehiel, Uni, ak Eliab, Maaseia, ak Benaia, che kitinyei kibugandinik, che bo cheetab Alamot;

²¹ ak Matitia, ak Elipeleu, Mikneia, Obed-edom, Jeiel, ak Asasia, che kibutei ketubosiek che bo cheetab Seminit, si kondochi.

²² Ak kibou Kenania tienwogik, ne o eng’ Lawik: kiineti bik tiendo, amu ki utat inendet.

²³ Ak ki ribikab kurgetab ole kimi moinget, Berekia ak Elkana.

²⁴ Ak kiguut iriagok eng’ taitab moingetab Kamuktaindet, Sebania, ak Josapat, ak Netanel, Amasai, Sekaria, Benaia, ak Elieser, tisiik: ak ki ribikab kurgetab ole kimi moinget, Obed-edom ak Jeia.

²⁵ Kwo anyun Daudi ak boisiekab Israel, ak kiptainik che kibou elfusiek, koba koib eng’ kagasetab ge moingetab arorutietab Jehovah kotogos eng’ gotab Obed- edom:

²⁶ ak kingo kagotoret Kamuktaindet Lawik che kiibei moingetab arorutietab Jehovah, koeny kirugik tisab ak mengichik tisab.

²⁷ Ak kiilaachi Daudi ngoriet ne bo katanit ne kararan, koboto Lawik tugul che kiibei moinget, ak tienik, ak Kenania kandoindetab tienik: ak kiilaachi Daudi epod ne bo katanit.

²⁸ Koib anyun Israel tugul moingetab arorutietab Jehovah kotogos kobolyonu kogasonugei, ak koguutonu iriagok, ak kobironu sanisiek che bo sugunonik, ak kobutonu kibugandinik ak ketubosiek.

²⁹ Ak kingoit moingetab arorutietab Jehovah nganasetab Daudi, koiit Mikal cheptab Saul eng’ tirisiet, kogeer laitoriat Daudi kourereni ak kogasigei; ak kisas inendet eng’ muguleldanyi.