1 ATEPTAP PEETUUSYEK 13 - BUKUIT NE TILIL

Kiutoi Moinget eng’ Kiriat-jearim

¹ Ak king’alal Daudi ak kiptainikab elfusiek ak che bo bogolusiek, king’alal ak kandoindet age tugul.

² Ak kilenji Daudi tuiyet tugul ne bo Israel, Ngot ogeere ole mie eng’ okwek, ak ngot kobunu Jehovah Kamuktaindennyo, ongiyokte tupchosiekyok che kang’et eng’ komosta age tugul ne mi emet tugul ne bo Israel, che mi tisiik ak Lawik koboto ichek nganasokwak che tinyei emotinwek che kiyagisie, koyumgei kobwa ole kimi:

³ ak ongeibu kogeny moingetab Kamuktaindennyo konyo ole kimi: amu kima kiteeb kiy eng’ moingonoto eng’ betusiekab Saul.

⁴ Ak kiiyan tuiyet tugul kole yaei ko u noto: amu kimieit kioto eng’ taitab bik tugul.

⁵ Koyum anyun Daudi tuiyet tugul ne bo Israel, koboch Sihor ainetab Misri kot koit ole kimandoe Hamat, koib moingetab Kamuktaindet, eng’ Kiriat-jearim.

⁶ Ak kitogosta Daudi koboto Israel tugul, koba Baala, yoto ko Kiriat-jearim, ne ki bo Juda, koba koib eng’ oloto moingetab Kamuktaindet, Jehovah ne tebe kerubisiek, ne kimwaitoe Kainanato.

⁷ Ak kiib moingetab Kamuktaindet eng’ karit ne kita ko leel, komong’ eng’ gotab Abinadab: ak kikweri karinato Usa ak Ahio.

⁸ Ak kiureren Daudi koboto Israel tugul eng’ taitab Kamuktaindet eng’ kimnatenywa tugul: eng’ tienwogik, ak ketubosiek, ak kibugandinik, ak sugutisiek che mengechen, ak sanisiek che bo sugunonik che kibirei, ak iriagok.

⁹ Ak kingoit ruanyut ne kiborse ne bo Kidon, koyogoito eunnyi Usa kole kotii moinget; amu kiterteriot eik.

¹⁰ Ak kilalyo nerebekab Jehovah agobo Usa, ak kibar inendet, amu kiiyogoito eunnyi konam moinget; ak kimechi yoto eng’ taitab Kamuktaindet.

¹¹ Ak ma cham Daudi, amu kibar Jehovah Usa: ak kiguure yoto Peres-usa, agoi ra.

¹² Ak kiiywei Daudi Kamuktaindet betunoto, kole, Amuktoi ano aib moingetab Kamuktaindet konyo ga ole ami?

¹³ Ko mata koib anyun Daudi moinget kwo oldanyi eng’ nganasetab Daudi, ago kiimaas kwo gotab Obed-edom Gitindet.

¹⁴ Ak kitebi moingetab Kamuktaindet eng’ gab Obed-edom arawek somok: ak kiiberur Jehovah gotab Obed-edom, ak tuguk tugul che kitinyei.