yuta 1 - buacou seiso no faeva esvʉtʉ

¹ zou soskuskunu to iesu kilisto a'o, ohaesa to yakovu ci yuta. te'o tmopsʉ ta tengami ho faeni to ohsila epeiya ho eoho'a to hamo, yunsou to 'ayumona to himngonghi to hamo, a'vinano noa noʉt'ʉci to iesu kilisto ci cou.

² tesi'sola yotngasi no himcocoveoi, soanono ho himngonghi to hamo na muu.

meknuyu ci lema'cohio

³ ngohia ci maananghia, la'u conino mici tengami muu ho yue'engha 'emo yaa natʉ'ca to to'usnu a'to ci a'a'ausna, at'inghi os'o yainca no koyu'u nte ʉmnʉ hoci'u aupcieva mi'usni muu ho eucufna, poa a'cʉ'cʉnʉ nomio to isic'o i'nʉska aucunva pa'cohivneni ta masisinto to hamo ci singkoo ho ehtothomʉ.

⁴ maica homo yaa 'oha einu ci cou mo aasoe ohtuvho ta taicoto, boemi to eknon'a 'omo yaa mengumi ci e'e to hamo ho efʉnga 'o kuzo ci peipeis'ausnahe, lahe hopsʉpseni 'o moc'o cihi ci tmuoteuyuna - nooe'ocato ci iesu kilisto. ne na'no noana'o, ohsicula eyoca to seiso te asansano tiou no patvovei 'emo maica ci cou.

⁵ imu e'vono cohivi 'e acʉcʉhʉ eni, te'oc'on'a a'cʉ'cʉna poutʉs'ʉa muu: 'o nooe'oca isi yainenu na hiasi to'usni 'o 'isolaelu ho poa momeesih'i to 'ezivuto, ataveisi isicu aapayo'a 'o o'amo tmaa'uzo ci cou.

⁶ teav'a ta'payo'a 'o mosola iachi o'te noyʉyʉcʉ, ho mongoi to isi yac'i ci matetensi, isi seo'eisi to 'auesiesi o'ate peelʉi yunga ci ekʉka ho seo'tʉneni tomo mʉ'eona ho voecʉvcʉ; isi poekotva ne ne'e to hamo, mooteo to meoino no hiesi no yʉsvʉta.

⁷ ho i'omo yone sotoma, 'omola. ho i'o cou to cum'usi ci hosa. mo totiski to mosola maica ci tensi, la smoc'ou 'o peipeis'ausnahe, fiho to peis'aʉnpʉnpʉ ci poc'ou, nomio tan'e te patvovei ho tiou no 'auesiesi o'ate afsi ci puzu. 'e hi'hioa eni te teyaineni note huthaeva tamo macicihi ci cou.

⁸ 'emo maica o'te einu ci cou teec'o totiski. na ma'cac'ou ci 'tohʉngʉhe lasi popeo'usna no peiskuisi. acaca'ia 'o iachi feango; lahe hupopotfʉnga na tonʉ to hamo, aokoe'iya 'omo yone pepe ci so'einva.

⁹ ac'ʉhʉ to tensicoo ci micialo, ne moso nomio to mcoi ci feango to moose ho yupa eehcʉvho 'o 'akuma, o'a ohsi maka seecʉ'ha yomza no aokoe'i ci e'e ho koica. isic'o yainca:

¹⁰ at'inghi 'emo maica ci cou lahe eayaezoya 'o o'aihe cohivi ci hi'hioa, totiski to yuansou ho fiho to yu'ausna ho hioa 'ote iachi meaapayo'ʉ ci hi'hioa.

¹¹ 'emo maica ci cou te ku'kuici! ihe pee'ofeihni 'omo totiski to ceonʉ to kai'in. nomio no yupasʉ, mo su'ayumonʉ to ohsi su'si to palan ci feongo no peis'epo, mais'a 'o koola ho totiski yutasufku, totiski aapapayo'ʉ.

¹² 'emo maica ci cou la no'upu ho lamu eabobonʉ la o'te koe'i ho peaknuesu, poa ca'i 'o iachi, mais'a 'o lepocengi moatʉ'nʉ inac'o iachia poa yoseʉ na bʉyohe na lahe cohivi. mais'a 'o cmʉcmʉ ho lasi peaemo'neni to poepe, ho o'te smuv'ohʉ mʉchʉ, maezo mais'a 'o o'ala mimho beahci ci evi homo hobeahcia, te tum'um'i ho poa a'sʉftonʉ oemi'mi.

¹³ i'ola h'oinveni ci lahe peipeis'ausna la mais'a 'o feosʉ to taso ci smahu ne etʉpʉ. la mais'a 'omo mongoi to ceonʉsi ci congeoha ho su'to isi ayocneni to hamo cimo mʉ'eona ho 'auesiesi voecʉvcʉ.

¹⁴ 'o 'ino ci pop'epitua ci mʉntʉ'ca to 'atamu ohsicula noana'va eyoca 'emo maica ci cou, ohsi yainca:

¹⁵ tesi yʉsvʉta 'e afu'u cou, patvovei 'ola afu'u peiskuisi ho 'oha einu ci cou; maica hola 'oha einu 'o peipeis'ausnahe, tenan'a boemi to 'oha einu ci e'e ho yutasufku to hamo.>

¹⁶ 'emo maica ci cou la asngʉcʉ eubut'u to mocmo ci cou, boh'usnu ho koicʉ to mocmo ci cou; la fiho to iachi kokuzo ci ma'konvosʉ, mo'engho tomo esvocʉ ci e'e, nomio note koa ʉmnʉ ho euteoteozu to mocmo ci cou.

engahva ho po'pa'cohivi

¹⁷ at'inghi, songohia ci maananghia, teav'ala ta'payo'a 'o nia afu'u e'e to sitoo to nooe'oca iesu kilisto.

¹⁸ ohela mi'usni muu ho yainca:

¹⁹ 'emo maica ci cou la mooyai youbobai, fiho to 'osmuhnua to yu'ausna, uk'a ci seilei.

²⁰ inacu muu, songohia ci maananghia, ntemu conino bimahtʉicʉ ta socofkoya ci singkoo, ieni to tonʉ to seilei ho 'inoli.

²¹ asngʉcʉ no'ayumonʉ to himngonghi to hamo ho yunsou, mingeovi na himcocoveoi to nooe'ocato ci iesu kilisto, pafeni no 'auesiesi nsou na muu.

²² mi'usnu tola ma'pepecvai ci cou, temula acocoveoza.

²³ pantotemu i'mi to taico to puzu ho to'usni; pantomon'a h'unasi ci cou temu acocoveoza, at'inghi te tohayo, ac'ʉhʉ to micu aaso no smoc'ou ci 'i'ihosahe ho yaeza kuzoa.

tohmomoengʉ ci 'inoli

²⁴ tesi peelʉi noʉt'ʉci to hamo na muu ho o'te poa smopcuku, poa uk'a heo'tʉ na muu, meelʉ kokaekaebʉ ho uhto tuhcu to psoevohngʉsi.

²⁵ 'emoc'o anana'o cihi ci hamo, ieni to nooe'ocato iesu kilisto ho to'usni a'to. tesi'so tanua na psoevohngʉ, mitohʉngʉ, taso, ho tonʉ, ahoi ne noana'o ac'ʉhʉ maitan'e, ac'ʉhʉ no 'auesiesi. 'aamen!