yohane 2 1 - buacou seiso no faeva esvʉtʉ

¹ zou coolo a'o; te'o tmopsʉ ta tengami ho faeni suu - noa epeiya ci miacmo'na, yaeza faeni to 'o'okosu: na muu la'u songohia ta 'tohʉngʉ. o'a la'u anovac'o ngohia muu, 'omo afu'u bohngʉ to so'emio ci cou la maezo himngonghi muu;

² maica mo yonta 'tohʉngʉto 'o so'emio, a'vinano te 'auesiesi no'upu a'to.

³ faeni'sio a'to to hamo ho ito okosi iesu kilisto na mengumi, himcocoveoi, soanono, poa conino yunsou no so'emio ho himngonghi na a'to!

so'emio ho himngonghi

⁴ mi'o na'no kaebʉ, maica os'o cohivi, ta 'ayumona ta 'o'okosu pantomo mee'ofeihni to mashʉyʉ to amopepe. yunsou to 'ayumona to so'emio.

⁵ ko'koeno, ngohia ci miacmo'na, te'o m'ene suu, teto'so yupa himngonghi. 'e os'o eyafa ma'ic'oso faeva ci mashʉyʉ, ma i'o ohtocula asonghoza tiova.

⁶ i'o os'o engha ci himngonghi 'aeno: teto asansano mee'ofeihni to mashʉyʉ to hamo. 'e ohmula asonghoza talʉi ci mashʉyʉ 'aeno: temula poa taiconeni ta h'oyunsovamu 'e mashʉyʉ eni.

⁷ botngonʉ ci totpiei micu nongabo ta hpʉhpʉngʉ ho aut'ot'ou, lahe apa'ta peecveni 'o hi'hioa to iesu kilisto ho mosola a'ʉmtʉ ohpueho ta hpʉhpʉngʉ. 'emo maica ci cou zou totpiei, la mihango to kilisto ci cou.

⁸ temu bumemealʉ niantemu o'te payo'a na ohmucula peihcʉ'hi, mate acʉcʉha nate anana'va yaa ci hnoo.

⁹ hoci panonte o'te noyʉcʉ to h'omahsʉfta to kilisto, apuyu emoszozʉ, 'aeno uk'a ci hamo ta mcoosi; i'ola tʉyʉcʉ to h'omahsʉfta, isicu elʉa 'o socofkoya ci amo ho i'o socofkoya ci oko.

¹⁰ hoci panonte uso muu, o'te epeaska 'e h'omahsʉfta eni, teavas'a tiova ho poa uhta emoomu, maezo 'ote mi'usnu ho tuayokeoi;

¹¹ maica hoci mi'usni ho tuayokeo, tec'u totiski no 'oahngʉ nola peiskuzkuzo.

pahtaveiya ci e'e

¹² mion'a man'i 'o nte'o eʉsvʉta muu, at'inghi o'a os'o 'ucia yomza ta tposʉ ho psoecʉ'ha. tata'za ho ci'u aʉlʉ uso ho baito muu, aʉlʉ mi'usnu muu ho eʉsvʉsvʉtʉ, te meelʉ a'sʉftonʉ na 'aveoveoyʉto.

¹³ 'o 'o'oko to isi epeiya ci nat'ohaesasu mi'usnu suu ho tuayokeo.