tito 3 - buacou seiso no faeva esvʉtʉ

peipeis'ausna ta sinto

¹ teko poutʉs'ʉa 'emo botngonʉ, la meo'uzo tola yaa tonʉ no tiʉt'ʉcʉ ta hpʉhpʉngʉ, tmaayaezoyʉ to lahe pashʉya, conino ae'ayocʉ peismi tomo ʉmnʉ ci hi'hioa.

² eucufna 'otela tokuzkuzo no mocmo ci cou. 'ote youbobai; la ma'popoha'o ho bunananghiya. boemi no ma'einu ci mi'ausna ho mi'usnu ta afu'u cou.

³ ne auyusi mohto la maezo nongonongo, yutasufku, eʉngcʉ; mohtola tolei to mav'ov'o ci ma'cac'ou ho ma'nou no peispak'i, yunsou to 'ayumona no ma'papak'i ho smo'eububut'u. yupania mihango.

^4-5 at'inghi, 'o nooe'oca hamoto isicu epa'teni na ma'cinghi ho himngonghisi, ieni to isi faeni to seilei ci i'momhomʉ yayo ho ito yufaeva ci toonono, cu to'usni a'to; na eni o'amos'a i'mi no pano ʉmnʉ ci lato peipeis'ausna. mamo i'mi no hiasi acocoveoza a'to.

⁶ ieni to nooe'ocato ci iesu kilisto, 'o hamo isi at'otngasa ho cohmeni ta feangoto 'o seilei;

⁷ i'mi to mengumisi, mitocu meelʉ yaa suseolʉ ci natʉ'ca 'o hamo, ho peelʉi elʉa 'o ito mingeovi ci 'auesiesi nsou.

⁸ 'e e'e eni te peelʉi taa'uzva. os'o tata'za hociko ep'opnanfa 'emo maica ci hi'hioa, ko'ko poa asno'zonʉ peismi nomo ʉmnʉ 'omo tmaa'uzo to hamo ci cou; 'emo maica ci hi'hioa mo yonghu, koa ʉmnʉ ta cou.

⁹ la yose'vi 'ola enongonongo cila yupa eehcʉvho yupa eebkocʉ tomo natʉ'ca 'o ceoceona no suezopʉ; ho i'o yupa toohcʉvho to hoolicu; 'emo maica ci hi'hioa uk'a cimo koa ʉmnʉ ta cou, uk'a ci a'a'ausnasi.

¹⁰ mi'usnu tola mooyai youbobai ci cou, la maka i'popsoha engahva, ataveisi teav'anala cumasa.

¹¹ osko cohivi, 'emo maica ci cou micu tokuzo; 'o peiskuisisi isicu soomei 'o iachi o'amo emzo.

sotavei ci eutotavei

¹² hota'u popeoskuna 'o 'atima hocieno 'o tuiciku ho poa uhta lako yoni, pnanfi na teko peelʉi ho uhne nikopoli ho baito a'o, maica mi'ocu ma'sansano no yone'e hote hosoyʉma.

¹³ la pnanfi na tonʉ ho to'usni 'o leehcʉvho ci siina ho i'o 'apolo hote ma'koyu no covnʉ, to'usni ho o'te poa auvzovzo no cuma.

¹⁴ poa aʉsvʉsvʉtʉ asno'zonʉ peislʉlʉ 'o iachito 'oahngʉ, ho poa am'amso nala tititha ta h'oyunsova; 'otela mo'ma'na'o ho uk'a a'a'ausna ci cou.

¹⁵ 'emo no'upu a'o ci cou acʉhʉ tuayokeo suu. teko mi'usnu tomo totiski 'o singkoo ci maananghia ho tuayokeo. faeni'sio muu to hamo na mengumisi!