petelo 1 1 - buacou seiso no faeva esvʉtʉ

¹ na a'o - petelo zou sitoo to iesu kilisto. te'o tmopsʉ ta tengami ho faeni ta ohsi epeiya to hamo ci mao'o'okosi: 'omo nomio no pohtutumza ho nopeaski totoefʉngʉ ta pentu, ngalatea, kapotoke, 'azia, pituini ci masisinto.

² ho mimu noa epeiya mo maino ohsi ta'eoyoca no 'tohʉngʉ to hamo, isi ieni to seilei ho meelʉ cofkoya, akoeva no te meo'uzo to iesu kilisto, a'vinano noa cofkoya to hmuyusi. tesi'sola at'otngasa pafi no mengumi, soanono to hamo na muu!

yaansou ci ta'usni

³ teto 'aveoveoyʉ to amohamo to nooe'oca iesu kilistoto! i'mi to uk'a noca'cʉ'hi ci himcocoveoisi, ieni to mcoi ho smoevovei to iesu kilisto, pafeni a'to 'emo faeva ci nsou, poa yaa yoayokeo ci ta'usni a'to.

⁴ ho ticngiha na ohsi teongasneni ta mao'o'oko to hamo ci ʉm'ʉmnʉ ne pepe; 'e ʉm'ʉmnʉ eni o'ate kuzo, o'ate ca'i, o'ate toapayo'ʉ,

⁵ te faeni ta mimu maica i'mi no tmaa'uzo to hamo ho noa noʉt'ʉci no meoino tonʉsi ci cou, poa elʉaneni muu 'o isicu ayoca ho i'o te esmi ci to'usnu ho tac'u nouhpuhpusi 'e lekisi.

⁶ i'mi tan'e. temu kokaekaebʉ, maitan'e e'vonon'a yontamo mav'ov'o ci hʉsvʉta, nenusino ten'a akameosʉ tiou no 'atutumio;

⁷ 'emo maica ci oho sucaefiza 'ateeno ko'ko soomei ho mimu asansano yaa mahtʉicʉ ci singkoo. ac'ʉhʉ to tenala kuzo ci king 'alaeno hmoi to puzu; na singkoomu mo na'nohe pepe to king, te h'unano tiou no hʉsvʉta, teeno peelʉi tohmomoengʉneni, taotofsi'i, einva ho tac'u esmi na hiesi no aopa'to 'o iesu kilisto.

⁸ e'vono o'a ohmula aiti 'o iesu, at'inghi imu ngohia; e'vono o'aimu aiti maitan'e, at'inghi imu taa'uzva. mimu yaa o'ate peelʉi engha no e'e cimo uk'a noca'cʉ'hi ci kokaekaebʉ;

⁹ maica ho mimu seolʉa no tiou to beahci to singkoo, 'aeno to'usni na piepiyamu.

¹⁰ ec'ʉha ta to'usnu tan'e, 'o mayoyongensa mohcula yaa asansana ci hia biebimi ho eseita, a'vinano eyoca 'emo natʉ'ca to tasila pafeni muu to hamo ci mengumi.

¹¹ ho ihe eseiseita, te cohivi na tesi pa'cohivneni ta 'tohʉngʉhe to piepiya to kilisto - 'aeno eoyoca 'o kilisto hote tiou no 'atutumio, atavei te elʉ no psoevohngʉ ci a'a'ausna - tena esmi ho homna, yono mo mainenu ci a'a'ausna na tasi hia esmi.

¹² 'o hamo isi poa cohivneni to eyongensa, na hiahe yaahioa o'a ihe hioaneni 'e iachi, ma ihe hioaneni muu. 'o ohela maeengha ci hi'hioa, maitan'e isicu ieni tola yaahioa to fukuin, noe'ocʉ to tonʉ tomo i'mi ne pepe ci seilei, hocu psoecʉ'ha muu; 'emo maica ci hi'hioa, ac'ʉhʉ to tensi ma ohe yaeza 'ucia asansana!

socofkoya ci h'oyunsova

¹³ ko'koeno, temula ae'ayocʉ na 'tohʉngʉ, conino etngou, nala ta'usni la a'sʉftona toveineni no tasi pafeni ci mengumi ho tena aopa'to 'o iesu kilisto.

¹⁴ temu meo'uzo to hamo, teav'a poa eahafneni no ma'konvosʉ, mais'a ne mohmun'a nongonongo ne auyusi.

¹⁵ 'omo eyoho'ʉ muu ci hamo mo socofkoya; ta lamu afu'a hi'hioa te aa'pucva yaeza poa socofkoya.

¹⁶ yainca to seiso:

¹⁷ holamu 'inoli, lamu yainca amo 'ola ieni no la peipeis'ausna, boemi no conci svʉta ho yʉsvʉta 'e cou ci hamo; homo maica, ta hiesi ho mimun'a nouchichipi ta hpʉhpʉngʉ ntemu einu to hamo.

¹⁸ imu cohivi, ho mimu meelʉ i'mi to kuzo ci h'oceoceona to nia maameoi ho noa poesih'a. mo mainenu na hʉpʉezasi. ma'imo anou mais'a 'ola peelʉi payo'a na hʉpeʉezasi ci macucuma, mais'a 'oeno king ho nging.

¹⁹ maisi ieni tomo mohtoesuyu ho sopepea ci hmuyu to kilisto, mais'a 'o o'amo ake'i ca'i ci hmuyu to oko no moatʉ'nʉ.

²⁰ 'o kilisto zou ohsila ayoca epeiya to hamo ho o'amocu ohsila teyai 'e hpʉhpʉngʉ, yonta puesona ta lekisi ho nomio muu ho aopa'to.

²¹ ieni to kilisto, imu taa'uzva 'omo poa i'mi no mcoi ho smoevovei, a'vinano mofi no psoevohngʉ ci hamo; i'mi tan'e, na singkoo ho ina lamu ta'usni la miteuyunu to hamo.

²² maitan'e, maica ho mimu meo'uzo to so'emio, imucu poa acocofkoya si iachi, a'vinano lamu yaa mais'a cono feango to mocmo ci sinto, a'ʉmtʉ i'mi no taico no 'tohʉngʉ ho yupa himngonghi.

²³ mimucu i'momhomʉ yayo, o'amo i'mi tote kuzo ci tutu ho yayo, mamo i'mi to o'ate kuzo ci tutu - 'amoeno cmʉfeʉ to isi peyafa to hamo cimo yoayokeo ho 'auesiesi ci e'e.

²⁴ aʉlʉ mais'a 'o isi engha to seiso: 'e yatatiskova mo acʉhʉ mais'a 'e kukuzo, acʉcʉhʉ na taotofsi'i mo mais'a bʉvnʉ; te oemi'mi 'e kukuzo, te su'oveosʉ 'e bʉvnʉ,

²⁵ at'inghi na e'e to nooe'oca te no'auesiesi! 'e e'e eni 'aeno 'o isi psoecʉ'ha muu ci fukuin.