looma 2 - buacou seiso no faeva esvʉtʉ

yʉsvʉtʉ to hamo

¹ nanghia, ho lako eayaezoyʉ no mocmo, 'upena hoci siya suu, o'ate ahta peelʉi peu'uzva. ho ciko eayaezoyʉ no mocmo, ho totiski no mocmo na lako hioa, 'amicueno invonvo topco no kuisi.

² teto cohivi. mio emzo ho tesi yʉsvʉta to hamo 'emo peis'usnu tamo maica ci cou.

³ at'inghi'so. nanghia. 'e osko titha eayaezoyʉ no mocmo ci hi'hioa aʉlʉ 'e osko iachia hioa! mikon'asi ma'unano teko meelʉ totoefʉngʉ no yʉsvʉta to hamo?

⁴ nenusi no osko hupotfʉnga na ma'cocacni, ho luaveica to hamo? nteko cohivi mo ma'cocacni 'o hamo, maica lasi'so 'ucia poa ma'vovei suu.

⁵ at'inghi mo yameomʉ ho kʉhtosʉ si 'tohʉngʉsu, i'mi ta iachi ho m'eya asuhcu man'i ci sʉ'nova, 'amakna tiou no asuhcu ecvʉhʉ ci patvovei ho tac'u esmi na hiesi no ahmʉskʉ ho moulʉlʉ ci yʉsvʉtʉ to hamo.

⁶ maica i'o hamo tasila ieni no peipeis'ausna tamo macicihi ho eveia.

⁷ pantola apopaezumo peis'ʉ'ʉmnʉ ci cou, biebimi tomo i'mi to hamo ci so'einva, psoevohngʉ, ho o'te kuzo ci nsou; 'emo maica ci cou, tesi pafi no 'auesiesi ci nsou to hamo.

⁸ inacu 'ola ma'cachi. bʉʉpsʉpsʉ to so'emio. apuyu to'ofeihni tola 'oha moulʉlʉ ci cou. na sʉ'no ho patvovei to hamo tesi poa cmʉ'ho ta feangohe.

⁹ inala afu'u peiskuzkuzo ci cou o'ate momeesih'i no meakvo'ʉ ho 'atutumzo, auyu 'o couyutaya, atavei 'o couyafana.

¹⁰ at'inghi. 'ola afu'u popeis'ʉ'ʉmnʉ ci cou. tesi pafi no so'einva, psoevohngʉ, ho ino soanono, auyu 'o couyutaya. atavei 'o couyafana.

¹¹ maica 'o hamo. o'alasi avahvoh'una 'e cou.

¹² 'o couyafana uk'a ci hoolicu to moose, hoci peiskuisi o'ate meaapayo'ʉ no skufu to hoolicu; 'o couyutaya panto hoolicuhe, hoci peiskuisi te ieni to hoolicu ho noa yʉsvʉta.

¹³ maica na lasi yʉsvʉta to hamo ho uk'a kuisi, o'as'a inalac'o tmalʉ to hoolicu ci cou, mai'ola peis'ofeihni to hoolicu ci cou.

¹⁴ uk'a ci hoolicu to couyafana; at'inghi i'mi no yu'ausnahe hoci toseolʉ to hoolicu nala hi'hioa, e'vono uk'aci hoolicuhe, 'acueno hoolicuhe 'e iachi.

¹⁵ i'o lahe peipeis'ausna cu husansana ho isi tposi to 'tohʉngʉhe 'o isi p'enia to hoolicu. isi soomei to ʉmnʉ ci 'tohʉngʉhe ho mio emio na eni; maica ina koyuhe lasi aasvʉta koica 'e iachi, aasvʉtʉ iachi etoto'usnu.

¹⁶ ko'koeno, hoci maito os'o psoyaska ci fukuin, 'o hamo tena yono hiesi no puesona ta hpʉhpʉngʉ, ieni to kilisto iesu, mituhci 'ola nootoefʉngʉ ta 'tohʉngʉ ta cou ho yʉsvʉta.

couyutaya ho i'o hoolicu

¹⁷ homicu maica, tekocu mainenu? lako iachi tma'usnu to couyutaya, noe'ocʉ to hoolicu, maezo efnaso mainca mi'o yaa afnaso ci natʉ'ca 'o hamo.

¹⁸ mikocu tiou no mo'ma'cohio to hoolicu, cohivi na 'tohʉngʉ to hamo, yaeza peelʉi hupaevaza na ʉmnʉ ho kuzo.

¹⁹ lako iachi ma'unano zou lee'ofeihni no bʉkngʉ, zou tiskova tamo 'oyovoecʉvcʉ ci cou,

²⁰ zou lema'cohio tomo nongonongo ci cou, sensei ta yu'fafoinana. leakon'a ma'unano miko'so yaa hoolicu to moose, oskocu tʉyʉca na motposʉ ho ina so'emio.

²¹ lako pa'cohivi 'o mocmo ci cou, mainci o'alako pa'cohivi si iachi? lako pa'cohivi 'o mocmo ho yainca 'otela meo'eoi, tekoeno iachi meo'eoi?

²² lako yainca 'otela mseezo, tekoeno iachi mseezo? lako himkuzo to uacoua, tekoeno iachi meo'eoi to macucuma to vio?

²³ lako efnaso ho mainca mi'o yaa hoolicu to hamo, leakonana poa aon'oi 'o hoolicu to hamo ho aokoe'iya 'o hamo?

²⁴ yainca to seiso:

²⁵ hociko pee'ofeihni 'o hoolicu, niante yaa a'a'ausna ho miko tiou to s'e'honga; hociko pef'uhu to hoolicu, uk'ana ci tesi ake'a a'a'ausna to s'e'honga.

²⁶ yaica ci hia baito, 'emo cihi ci o'amo tiou no s'e'honga ci cou hoci mee'ofeihni to hia mashʉyʉ to hoolicu, tesis'aeno o'te tamza no mio tiou no s'e'honga to hamo?

²⁷ na muu couyutaya tehe topci no kuisi to couyafana; maica ho mimu e'vono yaa tposʉ no hoolicu, maezo tiou no s'e'honga, at'inghi imu aon'oza 'o hoolicu. 'o couyafana. e'vono o'aisi s'e'honga, at'inghi mo mee'ofeihni to hoolicu.

²⁸ a'ʉmtʉsi, siya nate tamza no a'ʉmtʉ couyutaya, a'ʉmtʉ tiou no s'e'honga ci cou? o'as'a i'omo yaa ongko no couyutaya 'o yafanahe, tiou to s'e'honga 'o feangohe ci cou.

²⁹ na a'ʉmtʉ couyutaya la ahoi no taico to 'tohʉngʉ; pateivha yainca, 'o 'tohʉngʉsi mo tiou no s'e'honga, zou hi'hioa to piepiya to hamo, o'aisi nama ieni to tposʉ to hoolicu. na ihe tiova ci tohmomoengʉ tamo maica ci cou o'amo i'mi ta cou, mamo i'mi to hamo.