kolosai 3 - buacou seiso no faeva esvʉtʉ

¹ mimucu smoe'upu smoevovei to kilisto, temula biebimi nola hi'hioa ne pepe; ne ne'e. mo yusuhngu to vhona to suoca'ha to hamo 'o kilisto.

² temu ma'mamhocni nola hi'hioa ne pepe, teav'a siyahe no 'tohʉngʉ 'ela hi'hioa ta ceoa.

³ maica ho mimucu tu'upu mcoi to kilisto, ina nsoumu isicu a'upa soʉlʉlʉa no 'ayumona to hamo.

⁴ 'o kilisto zou a'ʉmtʉmu nsou; ho tenala i'vaho aopa'to, tenamu maezo to kilisto ho i'upu aopa'to, tma'upu no psoevohngʉsi.

noana'o ho faeva ci nsou

⁵ ko'koeno, temu asansana timcoza namo 'afeo'fu'u ta feangomu cimo tma'usnu ta hpʉhpʉngʉ ci ma'konvosʉ, mais'a 'oeno smoc'ou, ma'caca'i, ma'cac'ou, kokuzo, ho i'o makonvosʉ ('e makonvosʉ zou 'oahngʉ to m'ohkuyu no uacoua).

⁶ i'mi tamo maica ci hi'hioa, na but'u to hamo 'ate ahtuo'te cmʉ'ho ta o'ala meot'ʉt'ʉcʉ ci cou.

⁷ ne auyusi mohmula maezo yunsou ta 'ayumona ta ma'konvosʉ tan'e, ho noa poa eahahafneni.

⁸ at'inghi, temu asansana antʉha 'emo maica ci hi'hioa: 'otena i'vaho yaa ma'sʉsʉ'no, pak'i, ho mihango; 'ote mo'engho nola ekuzkuzo ho ca'i ci e'e.

⁹ 'otela yupa memeknuyu, maica imucu yunga na noana'o ci a'o ho noana'o ci h'oyunsova.

¹⁰ aʉe no faeva ci a'o. 'e faeva ci a'o, isi ieni no iachisi mi'ausnasi to moso mooyai ci hamo ho ausuhca poa yufafaeva, meelʉ a'sʉftonʉ bohngʉ to hamo.

¹¹ ho isicu e'usna tan'e, 'anate i'vaha avahvoh'una na coungilisia ho couyutaya; o'anate yaa s'e'honga hocieno o'te s'e'honga. yano voveiveiyo, uafeihi, tolei hocieno couziu. 'o kilisto 'aeno acʉcʉhʉ, 'o kilisto isi nocʉcʉhi 'e acʉcʉhʉ.

¹² isi ngohia to hamo na muu, epeiya muu ho ta'okoa. ko'koeno, temula yaa himcocoveoi, himngonghi, ma'einu, ma'cocacni ho luaveica ci 'tohʉngʉ.

¹³ hocila yaa yupa ep'ʉcʉ la conino yupa peteozu, yupa peteongaso; mo mainenu na lasi hia peteongasa muu to nooe'oca, tela maezo mainenu na temu hia peteongaso no mocmo ci cou.

¹⁴ ta acʉcʉhʉsi tan'e, la sopuhngi no himngonghi, mo maica 'e himngonghi mo yuecnguhu to acʉcʉhʉ ʉmnʉ ci peipeis'ausna.

¹⁵ 'e isi pafeni to kilisto ci moususeomʉ la sotmoyaevona ta 'tohʉngʉmu; nomio no poa yaa moususemʉ na muu, isi epeiya to hamo muu ho poa conofeango, temula 'aveoveoyʉ.

¹⁶ 'o e'e to kilisto temula at'otngasa poa no'ayumonʉ ta 'tohʉngʉmu. la boemi no mav'ov'o ci moutʉs'ʉ ho yupa mo'ma'cohio, eucufnu, boemi no tohmomoengʉ, pasunaeno, pasupiepiya ho i'mʉs'onʉ no 'tohʉngʉ ho tayafi namo 'aveoveoyʉ ci fihngau ho tohmomoengʉ to hamo.

¹⁷ 'upena hoci cuma nala hioa, cuma nala e'e, temula aa'pucu boemi to ongko to kilisto, ieni to kilisto ho 'aveoveoyʉ to hamo.

faeva ci natʉ'ca ta cou

¹⁸ 'e mamespingi temula meo'uzo to vcongʉmu, maica na eni zou anana'o yu'ausna ta kilisto sinto.

¹⁹ 'e hahocngʉ temu ngohia 'e vcongʉ, teav'a akuzkuzoa.

²⁰ 'e mao'o'oko, temula aa'pucu tmalʉ to maameoi; maica lasi ʉm'ʉmnʉa to hamo na eni.

²¹ 'e maameoi no 'o'oko, teav'a asʉsʉ'nova 'e 'o'oko. ci tes'ala ma'sasmʉzʉ na 'tohʉngʉ ho ma'papayo'ʉ.

²² na soskuskunu, temula aa'pucu tmaayaezoyʉ to taukemu ta hpʉhpʉngʉ. na lamu hioa o'ate anova poa aitneni no tauke ho noa ʉm'ʉmnʉa, la conino i'taico no 'tohʉngʉ, maica mimu einu to nooe'oca.

²³ upena hoci cuma nala hioa, la conino mimhocni na 'tohʉngʉ ho hioa, mais'a imu yaahioaneni 'o nooe'oca, o'a imu yaahioaneni 'e cou.

²⁴ la cohivi na ohsi songacveni no iachisi 'o'oko to hamo ci hnoo. 'atasi ahtao'te faeni suu. na imu fifihi zou 'o nooe'oca kilisto.

²⁵ i'ola peiskuzkuzo, 'upena na siya, tena ahtuo'te elʉ no patvovei, maica isi titheni nomo totiski ci svʉta to hamo ho mi'usni 'emo macicihi ci cou.