'epeso 2 - buacou seiso no faeva esvʉtʉ

yuyafo no mcoi ho yʉmeʉmʉ no nsou

¹ ne auyusi, mimu i'mi no kuisi ho yutasufku to mashʉyʉ to hamo, yono piepiya mimucu mcoi.

² ne mio, mohmula mee'ofeihni to kokuici hi'hioa ta hpʉhpʉngʉ, peteozu tola tʉʉt'ʉcʉ ta engʉca, 'ai'olaeno aʉt'ʉcʉ to la yutasufku to mashʉyʉ to hamo ci h'aokuv'o.

³ a'ʉmtʉsi, ne auyusi 'e mito macicihi, mohtola totiski ta a'a'ausnahe, poa 'aʉnpʉnpʉ 'e ma'konvosʉto ta yu'ausna ho mee'ofeihni ta iachi 'tohʉngʉ. ko'koeno, o'amito toskucuhe ta mocmo ci cou, isi acʉha asvʉta no tiou no patvovei to hamo.

⁴ at'inghi, mo yaa atngaso ci himcocoveoi 'o hamo; na lasi hia ngohia a'to mo meoisi ho uk'a noca'cʉ'hi.

⁵ 'e piepiyato ne mosola nomio no yutasufku ho mcoi to kuisi, isi poa i'upu to kilisto ho smoevovei a'to; zou mengumisi 'omo to'usnu muu.

⁶ 'o hamo isicu poa yonto 'ayumona to nsou to kilisto iesu na a'to ho i'upu to kilisto ho smoevovei, i'upu yone pepe ho atʉkcʉ.

⁷ ho isi yaica te mi'usnu tate yutotavei ho pa'teni na meoino mengumisi, 'ai'oeno isi ieni to kilisto iesu ho epa'teni a'to ci himngonghi.

⁸ mimu noe'ocʉ to mengumi to hamo, ieni to singkoo ho noa to'usni; na eni o'amo i'mi no iachimu peipeis'ausna, ma isic'o pafeni to hamo ci mengumi.

⁹ ho o'a mioeno noe'ocʉ no peipeis'ausna, uk'ana ci temu peelʉi etanveni.

¹⁰ zou hamo na moso mooyai a'to; isi ieni to kilisto iesu ho teoezuhi a'to, poa peislʉlʉ a'to; na eni ohsicu noana'va ta'eoyoca ho poa hioaneni a'to.

yonto nsou to kilisto ho tmucni

¹¹ 'e mimu asonghoi couyafana, la talʉa na nia a'a'ausna no auyusi: lahe yainca tola iachi mainca moso tiou no s'e'honga ci cou - 'a i'oeno 'ola tifu'fu ho iachia s'e'honga 'e feango ci couyutaya - lahe yainca muu o'amimu tiou no s'e'honga.

¹² ne mio, na natʉ'camu 'o kilisto, zou couyafana, o'amimu no'ayumonʉ to isi epeiya to hamo. to ohsi teomneni to mao'o'okosi to hamo o'a mimu tma'upu, yonta hpʉhpʉngʉ uk'a ci imu ta'usni, uk'a hamo.

¹³ 'e mohmula emomcovhi to hamo ne auyusi, maitan'e micu yuecnguhu to kilisto iesu ci cou, ieni to mcoisi, micu smacmu'u to hamo.

¹⁴ isi iachia faeni a'to to kilisto 'e suseomʉ; isi poa tmucni 'e couyutaya ho i'o couyafana, ieni to iachisi feango ho popuya 'o koa nahanga, ho koa apaevai ci tonghifa.

¹⁵ isi aapayo'a 'o maeesvʉta to hoolicu to yutaya, akoeva no ieni to nsousi ho poa faeva ci cou 'emo yusno suezopʉ, meelʉ suseomʉ ho noteuyunu.

¹⁶ ieni homo mcoi to zuuzika, isi poa tosvo to kilisto 'emo maica ci yupa nahanga, ieni to zuuzika ho poa cono feango 'e mo yuso, ko'kocu meelʉ nanghia to hamo.

¹⁷ maicac'o, na atuhcusi homo cmʉ'ho 'o kilisto tesi psoyaska 'e koa suseomʉ ci fukuin ho faeni ta afu'u cou, a'upa 'e mohmu la emomcovhi to hamo ne auyusi ci couyafana. ho i'omo smacmu'u to hamo ci couyutaya.

¹⁸ ieni to kilisto, 'upena 'e couyutaya ho i'e couyafana, teto acʉhʉ meelʉ yono 'ayumona to conci seilei ho uhto tuhcu to amopepe.

¹⁹ yaica ci hia baito, 'e couyafana o'ana couyafana hocieno huhmohma ci cou; zoucu 'oahngʉ to 'o'oko to hamo na muu, zoucu 'oahngʉ ta cono emoo to hamo.

²⁰ totiski to couyutaya, isi yaeza p'eyac'a to isi io'tohungvi to sitoo ho eyongensa, 'o kilisto iesu 'aeno totnguca ta emoo tan'e.

²¹ noe'ocʉ to iesu kilisto, niantec'u meelʉ yuecngucnguhu 'e isi p'eyac'a ci emoo, ausuhcu faf'ohʉ hocu seiten ho sʉ'teni to nooe'oca.

²² noe'ocʉ to iesu kilisto, tesi yaeza p'eyac'a muu, meelʉcu ieni to seilei ho 'oyona amiocni to hamo.