'epeso 1 - buacou seiso no faeva esvʉtʉ

¹ zou poolo a'o; mi'o tiyou to 'tohʉngʉ to hamo ho sitoo to kilisto iesu. te'o tmopsʉ ta tengami ho faeni tomo yonta mia'usnu ta 'epeso cimo meot'ʉcʉ to iesu kilisto ci masisinto:

² 'o amohamo ho i'o nooe'oca iesu kilisto tesi'sola fii no mengumi ho soanono na muu!

tma'usnu no piepiya ci mengumi to 'ayumona to kilisto

³ 'aveoveoyʉ to amohamo to nooe'oca iesu kilisto. maica isi ieni to kilisto ho faeni a'to 'emo mav'ov'o cimo tma'usnu ne pepe ci ʉm'ʉmnʉ.

⁴ auyusi no teyai 'e hpʉhpʉngʉ, ohsicula ieni to kilisto ho epeiya a'to. poa yonta tuhcusi na a'to ho meelʉ socofkoya, ho uk'a ake'i ca'i ci cou.

⁵ isi ngohia to hamo a'to, ayoca esvʉta a'to ho ieni to iesu kilisto ho poa tma'usnua, poa yaa ongko no teyai 'o'oko a'to; isi ta'ʉ'ʉmnʉa eni, zou 'tohʉngʉsi.

⁶ teto tohmomoengʉ to psoevohngʉ ci mengumi to hamo, maica isi taha'veni a'to 'o isi atva'esa ngohia ci okosi!

⁷ i'mi homo mcoi 'o kilisto, mito elʉ to ziu, noa peteongasa 'e kuisito. na eni 'amoeno i'mi to atngaso ci mengumi to hamo.

⁸ 'e isi faeni a'to ci mengumi a'ʉmtʉs'a atngaso! isi titheni no moutʉs'ʉ ho mau'to'tohʉngʉ to hamo.

⁹ aepʉngacu na 'tohʉngʉsi, a'vinano poa cohivneni a'to isicu esvʉta no ieni to kilisto ho peiseʉpngi 'e moumsʉ'eonʉ.

¹⁰ ho tac'u no'sʉftonʉ na hiesi i'o tasi aepʉnga ci ohsi ta'koeva to hamo 'aeno: 'e ohsi afu'a teyai ta pepe ho ceoa tesi acʉha poa tma'usnu to kilisto. te papoevʉ 'o kilisto.

¹¹ acʉcʉhʉ 'e macucuma ta mouhpʉhpʉngʉ te acʉhʉ maino ohsi ta'koeva ho ino ohsi esvʉtʉ to hamo ho aepʉnga. 'o hamo mo i'tohungu no ohsila ahoza esvʉta ci 'tohʉngʉ, ieni to kilisto ho epeiya a'to ho teyai 'o'oko.

¹² na 'tohʉngʉsi tesi acʉha poa tohmomoengʉ to psoevohngʉ to hamo 'e mito ahoi yaa ta'usni ho tmae'ocʉ to kilisto ci cou!

¹³ 'amimueno maezo maica: ne ohmucu tac'ʉhi 'o e'e ta so'emio, 'aeno ne ohmucu tac'ʉhi 'ete to'usnu ci fukuin, mimucu tmaa'uzo to kilisto, i'o ohsila teomneni to hamo ci seilei isicu faeni muu, teyai huomza ho mimu tma'usnu to kilisto.

¹⁴ 'o seilei isi hosoo a'to te tmacngihi no ohsi teomneni to hamo, faeni tamo tma'usnu ci cou na a'sʉftonʉ ci ziu. teto tohmomoengʉ no psoevohngʉsi!

'inoli to poolo

¹⁵ i'mi tan'e, ahoi ne o'ucu tac'ʉhi ho mimu yaa singkoo to nooe'oca iesu, ho ina himngonghimu ho lamu mi'usnu to sinto,

¹⁶ la'u o'te antʉhʉ mi'usnu to hamo ho 'aveoveoneni muu. hola'u 'inoli conino e'upa muu,

¹⁷ la'u m'ene to hamo to nooe'oca iesu kilisto, psoevohngʉ ci amopepe, pafi'sio no seilei na muu. 'e seilei eni tesi fii no moutʉs'ʉ muu, paavi muu ho poa bohngʉ to hamo.

¹⁸ la'u yaeza p'enzeni to hamo ho paavi na mcoo ta 'tohʉngʉmu, temu ko'ko cohivi: ho isi eyoho'a muu cuma na temu elʉa cite ta'usni; na isi teomneni ta 'o'okosi ci ezoyʉ mio mainenu na hia atngaso;

^19-20 mio mainenu na hia taso no tonʉsi homo no'ayumonʉ ta mito tmaa'uzo ci cou. 'e meoino tonʉ eni mo aʉlʉ totiski na tonʉ ho ohsi poa i'mi no mcoi ho smoevovei 'o kilisto poa yone pepe ho yusuhngu to vhonasi.

²¹ yone'e, na lasi hia aʉt'ʉcʉ to kilisto mo tosa'ohe ta acʉcʉhʉ cimo kokuzo cila poʉt'ʉcʉ, tʉʉt'ʉcʉ, aʉt'ʉcʉ ho i'ola titutuhcu ci moipiepiya; isi tosa'vi na acʉcʉhʉ ci ongko ta maitan'e ho ino tena cmʉ'ho ci hpʉhpʉngʉ.

²² 'o hamo isi yaeza poa peteozu to kilisto 'e macucuma ta mouhpʉhpʉngʉ, te papoevʉ ta kiokai. eʉt'ʉca 'e acʉcʉhʉ.

²³ 'e kiokai zou feango to kilisto, isi nongcʉngci tomo nongcʉngcʉ ta mouhpʉhpʉngʉ ci kilisto.