Zeremi 5 - Labib An Kreol Seselwa

Pese Zerizalenm

¹ Zabitan Zerizalenm! Patrol dan bann lari lavil! Ouver zot lizye! Gete dan bann plas piblik! Gete si zot war en sel dimoun ki fer sa ki drwat e ki esey reste fidel anver Bondye. Si ou reisi, alor SENYER ava pardonn Zerizalenm.

² Kan zot deklare: Mon fer serman, lo non SENYER ki vivan, zot pe fer en fo serman.

³ I vre, SENYER: Laverite ki enteres ou! Ou'n pini zot, me pa fer zot nanryen. Ou'n preski detri zot; me zot in refize aprann. Zot in fer latet; zot refize retourn kot ou.

⁴ Alor mon'n dir dan mwan menm: Zot zis dimoun senp; zot in azir koman bann fou. Zot pa konn lavolonte SENYER, zot pa konnen sa ki Bondye i demande.

⁵ Mon pou al war bann sef e mon pou koz avek zot. San okenn dout, zot konn lavolonte SENYER, sa ki Bondye i demann zot fer. Me, zot tou, zot parey: Zot in revolte kont lotorite Bondye, e refize obeir li.

⁶ Pour sa rezon, lyon sorti dan lafore pou atak zot. Loulou sorti dan dezer pou devor zot. Leopar in kasyet pre avek zot lavil. Sa enn ki sorti pou ganny devore. Zot in fer bokou pese; zot in abandonn mwan plizyer fwa.

Bondye nepli Kapab Pardonn Pese Son Pep

⁷ Akfer mon bezwen pardonn pese mon pep? Zot in abandonn mwan, zot in al ador bann fo bondye. Mon'n nouri mon pep ziska zot rasazye. Me zot in komet adilter; zot al pas zot letan kot bann prostitye.

⁸ Zot ti parey bann seval byen gra, en saler! Sakenn pe renifle son dezir pour fanm son prosen.

⁹ Pa i'n ler pour mwan pini zot pour tousala, SENYER i deklare? Pa mon bezwen pran mon revanz lo en tel nasyon?

¹⁰ Mont lo bann miray, detri plantasyon rezen, me pa konpletman. Koup son bann brans akoz zot pa pour SENYER.

¹¹ Annefe, lepep rwayonm Izrael ek rwayonm Zida in vreman trai mwan, SENYER i deklare.

Senyer Pou Rezet Izrael

¹² Sa pep in renye mwan. In dir: SENYER pa pou fer nanryen. Napa okenn maler ki pou tonm lo nou. Nou pa pou soufer ni lager ni lafanmin.

¹³ In dir: Bann profet pa konnen ki zot pe koze; zot parol i vid. Bondye pa'n zanmen koz avek zot. Sa bann maler ki zot anonse pou tonm lo zot menm.

¹⁴ Pour sa rezon, la sa ki SENYER, Bondye liniver i deklare: Zeremi! Akoz zot in koz konmsa, parol ki mon pou met dan ou labous, pou vin en dife. Sa pep ava sa dibwa ki sa dife pou devore.

¹⁵ Zabitan Izrael! Mon pe anvoy kont ou, en pep ki sorti lwen. I pou atak ou. I en pep for e ansyen ki pa'n zanmen perdi okenn lager. Zot pa ni konn son langaz, ni kapab konpran li.

¹⁶ Son bann fles i senm lanmor; i annan bann gerye profesyonnel.

¹⁷ Zot pou devor tou: Rekolt ek zot nouritir. Zot pou touy bann garson ek bann fiy. Zot pou masakre zot troupo ek zot betay. Zot pou detri bann plantasyon rezen ek bann pye fig. Tou bann lavil fortifye kot ou krwar ou an sekirite, pou ganny detri par zot larme ki pou masakre tou bann zabitan.

¹⁸ Malgre sa, SENYER i deklare, mon pa pou detri zot konpletman.

¹⁹ Kan zot ava demann ou akoz mon ti fer tousala, ou, Zeremi, ou ava dir zot: Parey zot in abandonn mwan pour al servi bann bondye etranze dan zot prop pei, zot pou al servi bann etranze dan en pei ki pa pour zot.

Bondye I Averti Son Pep

²⁰ Al anons sa mesaz avek bann desandan Zakob; fer konnen bann zabitan Zida:

²¹ Ekout mwan byen, pep tro bet pour konpran. Ou annan lizye, me ou pa war. Ou annan zorey, me ou pa tande.

²² Mwan SENYER, mon demann ou: Akoz ou napa respe pour mon lotorite? Akoz ou pa tranble devan mwan? Mwan menm ki'n met disab koman en baryer pour lanmer. Sa baryer pou touzour la, e lanmer pa pou zanmen depas li. I kapab azite; sa pa pou servi nanryen. Pli gro laroul pa pou kapab depas li.

²³ Me ou, ou en pep antete ki toultan pe revolte. Ou'n abandonn mwan e ou'n swazir ou prop semen.

²⁴ Zanmen ou'n mazinen onor mwan, SENYER ou Bondye. Mon'n anvoy lapli dan son sezon toulezan, ler ou plante e ler ou rekolte.

²⁵ Me ou bann fot in deranz tousala. Ou pese in anpes ou ganny sa bann bon keksoz.

Pese Lepep kont son Prosen

²⁶ Parmi mon pep, i annan bann ki koupab. Zot parey bann saser zwazo. Zot tal zot lasenn e veye, zot kasyet pour zot atrap dimoun.

²⁷ Parey en lakaz zwazo i ranpli avek zwazo, zot lakaz i plen avek bann lobze vole. Konmsa ki zot in vin pwisan e ris.

²⁸ Zot in vin gro e gra. Zot move mannyer fer napa limit: Zot fer sir ki drwa bann orfelen pa ganny zize korekteman. Zot pa tenir kont drwa bann pov.

²⁹ Pa fodre mon pini sa bann dimoun pour sa, SENYER i deklare? Pa fodre mon revanze kont en nasyon parey?

³⁰ En keksoz terib e revoltan in arive dan sa pei:

³¹ Bann profet i koz manti. Bann pret i ansenny zis sa ki fer zot plezir, e mon pep i trouv sa normal. Me ki zot pou fer kan tousala i fini?