Zeremi 43 - Labib An Kreol Seselwa

Zeremi I Ganny Anmennen Lezip

¹ Ler Zeremi ti'n fini raport tou sa ki SENYER zot Bondye ti'n anvoy li dir sa bann dimoun,

² Azarya, garson Hosaya e Yohanann, garson Karea, ek bann zonm arogan ti reponn Zeremi: I pa vre. SENYER nou Bondye pa'n anvoy ou dir pa al reste Lezip.

³ Laverite, se ki Barouk garson Neriya, ki'n mont ou latet kont nou. Annefe, i oule livre nou avek bann Babilonyen ki pou swa touy nou, swa deport nou Babilonn.

⁴ Alor, Yohanann, garson Karea, ek tou bann zofisye larme e lepep antye, ti refize obei lord SENYER ki zot devre reste dan Zida.

⁵ Alor, Yohanann e tou bann sef son larme ti anmenn Lezip tou bann zabitan dan Zida ki ti ankor vivan. Sa ti konpran bann dimoun ki ti'n dabor ganny disperse en pe partou dan bann pei vwazen e ki apre, ti retourn viv dan Zida:

⁶ Zonm, fanm, zanfan e bann fiy lerwa. Zot ti pran tou sa bann dimoun ki Nabouzeradann, zofisye en sarz, ti'n les anba komann Gedalya, garson Ahikanm, garson Safann. Zot ti osi anmenn profet Zeremi ek Barouk, garson Neriya.

⁷ Donk, zot ti refize obei lord SENYER e zot ti al Lezip. Zot ti ariv Tafanes.

Zeremi I Anonse ki Lezip Pou Ganny Anvai

⁸ SENYER ti koz avek Zeremi dan Tafanes:

⁹ Pran bann gro ros. Al anter zot dan twa an brik ki devan pale Faraon dan Tafanes. Fer sir ki i annan dimoun ki war ou fer sa.

¹⁰ Ou ava dir zot: La sa ki SENYER liniver, Bondye Izrael i deklare: Mon pou fer mon serviter Naboukodonozor, lerwa Babilonn, vin isi. Mon pou enstal son tronn par lao sa bann ros ki mon'n kasyet. La ki i pou etabli son latant rwayal.

¹¹ Kan i pou vini, i pou kraz pei Lezip. I pou fer touy sa bann ki devre ganny touye; i pou deport sa bann ki devre ganny deporte; i pou touy sa bann ki devre mor par lepe.

¹² Naboukodonozor pou met dife avek bann stati ki dan tanp Lezip; i pou bril sa bann stati, e anmenn zot Babilonn. Parey en berze i tir pis dan son lenz, i pou netway Lezip e personn pa pou oze met lanmen lo li.

¹³ I pou osi detri bann moniman an pyer ki Heliopolis, dan pei Lezip; e i pou bril tanp bann bondye Ezipsyen.