Tobi 1 - Labib An Kreol Seselwa

Lavi Tobi

¹ Sa liv i rakont zistwar ki ti ariv avek Tobi, garson Tobyel, pti zanfan Hananeel. Hananeel ti garson Adouel e pti zanfan Gabael. Zot tou, zot ti desandan Asyel, sorti dan tribi Neftali.

² Pandan renny lerwa Salmanazar, Tobi ti ganny deporte depi Tisbe ki Sid avek Kedes-Neftali, dan O Galile, par lao Aser, lo kote Was, e Nor avek Fogor.

Tobi I Rakont Son bann Souvenir

³ Tou le zour mon lavi, mwan Tobi, mon'n mars lo semen laverite e fer sa ki byen. Mon'n fer bokou lomonn anver mon fanmir pros e anver mon pep ki ti'n ganny deporte avek mwan Niniv, dan pei bann Asiriyen.

⁴ Dan mon zenes, letan mon ti ankor dan mon pei, later Izrael, Neftali, tribi mon bann zanset ti separ li avek fanmir rwayal David e avek Zerizalenm. Pourtan, tou bann tribi Izrael ti'n swazir Zerizalenm koman lavil kot ti fodre ofer bann sakrifis, la kot zot Bondye i reste, kot tanp ti'n ganny konstri e konsakre pour tou bann zenerasyon fitir.

⁵ Tou mon fanmir e manm nou tribi Neftali, mon zanset, ti ofer bann sakrifis an loner en zenn bef ki Zeroboanm, lerwa Izrael, ti'n fer enstale dan lavil Dann e lo latet tou bann montanny dan Galile.

⁶ Zis mwan ki ti al souvan Zerizalenm pandan bann zour lafet, parey in ganny preskri pour touzour dan en dekre ki vo pour pep Izrael antye. Mon ti depese pour mont Zerizalenm avek bann fri mon premye rekolt e bann premye ne dan mon troupo, en dizyenm mon betay e premye lalenn mon bann mouton.

⁷ Mon ti donn tousala bann pret, bann garson Aaron, pour ofer sakrifis lo lotel. Mon ti osi donn bann garson Levi ki ti responsab servis dan tanp, en dizyenm parti dible, diven, delwil doliv, grenad, fig e lezot fri. Pandan 6 an, mon ti donn dezyenm ladim, larzan ki mon ti al depanse toulezan Zerizalenm.

⁸ Mon ti donn bann orfelen, bann vev ek bann etranze ki ti'n vin reste parmi pep Izrael, en trwazyenm ladim lo tou sa ki mon ti annan. Mon ti fer sa bann don tou le 3 an. Nou ti manz en repa ansanm parey lalwa Moiz i demande, avek bann lenstriksyon ki Debora, manman Hananeel nou papa, ti'n donnen. Annefe, mon ti en orfelen kan mon papa ti mor.

⁹ Kan mon ti vin en adilt, mon ti marye avek en fanm sorti dan mon tribi. I ti donn mwan en garson ki mon ti apel Tobias.

¹⁰ Plitar, mon ti ganny deporte Asiri e anmennen koman en prizonnyen Niniv. La, tou mon bann frer ek mon bann konpatriyot ti manz avek bann non-Zwif;

¹¹ me mwan, mon ti refize manz zot manze.

¹² Akoz mon ti reste fidel anver mon Bondye Treo, avek tou mon leker,

¹³ i ti fer mwan ganny faver Salmanazar ki ti vin mon zanmi. Mon ti abitye aste tou sa ki i ti bezwen.

¹⁴ Pandan son renny, mon ti al fer son bann konmisyon Medi. La, mon ti depoz bann sak larzan valer 300 kilo kot Gabael, frer Gabri.

¹⁵ Kan Salmanazar ti mor, Senakerib son garson ki vin lerwa. Bann semen dan Medi ti'n vin danzere. Alor, mon ti nepli kapab al laba.

Tobi I Anter Bann Mor

¹⁶ Anba renny Salmanazar, mon ti fer bokou lomonn anver mon fanmir pros e manm mon tribi.

¹⁷ Mon ti partaz mon manze avek sa bann ki ti lafen e mon lenz avek bann ki ti touni. Mon ti anter kadav mon konpatriyot ki ti'n ganny zete an deor lavil Niniv.

¹⁸ Mon ti osi anter dimoun ki lerwa Senakerib ti'n touye, kan i ti pe sove Zide. Annefe, dan sa letan, sa ti zizman ki lerwa lesyel ti egzekit kont li, akoz son bann blasfenm. Me mon ti kasyet bann kadav pour al anter zot plitar. Alor kan Senakerib ti fer rod zot, personn pa ti war nanryen.

¹⁹ Kan en zabitan Niniv ti al dir lerwa ki mwan ki ti'n anter sa bann dimoun, mon ti bezwen al kasyet. Me kan mon ti realize ki lerwa ti okouran sa ki mon ti'n fer e ki i ti pe rod mwan pour touye, mon ti per e mon ti sove.

²⁰ Alor, tou mon bann propriyete ti ganny konfiske e met dan trezor rwayal. Ti reste mwan zis mon fanm Ana ek mon garson Tobias.

²¹ Apenn 40 zour plitar, lerwa ti ganny touye par son de garson ki ti sove dan montanny Ararat. Asaradon son garson, ti mont lo tronn. I ti nonm Ahikar, garson mon frer Hanael, responsab finans son rwayonm. Ahikar ti annan lotorite lo tou ladministrasyon pei.

²² I ti entersed dan mon faver e mon ti kapab retourn Niniv. Annefe, anba Senakerib, lerwa Asiri, Ahikar ti responsab servis diven, lazistis e ladministrasyon finans. Alor, Asaradon ti reapwent li dan sa bann responsabilite. Etan donnen ki i ti mon neve, i ti en fanmir pros.