Psonm 93 - Labib An Kreol Seselwa

Bondye I Lerwa

¹ SENYER i lerwa, in anvlope dan mazeste; i antoure avek lafors.

² Ou tronn i'n ganny etabli depi dan lantikite; ou egziste depi touzour.

³ SENYER! Lanmer in monte; fon lanmer in lev son lavwa; fon lanmer i fer fraka.

⁴ Dan lesyel lao, SENYER i pli pwisan ki tapaz bann losean. I pli pwisan ki bann laroul dan lanmer.

⁵ Ou bann komannman i vreman sir. SENYER! Ou tanp i reste sen pour touzour.