Psonm 57 - Labib An Kreol Seselwa

Lapriyer pour Demann Led

Pour sef lakoral. ‘Pa detri.’ En poenm David ler i ti sov Sail dan kavern.

¹ Pran pitye pour mwan, mon Bondye! Pran pitye pour mwan. Ou mon protekter. Mon vin rod proteksyon anba ou lezel, ziska ki bann dezas i pase.

² Mon kriy ver Bondye Treo; Bondye ki fer tou pour mwan.

³ Lao dan lesyel i anvoy son sekour e fer kanmi sa bann ki pourswiv mwan. Bondye pou touzour montre mwan son lanmour ek son fidelite.

⁴ Mon'n ganny antoure par bann lyon feros, bann zonm ki annan ledan parey lans ek dart. Zot lalang i koupe parey en lepe byen fite.

⁵ Mon Bondye! Montre ou grander ki depas lesyel! Fer ou laglwar kouver later antye!

⁶ Zot ti'n met en latrap lo mon semen pour fer mwan pliye. Zot ti'n fouy en trou lo mon semen, me zot menm ki'n tonm ladan.

⁷ Mon Bondye! Mon leker i ranpli avek konfyans. Mon vreman annan konfyans. Mon pou sante, mon pou zwe lanmizik pour ou.

⁸ Reveye, mon leker! Reveye, bann lenstriman lanmizik! Mon pou fer lizour aparet.

⁹ SENYER! Mon pou loue ou parmi bann pep. Mon pou sant ou louanz parmi bann nasyon.

¹⁰ Ou lanmour i osi gran ki lesyel. Ou fidelite i monte ziska dan nyaz.

¹¹ Mon Bondye! Montre ki ou grander i pli o ki lesyel e ki ou laglwar i kouver later antye.