Psonm 137 - Labib An Kreol SeselwaLamantasyon Pep Izrael Annegzil 1 Lo bor bann larivyer Babilonn, kot nou ti pe asize, nou ti plere ler nou ti mazin Siyon. 2 Nou ti met anpandan nou bann laarp avek pye dibwa obor larivyer. 3 La, bann ki ti'n deport nou ti demann nou pour sante. Nou bann bouro ti demann nou sant bann kantik lazwa: Sant en kantik sorti Siyon! 4 Ki mannyer nou kapab sant en kantik pour SENYER dan en pei etranze? 5 Si zanmen mon oubliy ou Zerizalenm, mon demande ki mon lanmen drwat i paralize. 6 Si mon aret mazin ou, si mon pa gard Zerizalenm koman mon pli gran lazwa, mon demande ki mon lalang i reste kole dan mon pale. 7 SENYER! Pa oubliy sa ki bann Edomit ti dir zour Zerizalenm ti tonbe. Zot ti dir: Kraz sa lavil! Kraz sa lavil! Kraz li ziska son fondasyon! 8 Babilonn! Ou pe al ganny detri. Byennere sa bann ki pou tret ou parey ou ti tret nou! 9 Byennere sa enn ki pou pran ou bann pti zanfan e kraz zot lo ros. |
Labib An Kreol Seselwa © Seychelles Bible Society, 2013.