Psonm 13 - Labib An Kreol Seselwa

Lapriyer pour Demann Led

Psonm David dan repertwar sef lakoral.

¹ Ziska kan SENYER, ou pou oubliy mwan? Pour touzour? Ziska kan ou pou kasyet ou figir avek mwan?

² Ziska kan fodre ki mon pran traka e viv tou le zour avek en leker sagren? Ziska kan mon lennmi pou pran lavantaz lo mwan?

³ SENYER, Mon Bondye! Regard mwan. Reponn mwan. Vin ekler mwan. Pa les mwan al dormi dan lanmor,

⁴ akoz mon lennmi ava dir: Mon'n pli for ki li. Mon bann ladverser ava alor dan lazwa, akoz mon'n tonbe.

⁵ Me mwan, mon'n met mon konfyans dan ou fidelite. Mon leker i kontan akoz ou'n delivre mwan.

⁶ Mon pou sant pour mon SENYER akoz in fer mwan bokou dibyen.