Oze 7 - Labib An Kreol Seselwa

¹ Kan mon oule geri pep Izrael, mon war bann fot Efraim ek bann krim Samari: Zot malonnet; zot en bann voler ki kas lakaz; bann bandi ki vole dan semen.

² Zot pa mazinen ki mon war tou keksoz mal ki zot fer. Zot bann aksyon i anvlop zot. Tou sa ki zot fer i devan mwan.

Konplo dan Pale

³ Zot mesanste i anmiz lerwa; zot bann trik i fer plezir bann sef.

⁴ Zot tou, zot in komet adilter. Zot parey en four ki en boulanze i sofe. Me i aret vey dife depi ki i'n petri lapat, ziska ki son lapat in fini leve.

⁵ Zour lafet pour lerwa, bann minis i bwar diven ziska zot malad; zot vin gaga e lerwa i fer parey.

⁶ Anndan, zot brile parey dife en four; tou lannwit zot lakoler i sofe dan sonmey, e bomaten laflanm i pete.

⁷ Zot tou, zot sofe parey en four; zot devor zot bann sef. Zot bann lerwa in tonbe; personn pa rod mwan.

Izrael ek Lezot Nasyon

⁸ Izrael i les li melanze avek lezot pep. Efraim i parey en galet ki'n kwi zis en kote.

⁹ Bann etranze i sis son lafors, san ki i konnen. Lavyeyes in akapar li, san ki i remarke.

¹⁰ Lorgey Izrael i temwanny kont li. Izrael pa'n retourn ver SENYER son Bondye. Apre tou, zot pa rod li.

¹¹ Efraim in vin parey en pizon timid san disernman. Zot demann led Lezip e zot al Asiri.

¹² Letan zot pe ale, mon zet en latrap lo zot; mon fer zot tonbe parey zwazo; mon pou koriz zot pour krim ki zot in fer.

¹³ Maler lo zot! Zot in sov lwen avek mwan! Zot pou ganny detri akoz zot in revolte kont mwan. Mon pou delivre zot, me zot dir mansonz kont mwan.

¹⁴ Zot pa apel mwan avek zot leker; me zot kriye lo zot lili; zot sizle zot lekor pour ganny diven ek dible; zot revolte kont mwan.

¹⁵ Mwan ki'n ansenny zot, e donn zot lafors; me zot in fer konplo kont mwan.

¹⁶ Zot in tourn ver sa ki pa anmenn okenn profi. Zot parey en fles tord. Zot sef pou tonbe dan lager, akoz zot bann parol arogan; dan Lezip, zot pou ganny riye.