Oze 5 - Labib An Kreol Seselwa

Lavertisman pour bann Pret

¹ Bann pret, ekoute! Pep Izrael, port byen atansyon! Bann lerwa, ekoute! Sa zizman i pour zot, akoz zot ti en pyez dan Mispa. Zot ti en latrap ki'n ganny zete lo montanny Tabor.

² Bann enfidel in fouy en gran trou dan Sitim, me mon pou donn zot en bon leson.

³ Mon konn Efraim, e Izrael pa en sekre pour mwan. Efraim in tonm dan prostitisyon, e aprezan, Izrael antye in vin enpir.

⁴ Zot bann aksyon pa permet zot retourn ver zot Bondye. Sa venen prostitisyon i tase dan zot, akoz zot pa konn SENYER.

⁵ Lorgey Izrael i temwanny kont li. Efraim i tonbe akoz son fot, e Zida i tonm ansanm avek li.

⁶ Avek zot bann troupo, zot pou al rod SENYER. Me zot pa pou trouv li, akoz in elwanny li avek zot.

⁷ Zot pa'n fidel avek SENYER, akoz zot bann zanfan ilezitim. Aprezan, nouvellin pou devor zot avek zot plantasyon.

Lager ant Izrael ek Zida

⁸ Fer tande korn lager dan Gibea, soufle tronpet dan Rama. Sonn lavertisman dan Bet-Aven get deryer ou, Benzamen.

⁹ Zour SENYER i pini Efraim, i pou vin zis en dezer. Sa ki mon pe anons Izrael i en fe serten.

¹⁰ Bann sef Zida! Zot fer parey sa bann ki deplas bann taso balizaz; Mon pou devers lo zot mon lakoler, parey delo larivyer.

¹¹ Efraim pou ganny kraze par zizman, akoz i'n kontan swiv sa ki vid, san valer.

¹² Mon pou parey en labse pour Efraim e en lapouritir pour pep Zida.

¹³ Efraim i rekonnet son maladi, e Zida son bann blesir. Alor, Efraim in al ver Asiri e anvoy mesaze kot lerwa Yareb. Me sa lerwa pa pou kapab geri li, ni pran ka son bann boubou.

¹⁴ Annefe, mon pou parey en lyon pour Efraim, e parey en zenn lyon pour pep Zida. Mon pou desir li, apre mon pou ale. Sa ki mon pou anmenn avek mwan, personn pa pou kapab delivre li.

¹⁵ Mon pou ale, mon pou retourn kot mwan, ziska zot avoue ki zot koupab e rod mwan. Dan zot maler, zot pou retourn ver mwan.