Mark 3 - Labib An Kreol Seselwa

Zezi I Geri En Zonm Zour Saba

¹ Zezi ti retourn dan sinagog. La, ti annan en zonm avek en lanmen paralize.

² Bann Farizyen ti pe obzerv Zezi, pour war si i ti pou geri sa zonm zour saba. Konmsa, zot ava kapab akiz li.

³ Zezi ti dir sa zonm avek lanmen paralize, “Leve! Vin isi devan tou dimoun.”

⁴ I ti demann zot, “Eski nou Lalwa i permet fer dibyen, oubyen fer dimal zour saba; sov lavi, oubyen detri lavi?” Me zot ti reste trankil.

⁵ Alor, Zezi ti get zot avek lakoler. I ti vreman sagren pour war zot leker dir. I ti dir avek sa zonm, “Dres ou lanmen.” Sa zonm ti dres son lanmen e deswit, son lanmen ti geri.

⁶ Konman zot ti sorti dan sinagog, bann Farizyen ti deside avek bann Herodyen, pou fer touy Zezi.

En Gran Lafoul I Vin kot Zezi

⁷ Zezi ek son bann disip ti al obor lak. En gran lafoul sorti Galile ek Zide ti swiv li.

⁸ Ti annan osi ki ti sorti Zerizalenm ek Idoume, lo lot kote larivyer Zourden, e dan rezyon Tir ek Sidon. Sa gran lafoul ti vin kot Zezi, akoz zot ti'n antann tou sa ki i ti pe fer.

⁹ Alor, Zezi ti demann son bann disip pour prepar en kannot, pour ki lafoul pa kraz li.

¹⁰ Annefe, Zezi ti'n geri bokou dimoun e tou sa bann ki ti malad, ti pe fer mannyer pour tous li.

¹¹ Kan bann ki ti pe ganny tourmante par bann move lespri ti war Zezi, zot ti tonm devan li e kriye: Ou menm Garson Bondye!

¹² Me Zezi ti ordonn zot severman pour pa koz lo li.

Zezi I Swazir Douz Zapot

¹³ Apre, Zezi ti mont lo en montanny. I ti apel bann ki i ti oule, e zot ti vin kot li.

¹⁴ I ti swazir douz parmi zot. I ti apel zot zapot, pour ki zot reste avek li, pour li anvoy zot anons Rwayonm Bondye,

¹⁵ avek pouvwar pour sas bann demon.

¹⁶ La non sa douz zonm ki i ti swazir: Simon, ki Zezi ti donn non Pyer,

¹⁷ Zan ek son frer Zak, de garson Zebede ki Zezi ti donn non Boanerzes; savedir, bann garson Loraz;

¹⁸ Andre, Filip, Bartelemi, Matye, Toma, Zak, garson Alfe, Tade, Simon ki zot ti apel Zelot,

¹⁹ ek Zida Iskaryot, sa enn ki ti trai Zezi.

Pese kont Lespri Sen

²⁰ Apre, Zezi ti retourn kot li. Ankor en fwa, lafoul ki ti'n rasanble, ti telman gran ki zot pa ti ni menm kapab manze.

²¹ Kan serten manm son fanmir ti antann sa nouvel, zot ti ale pour esey kontrol li, akoz dimoun ti pe dir ki i'n perdi latet.

²² Bann profeser Lalwa ki ti'n desann, sorti Zerizalenm ti dir, “I posede par Belzebil e se par sef demon ki i sas bann demon.”

²³ Alor, Zezi ti apel zot e koz avek zot an parabol, “Ki mannyer Satan i kapab sas Satan?

²⁴ Si en rwayonm i divize kont li menm, sa rwayonm pa pou kapab tenir debout.

²⁵ Si en fanmir i divize kont li menm, i pa pou kapab tenir.

²⁶ Si Satan i lager kont li menm, e i divize, i pa pou kapab tenir: I'n fini pour li.

²⁷ Personn pa kapab antre dan lakaz en zonm for e vol sa ki i annan. I bezwen anmar sa zonm for avan. Apre, i ava kapab vol tou sa ki dan sa lakaz.

²⁸ Mon dir zot, sa i laverite: Dimoun pou ganny pardonnen pour tou zot bann pese ek tou bann blasfenm ki zot in fer.

²⁹ Me si en dimoun i blasfenm kont Lespri Sen, i pa pou zanmen ganny pardonnen: I koupab pour en pese pour touzour.”

³⁰ Zezi ti dir sa akoz zot ti pe dir, “I annan en move lespri dan li.”

Manman ek bann Frer Zezi

³¹ Apre, manman ek bann frer Zezi ti arive. Zot ti pe debout deor e zot ti fer apel Zezi.

³² Lafoul ti pe asize otour li, e zot ti dir li, “Ou manman, ou bann frer ek ou bann ser pe rod ou deor.”

³³ Zezi ti reponn, “Lekel ki mon manman; lekel ki mon bann frer?”

³⁴ I ti get tou bann dimoun ki ti pe asize otour li. I ti dir zot, “La mon manman ek mon bann frer.

³⁵ Sa enn ki fer lavolonte Bondye, li menm mon frer, mon ser ek mon manman.”