Mark 15 - Labib An Kreol Seselwa

Zezi devan Pilat

¹ Byen granmaten, bann gran-pret, bann ansyen, bann profeser Lalwa ek Konsey Siprenm ti syeze. Zot ti fer atas Zezi e anmenn li kot Pilat.

² Pilat ti kestyonn li, “Ou menm ou lerwa bann Zwif?” Zezi ti reponn li, “Ou menm ki pe dir.”

³ Bann gran-pret ti fer bokou lakizasyon kont Zezi.

⁴ Alor, Pilat ti kestyonn li ankor, “Ou pa reponn? Ou pa tann tou sa bann lakizasyon ki zot pe fer kont ou.”

⁵ Me Zezi pa ti donn okenn repons. Sa ti sirprann Pilat.

Zezi I Ganny Kondannen Anmor

⁶ Sak lafet Pak, Pilat ti annan labitid larg en prizonnyen ki lafoul ti demande.

⁷ Ti annan en zonm ki ti apel Barabas, ki ti dan prizon ansanm avek lezot rebel. Zot ti'n komet en mert pandan en revolt.

⁸ Lafoul ti rasanble kot Pilat pour demann sa faver parey labitid.

⁹ Pilat ti reponn zot, “Eski zot oule ki mon larg lerwa bann Zwif?”

¹⁰ Annefe, Pilat ti konnen ki bann gran-pret ti'n livre Zezi dan son lanmen par zalouzi.

¹¹ Me bann gran-pret ti eksit lafoul pour fer Pilat larg plito Barabas.

¹² Pilat ti redemann zot, “Ki zot oule mon fer avek sa enn ki zot apel lerwa bann Zwif?”

¹³ Ankor, zot ti kriye, “Krisifye li.”

¹⁴ Me Pilat ti demann zot, “Ki krim i'n komet?” Me zot ti kriy pli for, “Krisifye li.”

¹⁵ Pour satisfer lafoul, Pilat ti larg Barabas. I ti fer fwet Zezi e livre li dan zot lanmen, pour li ganny krisifye.

Bann Solda I Monk Zezi

¹⁶ Bann solda ti anmenn Zezi dan pale gouverner. Zot ti rasanble tou lezot solda.

¹⁷ Zot ti abiy li dan en lenz rouz; zot ti tres en kouronn pikan ki zot ti met lo son latet.

¹⁸ Zot ti salye li: Viv Lerwa bann Zwif!

¹⁹ Zot ti tap li lo latet avek en baton, kras lo li. Zot ti azenou e fer sanblan ador li.

²⁰ Kan zot ti'n fini gognard li, zot ti tir sa lenz rouz, e remet li son lenz. Apre, zot ti anmenn li pour li ganny krisifye.

Bann Solda I Krisifye Zezi

²¹ Simon, en Sireneen, papa Aleksann ek Rifis, ti pe pase sorti dan lakanpanny. Bann solda ti fors li anmenn lakrwa Zezi.

²² Zot ti anmenn Zezi dan en landrwa ki ti apel Golgota, savedir, plas koksis latet.

²³ Zot ti ofer Zezi diven melanze avek lamir; me i ti refize bwar.

²⁴ Zot ti krisifye li, e zot ti partaz son lenz par tiraz osor, pour desid par sakenn.

²⁵ I ti 9 er bomaten kan zot ti krisifye li.

²⁶ Lo en plak, zot ti afis rezon son kondannasyon: Lerwa bann Zwif.

²⁷ Zot ti krisifye de bandi avek li, enn adrwat, lot agos.

²⁸ Alor sa ki ti'n ekri, ti ganny akonpli: I ti ganny konte parmi bann kriminel.

²⁹ Dimoun ki ti pe pase, ti ensilte li. Zot ti sekwe latet. Zot ti dir, “Ou ki ti pou detri Tanp e rekonstri li dan trwa zour,

³⁰ sov ou lekor, desann lo sa lakrwa.”

³¹ Bann gran-pret, bann profeser Lalwa osi ti gognard Zezi. Zot ti dir, “I ti sov lezot me i pa kapab sov son prop lekor!

³² Kris! Lerwa Izrael! Desann, konmela menm, lo sa lakrwa. Konmsa, nou ava war e nou ava krwar.” Bann ki ti'n ganny krisifye avek li ti osi ensilte li.

Lanmor Zezi

³³ Depi midi ziska 3 er, fernwanr ti fer partou lo later.

³⁴ Ver 3 er, Zezi ti kriy avek en lavwa for: Eloi, Eloi, lama sabaktani? Savedir: Mon Bondye! Mon Bondye! Akoz ou'n abandonn mwan?

³⁵ Serten parmi bann ki ti pe debout la, ti antann li. Zot ti dir, “Ekoute! I pe apel Eli.”

³⁶ Enn parmi zot ti taye, tranp en leponz dan vineg, met lo bout en golet e donn li pour bwar. Me lezot ti dir, “Espere! Annou gete si Eli pou vin tir li la.”

³⁷ Me Zezi ti kriy byen for e i ti mor.

³⁸ Rido Tanp ti desir an de, depi anler ziska anba.

³⁹ Kan sa zofisye Romen ki ti pe debout anfas avek Zezi, ti war koman i ti mor, i ti dir, “Vreman! Sa zonm ti Garson Bondye.”

⁴⁰ Pa tro lwen, ti annan osi bann fanm ki ti pe gete. Parmi zot ti annan Mari Madlenn, Mari manman Pti Zak, Zoze, ek Salome.

⁴¹ Zot ti abitye swiv Zezi, letan i ti Galile e zot ti servi li. Ti annan osi bokou lezot fanm ki ti'n mont avek Zezi Zerizalenm.

Lekor Zezi I Ganny Met dan Tonbo

⁴² Aswar ti'n fer, kan Zozef, en zonm ki sorti Arimate ti arive. I ti en manm respektab dan Konsey. Li osi, i ti pe esper Rwayonm Bondye. Koman ti zour Preparasyon, savedir lavey saba,

⁴³ Zozef ti ganny kouraz pour al kot Pilat, e demann li lekor Zezi.

⁴⁴ Pilat ti etonnen pour aprann ki Zezi ti'n deza mor. I ti apel sa zofisye larme e i ti demann li si Zezi ti'n deza mor.

⁴⁵ Kan i ti'n antann rapor sa zofisye, i ti donn Zozef permisyon pour pran lekor Zezi.

⁴⁶ Zozef ti aste en dra linenn. I ti fer desann lekor Zezi lo lakrwa, anvlop li dan sa dra e depoz li dan en tonbo ki ti'n fouye dan ros. Apre, i ti roul en gro ros devan lantre sa tonbo.

⁴⁷ Mari Madlenn ek Mari, manman Zoze ti pe gete kot zot ti depoz Zezi.