Lamantasyon 4 - Labib An Kreol Seselwa

Katriyenm Lamantasyon

¹ Gete! Lor nepli klate! Lor pir in melanze! Bann ros sorti dan miray tanp i fannen dan tou kwen semen.

² Zabitan Zerizalenm ki ti vo zot pwa annor, pe ganny estimen avek en potis anter ki'n ganny fer par en potye?

³ Menm bann sakal i donn tete e nouri zot piti. Me bann manman dan Zerizalenm in vin kriyel parey lotris dan dezer.

⁴ Son bann piti in telman swaf ki zot lalang i kole dan pale. Bann zanfan i demann manze; me napa personn pour donn zot.

⁵ Bann ki ti abitye manz bon manze pe mor lafen dan semen. Bann ki ti grandi dan lopilans pe fouy dan salte pour ganny en morso manze.

⁶ Pese mon pep i pli grav ki pese Sodonm ki ti ganny kraze en sel kou; personn pa ti annan letan pour sov li.

⁷ Son bann sef ti pli pir ki lannez; pli blan ki dile. Zot lekor ti pli roz ki koray, e labote zot figir ti parey safir.

⁸ Aprezan, zot laparans in vin pli nwanr ki sarbon, personn pa rekonnet zot dan semen; zot lapo in retresi lo zot lezo, in vin parey dibwa sek.

⁹ Sa bann ki ti ganny masakre ti pli sanse ki bann viktim lafen; zot deperi dousman akoz napa nanryen pour manze.

¹⁰ Bann manman ki ti annan konpasyon ti kwi zot prop zanfan pour zot manze, akoz dezas ki ti'n vin lo mon pep.

¹¹ SENYER in les deborde son lakoler; i'n repann son lakoler partou. I'n alim en dife dan Zerizalenm ki'n bril ziska son fondasyon.

¹² Napa en lerwa lo later, ni okenn zabitan dan lemonn ki ti ava kapab krwar ki ladverser, lennmi ti ava kapab antre par bann laport Zerizalenm.

¹³ Sa in arive akoz pese son bann profet e fot son bann pret ki ti fer koule parmi zot disan dimoun inosan.

¹⁴ Zot ti marsaye dan semen parey bann aveg. Zot lenz ti telman tase avek disan, ki personn pa ti kapab tous zot.

¹⁵ Dimoun ti kriye: Sorti la! Enpir! Ale! Sorti! Sorti! Pa tous personn! Ensi, zot ti vin bann egzile e zot ti eran. Dimoun i dir parmi bann nasyon: Zot pou nepli reste parmi nou.

¹⁶ SENYER li menm in dispers zot, i pou nepli get zot. Bann pret nepli ganny onore; bann ansyen nepli ganny respekte.

¹⁷ Nou lizye in fatige esper led ki pa'n zanmen arive; nou'n veye san pozman, pour ki en nasyon vin sov nou.

¹⁸ Nou pa ti kapab sorti dan semen, akoz lennmi ti pe espyonn lo nou. Nou lafen ti pros; nou zour ti'n ganny konte. Lafen nou lavi ti'n arive.

¹⁹ Bann ki ti pe pourswiv nou ti pli vit ki bann votour dan lesyel; zot ti sas nou lo bann montanny, zot ti met bann latrap dan dezer pour nou.

²⁰ Lerwa, sours nou lavi, e ki SENYER ti swazir in ganny met dan zot kaso. Nou ti dir lo li: Nou ava viv parmi bann nasyon anba son proteksyon.

²¹ Nou swete ki bann zabitan Edonm ek Our ava zwaye; zot ava fer lafet. Me mon pou pas lakoup avek zot osi; zot pou sou e zot pou ekspoz zot touni.

²² Zerizalenm in pey pour son pese; SENYER pa pou gard zot annegzil. Me SENYER pou pini bann zabitan Edonm; i ava ekspoz zot pese.