Lamantasyon 2 - Labib An Kreol Seselwa

Senyer I Pini Zerizalenm

¹ Dan son lakoler, SENYER in met Zerizalenm anba en nyaz. Depi lesyel, in zet ater, sa ki ti fer splander Izrael. Zour son lakoler, SENYER pa ti ni menm mazin landrwa kot i poz son lipye.

² San okenn pitye, SENYER in detri tou bann vilaz dan Izrael. Dan son lakoler, in kraz bann lavil byen proteze dan Zida. In anmenn dezoner lo rwayonm e lo son bann sef.

³ Dan son gran lakoler, SENYER in kas lafors Izrael. In refize sekour Izrael devan bann lennmi. I ti alim en gran dife ki ti bril tou keksoz otour li.

⁴ Parey en lennmi, i'n viz son fles lo nou, son lanmen drwat i pare pour tire. I'n touy tou sa ki nou ti pli kontan admire. I'n devers son lakoler, parey en dife lo Siyon.

⁵ SENYER in azir parey en lennmi. I'n detri Izrael, i'n detri son bann pale. I'n kraz son bann miray proteksyon. I'n ogmant latristes ek maler partou dan Zida.

⁶ I'n defons son miray konmsi baraz en zarden e detri landrwa kot zot rankontre. SENYER in fer pep Izrael oubliy bann zour lafet ek saba. Dan son gran lakoler, in abes bann lerwa ek bann pret.

⁷ SENYER in rezet son lotel; i'n abandonn son sanktyer. I'n les lennmi detri miray son bann pale. Tapaz dan tanp ti parey en bann zour lafet.

⁸ SENYER in deside met anrin tou bann miray ki protez Zerizalenm. I ti fer mezire e fer sir ki tou ti ganny kraze. Aprezan, son bann tour ek bann miray in vin zis en ta debri.

⁹ Bann gran laport in ganny met ater. Bann fermtir in ganny kase an morso. Lerwa ek son bann zofisye in ganny anvoye annegzil. Lalwa nepli ganny ansennyen; bann profet nepli ganny vizyon sorti kot SENYER.

¹⁰ Bann ansyen dan Zerizalenm in asiz ater san dir nanryen. Zot in kouver zot latet avek lapousyer e zot in met lenz dey. Bann zenn fiy dan Zerizalenm in bes zot latet ater.

¹¹ Mon lizye i fatige plere. Mon leker i boulverse, mon dan dezespwar. Lennmi in detri mon pep. Bann zanfan e bann pti baba pe mor lo bann semen dan lavil.

¹² Zot demann avek zot manman: Oli dipen ek diven? Zot tonm feb lo semen dan lavil, parey zonm ki'n ganny blese. Zot mor dan lebra zot manman.

¹³ Zerizalenm! Ki mon kapab dir dan ou faver? Avek ki mon kapab konpar ou? Ki mon kapab fer pour konsol ou? Zanmen personn in soufer parey ou. Dezas ki ou'n pas ladan i osi gran ki losean. Lekel ki pou kapab geri ou?

¹⁴ Ou bann profet ti ganny bokou vizyon ki ti zis mansonz pour anbet ou. Si zot ti'n fer ou konn ou fot, ou sityasyon ti ava'n kapab sanze. Me zot mesaz ti zis mansonz.

¹⁵ Dimoun ki pase pe bat lanmen deryer ou, Zerizalenm. Zot sifle, zot sekwe zot latet, zot riy ou. Sanmenm sa lavil ki ti labote parfe; ki ti fer lazwa later antye?

¹⁶ Tou ou bann lennmi pe koz kont ou. Zot sifle avek ou, zot monk ou. Zot kriye: Nou'n detri li; Nou'n war sa zour ki nou ti pe espere.

¹⁷ Parey i ti'n deside depi byen lontan, SENYER in detri Zerizalenm san pitye. Sa ki i'n fer avek nou i'n fer lennmi rezoui lo ou maler; i'n fer ou bann lennmi vin pli for.

¹⁸ Zerizalenm! Les ou miray kriy ver SENYER! Lannwit koman lizour, les ou larm koule parey en toran. Kontinyen plere menm; pa pran okenn repo.

¹⁹ Leve e Kriye tou lannwit. Vid ou leker devan SENYER, parey delo. Lev ou lanmen ver SENYER i ava sov lavi ou bann zanfan ki pe mor lafen dan tou kwen semen.

²⁰ SENYER! Lev ou lizye. Gete! Lekel ki ou'n tret konmsa? Eski bann manman i kapab manz zot prop zanfan, zanfan ki zot in kontan? Eski fodre ki bann pret ek bann profet zot ganny touye dan sanktyer SENYER?

²¹ Zenn koman vye in tale dan lapousyer lo semen. Zenn fiy ek zenn garson in ganny masakre. Zour ou lakoler ti leve, ou'n touy zot, ou'n masakre zot san pitye.

²² Ou'n envit mon bann lennmi par tou kote, konmsi en zour lafet. Zour lakoler SENYER ti leve, personn pa'n kapab sape; napa okenn sirvivan. Mon lennmi in masakre bann zanfan ki mon'n elve, e ki mon'n dorlote.