Esdras 8 - Labib An Kreol Seselwa

Bann Zwif ki ti Retourn avek Esdras

¹ La lalis bann sef fanmir ki ti anrezistre pour mont avek mwan Esdras, sorti Babilonn, pandan ki Artakzerzes ti lerwa:

² Gersonn, dan fanmir Fineas; Danyel dan fanmir Itamar; Hatous, dan fanmir David;

³ dan fanmir Sekanya, parmi bann garson Paros, Zakari, e avek li, 150 zonm.

⁴ Parmi bann garson Pahat-Moab: Eliohenai, garson Zerahia, e avek li 200 zonm.

⁵ Parmi bann garson Zatou: Sekanya, garson Yazyel, e avek li, 300 zonm.

⁶ Parmi bann garson Adin, Ebed, garson Zonatan, e avek li, 50 zonm.

⁷ Parmi bann garson Elanm, Ezai, garson Atalia, e avek li 70 zonm.

⁸ Parmi bann garson Sefatya, Zebadya, garson Mikael, e avek li, 80 zonm.

⁹ Parmi bann garson Zoab, Abdyas, garson Yeyel, e avek 218 zonm.

¹⁰ Parmi bann garson Selomit, Yosifya, e avek li, 160 zonm.

¹¹ Parmi bann garson Bebai, Zakari, e avek li, 28 zonm.

¹² Parmi bann garson Azgad, Yohanann, garson Katann, e avek li, 110 zonm.

¹³ Parmi bann garson Adonikanm, bann pli zenn desandan. La zot non: Elifelet, Yeyel, ek Semaya, e avek zot, 60 zonm.

¹⁴ Parmi bann garson Bigvai, Outai, ek Zakour, e avek zot, 70 zonm.

Esdras I Etabli Levit pour Tanp

¹⁵ Mon ti rasanble zot kot larivyer ki koul ver Ahava, kot nou ti kanpe pandan trwa zour. Kan mon ti enspekte lepep ek bann pret, mon ti remarke ki parmi zot ti napa okenn garson Levi.

¹⁶ Alor, mon ti fer apel bann sef: Eliezer, Ariel, Semaya, Elnatan, Zarib, Elnatan, Natan, Zakari, ek Mesoulanm ki ti parmi bann sef; osi bann enstrikter Yoyarib ek Elnatan.

¹⁷ Mon ti donn zot lord konsernan sef Ido, ki ti sef sa landrwa ki apel Kasifya. Mon ti dir zot sa ki zot ti devre dir li ek son bann frer, bann serviter tanp ki ti la Kasifya, pour zot anvoy nou bann asistan pour tanp nou Bondye.

¹⁸ Gras a proteksyon nou Bondye, zot ti kapab retourn avek Serebya, en zonm entelizan parmi bann garson Mali, garson Levi, garson Izrael, e avek li, son bann garson ek son bann frer. An tou 18 zonm.

¹⁹ Ti annan osi Hasabya, e avek li Ezai, parmi bann garson Merari, ek son bann frer, ek son bann garson. 20 zonm an tou.

²⁰ Parmi bann serviter tanp ki David ek son bann sef ti'n met apar pour ed bann levit, ti annan osi 220 zonm. Tousala ti ganny mansyonnen par zot non.

Zenn ek Lapriyer pour Demann Proteksyon

²¹ La, kot larivyer Ahava, mon ti demann tou dimoun fer en zenn pour imilye nou devan nou Bondye, pour ki i akord nou en bon vwayaz, pour nou, nou fanmir ek tou nou bann byen.

²² Mon ti pou kanmi pour demann lerwa en troup solda pour eskort nou, avek bann kavalye pour protez nou kont lennmi dan nou semen, akoz nou ti'n dir lerwa: Lanmen nou Bondye i avek tou sa ki rod li. Me lafors son lakoler i kont tou bann ki abandonn li.

²³ Alor, nou ti fer en zenn e nou ti envok nou Bondye ki ti egzos nou demann.

²⁴ Answit, mon ti met apar 12 parmi bann pret pli enportan: Serebya, Hasabya ek 10 parmi zot frer.

²⁵ Devan zot, mon ti pez larzan, lor ek bann lobze ki ti'n ganny ofer pour tanp Bondye par lerwa, son bann konseye, bann sef e par pep Izrael antye ki ti prezan.

²⁶ Mon ti konfye zot 20 tonn larzan, trwa tonn bann lobze annarzan, e trwa tonn lor.

²⁷ Mon ti osi konfye zot 20 bol annor ki vo 1,000 pyes lor, ek de vaz an bronz ki ti osi presye ki lor.

²⁸ Mon ti dir zot, “Zot in ganny konsakre pour SENYER. Sa bann lobze i sakre; sa larzan ek sa lor i en lofrann pour SENYER, Bondye zot bann zanset.

²⁹ Fer sir zot gard byen sa trezor ziska ki zot fer li ganny peze devan bann gran-pret ek bann levit, devan bann sef fanmir Izrael dan Zerizalenm, dan bann lasal dan tanp SENYER.”

³⁰ Bann pret ek bann levit ti resevwar larzan, lor ek bann lobze ki ti'n ganny peze pour anmenn Zerizalenm dan tanp nou Bondye.

³¹ Nou ti kit larivyer Ahava, pour al Zerizalenm douzyenm zour, dan premye mwan. Lanmen nou Bondye ti avek nou. Pandan nou vwayaz, i ti protez nou kont tou latak lennmi ek tou bann bandi.

³² Kan nou ti ariv Zerizalenm, nou ti repoze pour trwa zour.

³³ Katriyenm zour, nou ti fer pez larzan, lor ek bann lobze ti dan tanp nou Bondye, par pret Meremot, garson Ouri, ansanm avek Eleazar, garson Fineas. Ti osi annan bann levit Yozabad, garson Zozye, ek Noadya, garson Binoui.

³⁴ Tou ti ganny konte e peze e pwa total ti ganny anrezistre.

³⁵ Tou dimoun ki ti'n retournen sorti annegzil ti ofer sakrifis anver Bondye Izrael. Zot ti prezant 12 toro pour Izrael, 96 mouton mal, 77 zenn mouton ek 12 bouk pour sakrifis pese. Zot ti ofer tousala koman sakrifis konplet pour SENYER.

³⁶ Answit, zot ti delivre lord lerwa avek bann gouverner apwente par lerwa ek lezot gouverner lo lot kote larivyer Efrat, ki ti donn sipor pep Izrael ek tanp Bondye.