Egzod 11 - Labib An Kreol Seselwa

Moiz I Anons Lanmor bann Premye Ne

¹ SENYER ti dir Moiz, “Mon pou anvoy ankor en dernyen fleo lo Faraon e lo Lezip. Apre sa, i pou les zot ale. Kan i ava les zot ale, i pou menm sas zot.

² Fer lepep konnen. Dir zot: Tou zonm ek tou fanm ava demann son vwazen, bann lobze annarzan e bann lobze annor.”

³ SENYER ti fer bann Ezipsyen byen konsider bann Izraelit pour donn zot faver. An plis, Moiz ti ganny konsidere koman en dimoun enportan dan Lezip. Bann lantouraz Faraon ti annan gran respe pour li.

⁴ Moiz ti dir, “La sa ki SENYER i deklare: Ver milye lannwit, mon pou pas Lezip;

⁵ tou premye ne dan Lezip pou mor: Depi premye ne Faraon ki asize lo son tronn, ziska premye ne sa fanm lesklav ki travay dan moulen, e osi, tou premye ne dan troupo.

⁶ Pou annan en gran leokri atraver Lezip antye, enn ki zanmen in deza annan e ki pa pou annan ankor.

⁷ Me kot bann Izraelit, pa pou annan ni en lisyen ki pour gronnyen avek en dimoun, ni kont en zannimo. Konmsa, zot ava rekonnet ki SENYER i fer en distenksyon ant bann Ezipsyen ek bann Izraelit.

⁸ Tou dimoun dan ou lantouraz pou vin prosternen devan mwan. Zot pou dir: Ale! Al avek tou ou pep ki pe swiv ou. Apre sa, mon pou ale”. Moiz ti sorti kot Faraon dan en gran lakoler.

⁹ SENYER ti dir Moiz, “Faraon pa pou ekout ou pour ki mon fer bokou plis mervey dan Lezip.”

¹⁰ Moiz ek Aaron ti fer tou sa bann mervey devan Faraon. SENYER ti andirsi leker Faraon e i pa ti les pep Izrael kit son pei.