Ebre 5 - Labib An Kreol Seselwa

¹ Tou Gran-Pret i ganny swazir parmi bann zonm. I ganny etabli pour li servi Bondye dan zot faver. I prezant lofrann ek sakrifis pour bann pese.

² Gran-Pret i ranpli avek febles. Alor, i kapab azir avek konpasyon anver sa bann ki dan linyorans e bann ki komet bann fot.

³ Akoz li menm i feb, i bezwen ofer bann sakrifis, pa zis pour pese lepep, me osi pour son prop pese.

⁴ Personn pa kapab fer son lekor sa loner pour vin en Gran-Pret. I ganny apele par Bondye, parey Aaron li menm ti ganny apele.

⁵ Demenm, pa Kris ki ti deside par li menm pour pran sa loner pour vin Gran-Pret. Me i ti ganny apwente par Bondye ki ti deklare avek li: Ou mon Garson, Ozordi mon'n vin ou Papa.

⁶ I ti deklare ankor dan Lekritir: Ou pret pour touzour dapre lord Melkisedek.

⁷ Pandan son lavi lo later, Zezi ti priye e sipliy Bondye avek bann leokri ek bann larm. I ti priy sa enn ki ti kapab sov li dan lanmor. Bondye ti egzos li akoz son lobeisans.

⁸ Menm si i ti Garson Bondye, par tou sa ki i ti soufer, i ti aprann lobeisans.

⁹ Ler i ti'n ganny laperfeksyon, i'n vin sours delivrans eternel pour tou bann ki obei li.

¹⁰ Annefe, Bondye in deklar li Gran-Pret pour touzour dapre lord Melkisedek.

Lavertisman kont Danze Abandonn Lafwa

¹¹ Nou annan bokou pour dir lo sa size. Me i difisil pour eksplike akoz zot bezwen bokou letan pour konpran.

¹² Depi tou sa letan, zot ti'n devre vin bann profeser. Me zot ankor bezwen ganny ansennyen bann prensip elemanter lo mesaz Bondye. Zot ankor pe bezwen dile olye nouritir solid.

¹³ Annefe, sa enn ki ankor pe nouri avek dile, i ankor en zanfan; i napa leksperyans konsernan sa ki byen ek sa ki mal.

¹⁴ Me nouritir solid i pour bann adilt ki, avek leksperyans, zot konn disernen ant sa ki byen ek sa ki mal.