Danyel 3 - Labib An Kreol Seselwa

Stati Annor

¹ Lerwa Naboukodonozor ti fer en stati annor 30 met oter e trwa met larzer. I ti plas li dan laplenn Doura, dan provens Babilonn.

² Apre, lerwa Naboukodonozor ti rasanble tou bann sef, gouverner, konseye, trezorye, ziz, mazistra, e tou bann zofisye dan bann provens, pour dedikas sa stati ki lerwa ti'n fer.

³ Alor, tou bann sef, gouverner, konseye, trezorye, ziz, mazistra, e tou bann zofisye dan bann provens ti rasanble pour dedikas sa stati ki lerwa Naboukodonozor ti'n fer. Zot ti rasanble devan sa stati ki i ti'n fer.

⁴ Portparol lerwa ti kriy byen for: Tou bann pep, sorti dan tou nasyon, e ki koz diferan langaz, ekout sa lord:

⁵ Kan zot antann son tronpet, laflit, sitar, triyang, laarp, tanbour, ek tou lezot lenstriman lanmizik, zot ava prosternen pour ador sa stati annor ki lerwa Naboukodonozor in fer.

⁶ Sa enn ki pa prosternen pour ador sa stati, pou deswit ganny zete dan fourno laflanm dife.

⁷ Alor, kan bann dimoun ti antann son tronpet, laflit, sitar, triyang, laarp, tanbour, e tou lezot lenstriman lanmizik, tou bann pep, sorti dan tou nasyon, e ki koz diferan langaz, ti prosternen e ador sa stati annor ki Lerwa Naboukodonozor ti'n fer.

⁸ Deswit apre, serten Babilonyen ti vin akiz bann Zwif.

⁹ Zot ti dir lerwa Naboukodonozor: Mazeste! Viv pour touzour!

¹⁰ Ou menm lerwa, ou ti ordonnen, ki tou dimoun ki antann son tronpet, laflit, sitar, triyang, laarp, tanbour, e tou lezot lenstriman lanmizik, i prosternen e ador stati annor.

¹¹ Sa ki pa prosternen e ki pa ador sa stati, pou ganny zete dan fourno laflanm dife.

¹² I annan serten Zwif ki ou'n apwente pour ladministrasyon provens Babilonn: Sadrak, Mesak ek Abed-Nego ki pa'n respekte lord lerwa. Zot refize servi ou bann bondye e refize ador sa stati annor ki ou'n fer.

¹³ Dan en gran lakoler, Naboukodonozor ti ordonnen pour anmenn devan li Sadrak, Mesak ek Abed-Nego. Alor, sa bann zonm ti ganny anmennen devan lerwa.

¹⁴ Naboukodonozor ti demann zot, “Sadrak, Mesak ek Abed-Nego, eski i vre ki zot pa servi mon bann bondye e ki zot refize ador sa stati annor ki mon'n fer?

¹⁵ Aprezan, met zot pare, kan zot antann son tronpet, laflit, sitar, triyang, laarp, tanbour, e tou lezot lenstriman lanmizik, zot ava prosternen pour ador sa stati ki mon'n fer. Si zot pa ador li, zot pou deswit ganny zete dan fourno laflanm dife. Lekel sa bondye ki pou sov zot dan mon lanmen?”

¹⁶ Sadrak, Mesak ek Abed-Nego ti dir lerwa Naboukodonozor, “Nou pa bezwen defann nou lo sa size.

¹⁷ Mazeste! Nou Bondye ki nou servi, i kapab sov nou dan sa fourno laflanm dife, e dan ou lanmen.

¹⁸ Menm si i pa fer li, nou fer ou konnen, ki nou pa pou servi ou bann bondye e nou pa pou ador sa stati annor ki ou'n fer.”

Fourno Laflanm

¹⁹ Alor, Naboukodonozor ti pran en gran lakoler kont Sadrak, Mesak ek Abed-Nego ki son figir ti sanz kouler. I ti donn lord pour sof fourno set fwa pli so ki labitid.

²⁰ I ti donn lord avek son bann gard pli for dan son larme pour anmar Sadrak, Mesak ek Abed-Nego e zet zot dan fourno laflanm dife.

²¹ Alor, sa bann zonm ti ganny anmare, dan tou zot lenz, zot manto, zot kannson, zot bonnen, tou zot labiyman; zot ti ganny zete dan fourno laflanm dife.

²² Vi ki lord lerwa ti irzan e fourno ti bokou pli so, lafors laflanm dife ti touy sa bann zonm ki ti'n zet Sadrak, Mesak ek Abed-Nego dan fourno.

²³ Me sa trwa zonm, Sadrak, Mesak ek Abed-Nego, ti tonm dan milye fourno laflanm dife ankor anmare.

²⁴ Alor, lerwa Naboukodonozor ti soke e leve toudswit. I ti demann son bann konseye, “Pa ti annan trwa zonm ki ti ganny zete anmare dan dife?” Zot ti reponn lerwa, “Wi, Mazeste.”

²⁵ I ti dir, “Me, mon war kat zonm ki pa anmare, pe marse dan milye dife. Zot pa ni ganny brile, e sa katriyenm i annan laparans en bondye.”

²⁶ Naboukodonozor ti apros laport fourno laflanm dife. I ti dir, “Sadrak, Mesak ek Abed-Nego, serviter Bondye Toupwisan, sorti! Vini!” Alor, Sadrak, Mesak ek Abed-Nego ti sorti dan dife.

²⁷ Tou bann sef, gouverner, ek konseye lerwa ti rasanble e war ki sa dife pa ti'n fer okenn dimal lo lekor sa bann zonm: Seve lo zot latet pa ti'n brile, zot lenz pa ti'n brile, e zot pa ti ni santi loder brile.

²⁸ Naboukodonozor ti dir, “Beni non Bondye Sadrak, Mesak ek Abed-Nego, ki'n anvoy son lanz pour sov son bann serviter akoz zot annan konfyans dan li. Zot in dezobei lord lerwa e riske zot lavi, plito ki servi e ador en lot bondye apar zot prop Bondye.

²⁹ Alor, mon ordonn tou bann pep, tou zabitan ki sorti dan diferan pei e ki koz bann diferan langaz: Okenn dimoun ki koz kont Bondye Sadrak, Mesak e Abed-Nego, pou ganny touye e zot lakaz pou ganny detri, akoz napa okenn lot Bondye ki kapab anmenn delivrans parey.”

³⁰ Apre, lerwa ti donn bann responsabilite pli enportan Sadrak, Mesak ek Abed-Nego dan provens Babilonn.