1 Pyer 5 - Labib An Kreol Seselwa

Responsabilite dan Legliz

¹ Aprezan mon adres mwan avek bann ansyen ki la parmi zot. Mwan osi, mon en ansyen parey zot. Mon temwen bann soufrans Kris, e mon pou partisip dan laglwar ki pou ganny revele.

² Pran byen swen troupo ki Bondye in konfye avek zot koman berze. Vey lo li, pa par obligasyon, me avek bonker, parey Bondye i oule. Pa fer li pour ganny larzan, me avek devouman.

³ Pa rod pour domin lo bann ki'n ganny konfye anba zot responsabilite; me zot devre vin en model pour troupo.

⁴ Kan Sef bann berze pou aparet, zot pou resevwar kouronn laglwar ki pa zanmen terni.

⁵ Demenm, zot bann zennzan! Obei bann ki pli aze ki zot. Montre bokou limilite dan zot relasyon avek kanmarad. Annefe, Lekritir i deklare: Bondye i kont bann orgeye, me i bon anver bann ki annan limilite.

⁶ Alor, avek limilite, plas zot dan pwisan lanmen Bondye, pour ki dan ler ki i'n fikse, i ava onor zot.

⁷ Desarz tou zot traka lo li, akoz i pran swen avek zot.

⁸ Reste vizilan, vey byen. Zot lennmi, dyab, pe pas partou. I pe kriye koman en lyon ki pe rode ki i pou devore.

⁹ Reziste li e reste ferm dan lafwa. Pa oubliye ki zot bann frer dan lemonn antye pe pas par menm soufrans.

¹⁰ Zot pou bezwen soufer pour ankor en pti pe letan. Me Bondye ki sours tou lagras, ki'n apel zot pour partisip dan son laglwar eternel ini avek Kris, i ava li menm rann zot parfe. I ava rann zot ferm; i ava fortifye zot, e etabli zot lo bann fondasyon solid.

¹¹ Li menm ki posed lapwisans pour touzour! Amenn.

Salitasyon Final

¹² Mon ekri zot sa kourt let avek led Silas, ki en frer fidel, pour ankouraz zot, e asir zot ki sa i vre lagras Bondye. Reste ferm ladan.

¹³ Legliz ki dan Babilonn, ki Bondye in osi swazir, parey in swazir zot, i fer zot konpliman, ensi ki Mark, mon garson.

¹⁴ Anbras kanmarad avek lafeksyon. Lape ava avek zot tou ki ini avek Kris!