Zozye 17 - Labib An Kreol Seselwa

Teritwar Demi Tribi Manase

¹ Tribi Manase, premye garson Zozef, ti ganny en par. Makir, premye garson Manase, e papa Galaad, ti ganny Galaad avek Basann, akoz i ti en gerye.

² Lezot fanmir tribi Manase ti ganny en par, klan par klan, pour bann zanfan Abiezer, bann zanfan Elek, bann zanfan Asriel, bann zanfan Sikenm, bann zanfan Efer, bann zanfan Semida. Sa ti tou bann desandan mal dan tribi Manase, garson Zozef, klan par klan.

³ Selofad, garson Efer, garson Galaad, garson Makir, garson Manase, ti napa garson me zis bann fiy: Mala, Noa, Hogla, Milka, e Tirsa.

⁴ Zot ti al war pret Eleazar, Zozye garson Noun ek bann sef parmi lepep. Zot ti dir, “SENYER in ordonn Moiz pour donn nou en par teritwar parmi nou bann frer.” Alor, parey SENYER ti'n ordonnen, zot ti resevwar en par parmi bann frer zot papa.

⁵ Anplis ki Galaad avek Basann ki dan teritwar Les avek larivyer Zourden, tribi Manase ti resevwar par tiraz osor, dis par.

⁶ Bann fiy dan tribi Manase ti ganny en par teritwar parmi zot bann frer, e rezyon Galaad ti vin pour bann garson Manase.

⁷ Frontyer teritwar Manase ti pran depi Aser ziska Mikmetat, ki Les avek Sikenm. Sorti Mikmetat, frontyer ti desann ver Sid kot bann zabitan Enn-Tapoua.

⁸ Pei Tapoua ti pour Manase, me lavil Tapoua li menm, ki lo frontyer avek Manase ti pour bann Efraimit.

⁹ Frontyer ti baliz avek larivyer Kana. Bann lavil sitye dan Sid avek sa larivyer ki ti dan bann lavil tribi Manase, ti pour tribi Efraim. Frontyer Manase ti pas dan Nor avek larivyer e debous kot lanmer Mediterane.

¹⁰ Efraim ti dan Sid e Manase ti dan Nor e lanmer ti servi koman frontyer. Tribi Aser ti trouv lo Nor avek Manase, e tribi Isakar ti trouv dan Les.

¹¹ Dan teritwar Isakar ek Aser, tribi Manase ti ganny Bet-Seann avek bann lavil alantour, Ibleanm avek bann lavil alantour, bann zabitan Dor, avek bann lavil alantour, bann zabitan Enn-Dor avek bann lavil alantour, bann zabitan Taanak avek bann lavil alantour, bann zabitan Megido avek bann lavil alantour: An tou trwa distrik Dor.

¹² Bann desandan Manase pa ti reisi pran posesyon sa bann lavil, e bann Kananeen ti kontinyen reste dan sa pei.

¹³ Ler bann Izraelit ti'n vin ase for, zot ti fors bann Kananeen travay koman lesklav. Me zot pa ti kapab sas zot.

Efraim ek Manase I Demann En Pli Gran Teritwar

¹⁴ Bann desandan Zozef ti vin dir Zozye, “Akoz ou'n donn nou zis en par teritwar, alor, ki nou en pep nonbre akoz SENYER in beni nou?”

¹⁵ Zozye ti dir zot, “Si zot in vin en pep nonbre, e si rezyon Efraim in vin tro pti pour zot, al defris lafore ki pour bann Perizit ek bann Refait.”

¹⁶ Bann desandan Zozef ti dir, “Rezyon montanny pa pou ase pour nou; an plis, bann Kananeen ki reste dan laplenn, bann ki reste Bet-Seann ek bann vilaz, e bann ki reste dan vale Yizreel, zot annan bann kales lager anfer.”

¹⁷ Zozye ti dir bann desandan Zozef, manm tribi Efraim ek Manase, “I vre, zot en pep nonbre e tre for. Pour sa rezyon, zot pa pou resevwar zis en par.

¹⁸ Zot ava ganny osi rezyon montanny, menm si i en lafore. Zot ava defris li, e profit teritwar antye. Zot ava reisi sas bann Kananeen, menm si zot annan bann kales lager an fer e ki zot en pep for.”