Zozye 16 - Labib An Kreol Seselwa

Teritwar Efraim ek Manase

¹ Teritwar bann fanmir tribi Zozef ti pran depi larivyer Zourden, anfas avek Zeriko, dan direksyon Les, ver sours delo Zeriko. Sa ti dezer ki mont depi Zeriko ver montanny Betel.

² I ti kontinyen depi Betel dan direksyon Louz, pas par Atarot, ver frontyer avek bann Arkit.

³ Answit, i ti desann Was dan direksyon frontyer bann Yafletit, ziska teritwar Bet-Horonn Anba e Gezer, pour debous dan lanmer Mediterane.

⁴ Bann desandan Zozef, Manase ek Efraim ti ganny sa teritwar.

Teritwar Efraim

⁵ La teritwar bann fanmir tribi Efraim, klan par klan: Frontyer zot teritwar ti pran depi Atrot-Adar, dan Les, ziska Bet-Oron Leo.

⁶ Lo kote Was, frontyer ti kontinyen dan direksyon Mikmetat dan Nor. Apre, i ti tourn dan direksyon Taanat-Silo, e al ziska Yanoa, dan Les.

⁷ Sorti Yanoa, i ti desann Atarot ek Naara, pas Zeriko e ariv ziska larivyer Zourden.

⁸ Sorti Tapoua, frontyer ti pas tou dilon larivyer Kana dan Was pour ariv kot lanmer Mediterane. Sa ti teritwar ki bann fanmir tribi Efraim ti gannyen, dapre sak klan.

⁹ Ti annan osi bann lavil rezerve pour bann fanmir Efraim, dan teritwar bann fanmir tribi Manase, sa bann lavil avek bann vilaz.

¹⁰ Bann Efraimit pa ti sas bann Kananeen ki ti reste Gezer. Pour sa rezyon, ziska ozordi, zot kontinyen reste parmi bann Efraimit, ki ti fors zot travay koman lesklav.