Zonas 3 - Labib An Kreol Seselwa

Zonas I Obei Senyer

¹ SENYER ti koz avek Zonas en dezyenm fwa. I ti dir li:

² Leve! Al Niniv, sa gran lavil, e proklanm sa mesaz ki mon dir ou.

³ Alor, Zonas ti leve e al Niniv, parey SENYER ti'n dir li. Niniv ti sitan gran, ki i ti pran trwa zour pour travers li.

⁴ Apre ki Zonas ti'n mars en zournen dan lavil, i ti kriye: Ankor dan 40 zour, Niniv pou ganny detri!

⁵ Bann zabitan Niniv ti krwar dan Bondye. Zot ti proklanm en zenn. Depi sa ki pli ris ziska sa ki pli pov ti met lenz dey.

⁶ Kan lerwa Niniv ti tande sa ki ti pe pase, i ti leve lo son tronn, tir son lenz rwayal, e met lenz dey li osi e asiz lo lasann.

⁷ I ti fer proklanm dan Niniv antye: Par lord lerwa ek son bann zofisye: Tou zabitan, tou zannimo, tou troupo napa drwa ni manze, ni bwar.

⁸ Dimoun ek zannimo fodre kouver zot avek lenz dey. Zot ava kriy ver Bondye avek tou zot lafors. Zot pou repanti e aret vyolans ki zot pe pratike.

⁹ Lekel ki konnen! Kekfwa Bondye ava sanz son lide e son lakoler ava arete e nou pa ava ganny detri.

¹⁰ Kan Bondye ti war ki mannyer bann zabitan Niniv ti repanti, i pa ti pini zot parey i ti'n dir i pou fer. I pa ti detri lavil.