Ziz 12 - Labib An Kreol Seselwa

Dispit avek bann Efraimit

¹ Bann zonm dan Efraim ti ganny konvoke. Zot ti mont par Safonn, pour dir Zefte, “Akoz ou ti travers frontyer pour atak bann Amonit, san demann nou pour vin avek ou? Nou pou met dife dan ou lakaz e bril ou ansanm.”

² Zefte ti reponn zot, “Mon pep e mwan menm, nou ti dan en gran konfli avek bann Amonit. Ler mon ti apel zot, zot pa ti vin sov mwan.

³ Ler mon ti war ki zot pa pe vin delivre mwan, mon ti riske mon lavi: Mon ti al atak bann Amonit. SENYER ti livre zot dan mon lanmen. Akoz ozordi, zot in mont kont mwan pour atak mwan?”

⁴ Apre, Zefte ti rasanble tou bann zonm dan Galaad pour al atak Efraim. Bann zonm Galaad ti bat Efraim ki ti'n dir, “Zabitan Galaad! Zot zis en bann dimoun ki'n sove, sorti dan bann tribi Efraim ek Manase.”

⁵ Bann zonm Galaad ti pran kontrol bann pwen kot dimoun i travers larivyer Zourden, lo kote Efraim. Sak fwa enn sa bann ki ti'n sove, sorti Efraim ti dir, “Mon oule traverse!” Bann zonm Galaad ti demann li, “Eski ou sorti dan tribi Efraim?” I ti dir, “Non.”

⁶ Zot ti dir li, “Alor, dir Sibolet.” Si i pa ti kapab byen pronons sa mo, zot ti sezi li e egorz li pre avek landrwa kot dimoun i travers larivyer Zourden. Dan sa letan, an tou 42,000 zonm Efraim ti ganny touye.

⁷ Zefte ti ziz dan Izrael pandan 6 an; apre son lanmor, Zefte ti ganny antere dan Galaad, lavil kot i ti sorti.

Ibsann I Vin Ziz

⁸ Apre Zefte, Ibsann, sorti Betlehenm, ti vin ziz dan Izrael.

⁹ I ti ganny 30 garson e 30 fiy ki i ti fer marye avek bann etranze. I ti fer vin 30 fiy etranze pour son bann garson. I ti ziz dan Izrael pandan set an.

¹⁰ Apre son lanmor, Ibsann ti ganny antere dan Betlehenm.

Elonn I Vin Ziz

¹¹ Apre Ibsann, Elonn sorti dan tribi Zabilon ti vin ziz dan Izrael. I ti ziz dan Izrael pandan 10 an.

¹² Apre son lanmor, Elonn ti ganny antere Ayalonn, dan pei Zabilon.

Abdonn I Vin Ziz

¹³ Apre Elonn, Abdonn, garson Hilel, sorti Piratonn ti vin ziz dan Izrael.

¹⁴ I ti annan 40 garson ek 30 pti zanfan ki ti mont 70 bourik. I ti ziz dan Izrael pandan wit an.

¹⁵ Apre son lanmor, Abdonn, garson Hilel sorti Piratonn, ti ganny antere dan pei Efraim, dan montanny bann Amalesit.